މަގުމަތީގެ ގަވާއިދުތަކާ ހިލާފަށް ޕާކް ކޮށްގެން މިދިޔަ ހަފުތާގައި 881 އުޅަނދުގައި ސްޓިކާ ޖަހާފައިވާ ކަމަށް ފުލުހުން ބުނެފި އެވެ.
ފުލުހުންގެ ޓްރެފިކް ޑިޕާޓްމެންޓުން ކޮންމެ ހަފުތާއަކު އާއްމުކުރާ މާލޭގެ ތަފާސް ހިސާބުތަކަށް ބަލާއިރު މިދިޔަ ހަފުތާގެ ތެރޭގައި މާލޭގައި ވަނީ 31 އެކްސިޑެންޓު ހިނގާފަ އެވެ. އޭގެ ތެރެއިން ފަސް ފަރާތަކަށް އަނިޔާވެފައިވާއިރު މި އެކްސިޑެންޓުތަކާ ގުޅިގެން ހަ މީހެއްގެ ލައިސެންސް ހިފެހެއްޓި ކަމަށް ފުލުހުން ބުނެ އެވެ.
ތަފާސް ހިސާބުތަކަށް ބަލާއިރު، މީގެ ތެރެއިން ލައިސަންސް ނެތި ސައިކަލު ދުއްވި 118 މީހަކާއި ލައިސަންސް އޮވެ، ލައިސަންސް ނުލައި ސައިކަލް ދުއްވި 81 ފަރާތަކަށް ފިޔަވަޅު އެޅި ކަމަށް ދައްކަ އެވެ. އަދި، ގަވާއިދާ ހިލާފު ވެގެން 88 އުޅަނދު ޓޯ ކޮށްފައި ވެ އެވެ.
މިދިޔަ ހަފްތާގައި ފުލުހުން ވަނީ 441 އުޅަނދު ހުއްޓުވައި ބަލާ ފާސް ކޮށްފަ އެވެ.
މަގުމަތީގެ އާއްމު ގަވާއިދުގައި ކަނޑައެޅިފައިވާ ސްޕީޑް ލިމިޓަށް ވުރެ ބާރަށް ދުއްވައިގެން 82 ފަރާތަކަށާއި 18 އަހަރު ނުފުރެނީސް ސައިކަލް ދުއްވި އެއް ކުއްޖަކަށް ފިޔަވަޅު އެޅި އެވެ. އަދި ފޯން ހެޑްސެޓް ޖަހައިގެން ސައިކަލް ދުއްވި 120 މީހަކާއި ސައިކަލް ދުއްވަމުން ދުންފަތުގެ އިސްތިއުމާލްކުރި ނުވަ މީހަކަށް ފިޔަވަޅު އެޅި ކަމަށް ވެސް ފުލުހުން އާއްމު ކުރި ހިސާބުތަކުގައިވެ އެވެ.
މީގެ އިތުރުން އަހަރީ ފީ ނުދައްކާ އުޅަނދު ދުއްވައިގެން 33 މީހެއްގެ މައްސަލައާ ރޯޑް ވޯދިނަސް އަދި އިންޝުއަރެންސް ނަހައްދާ ދުއްވި 49 މައްސަލައެއް ވެސް ފުލުހުން އާއްމު ކުރި ހިސާބުތަކުގައިވެ އެވެ.