ޖުޑިޝަލް ސާވިސް ކޮމިޝަން (ޖޭއެސްސީ) ގެ އިހުތިސޯސްތަކުގެ ތެރެއަށް ސްޕްރީމް ކޯޓުން ވަދެފައި ނުވާ ކަމަށް އެ ކޯޓުގެ ދަށުން ހިންގާ ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން ބުނެފި އެވެ.
ޑީޖޭއޭއިން މިއަދު ބޭއްވި ނޫސްވެރިންގެ ބައްދަލުވުމެއްގައި ޖުޑިޝަލް އެކަޑަމީގެ ވައިސް ޗާންސެލާ އަހުމަދު މާޖިދު ވިދާޅުވީ، ސްޕްރީމްކޯޓުގެ ފަނޑިޔާރު އަބުދުﷲ ދީދީގެ މައްސަލައިގައި ޖޭއެސްސީގެ އިހުތިސޯސްތަކުގެ ތެރެއަށް ސްޕްރީމް ކޯޓުން ވަދެފައި ނުވާ ކަމަށާއި، ފަނޑިޔާރު ދީދީ ހުށަހެޅުއްވި މައްސަލައަކާއި ގުޅިގެން ކުރަން ޖެހޭ ކަންކަން ކުރުމަކީ އެ ކޯޓުގެ ދުސްތޫރީ އަދި ގާނޫނީ މައްސޫލިއްޔަތެއް ކަމަށެވެ.
މާޖިދު ވިދާޅުވީ، ޖޭއެސްސީން ވިޔަސް، ކޯޓަކުން ވިޔަސް ކަންތައްތައް ކުރުމުގައި ފޮލޯ ކުރަންޖެހޭ ޕްރޮސެސްއެއް އޮންނާނެ ކަމަށާއި، ނެޗުރަލް ޖަސްޓިސްގެ އުސޫލުތައް ވެސް ނަގަހައްޓަން ވާނެ ކަމަށެވެ. މީހަކާއި ދެކޮޅަށް ޝަކުވާއެއް ނުވަތަ ދައުވާއެއް އުފުލުނަސް އެމީހަކަށް ޖަވާބުދާރީ ވާނެ ފުރުސަތު ނުދިނުމަކީ ނެޗުރަލް ޖަސްޓިސް މަނާ ކުރާ ކަމެއް ކަމަށެވެ.
ސްޕްރީމް ކޯޓުން އަމުރެއް ނެރުމުން އެއަށް ފުރަގަސްދީ އެއަަށް އަމަލު ނުކުރުމަކީ އޮންނަ ކަމެއް ނޫން ކަަމަށާއި، އެ ނިންމުމަކާއި އެއްގޮތަށް އަމަލު ކުރުމަކީ ދައުލަތުގެ އަނެއް ދެ ބާރު ހިމެނޭ ގޮތަށް ހުރިހާ އެންމެންގެ މައްޗަށް ވެސް ގާނޫނޫ އަސާސީން ލާޒިމު ކަމެއް ކަމަށެވެ. އަދި ސުޕްރީމް ކޯޓުން ނިންމާ ނިންމުމެއްގެ ޝަރުއީ އަދި ގާނޫނީ ސައްހަކަން ކަނޑައެޅުމަށްޓަކައި އެއްވެސް އިޖުރާތެއް ހިންގުމަށް ދައުލަތުގެ އެހެން އެއްވެސް އިދާރާއަކަށް ޖާގަދީފައި ނުވާ ކަމަށާއި އެ އުސޫލު އޮންނަނީ ގާނޫނުގެ ހުކުމް ނެގެހުއްޓުމަށްޓަކައި ކަމަށް ވެސް މާޖިދު ވަނީ ވިދާޅުވެފަ އެވެ.
"ގާނޫނު އަސާސީގެ ދަށުން އުފެދިފައިވާ ބާރަކުން އެއްބާރުން އަނެއް ބާރަށް އިހުތިރާމް ނުކުރުމަކީ ހަމަ އެކަނި އިހުތިރާމް ނުކުރެވޭ ނުވަތަ އިހާނެތިކޮށް އަމަލު ކުރެވޭ ބާރަށް އެކަނި ލިބޭ ނިކަމެތިކަމެއް ނޫން. އެހެން އަޅުގަނޑުމެންނަށް ހީވަންޏާ އެއީ ވަރަށް ބޮޑު އޮޅުމެއް. ދިވެހި ރާއްޖޭގައި ވިޔަސް، ދުނިޔޭގެ އެހެން ގައުމެއްގެ ވިޔަސް، ދައުލަތުގެ ބާރަކުން އަނެއް ބާރަށް އިހާނެތިކޮށްފިއްޔާ ދެރަ ލިބެނީ އެ ދެބާރަށް ވެސް... އަދި އަނެއް ބާރަށްވެސްމެ" މާޖިދު ވިދާޅުވި އެވެ.
މާޖިދު އިތުރަށް ވިދާޅުވީ އެކަމުގެ ސަބަބުން ގާނޫނޫ ހުކުމް ގެއްލި، އަދުލު އިންސާފު ވެސް ގެއްލި، ދުސްތޫރީ ނިޒާމް ހަލާކުވެ ދައުލަތް ފެއިލްވެގެން ދާނެ ކަމަށެވެ. އެނޫން ނަތީޖާއެއް ނުނިކުންނާނެ ކަމަށާއި، މިހާތަނަށް އައި އިރުވެސް ދުނިޔޭގެ އެއްވެސް ގައުމެއްގައި އެނަތީއްޖާ އެނޫން ގޮތަކަށް ނިކުމެފައިނުވާ ކަމަށެވެ.