ހޮޅުދޫ

ހޮޅުދޫ ފެން ހިންދާ ނިޒާމުގެ ގާއިމު ކުރަން އިންޑިއާ ކުންފުންޏަކަށް

ނ. ހޮޅުދޫ ފެން ހިންދާ ނިޒާމުގެ މަސައްކަތްތައް ކުރިއަށް ގެންދަން އިންޑިއާގެ ކެނޭޑިއަން ކްރިސްޓަލައިން ވޯޓާ ލިމިޓެޑާ ހަވާލުކޮށްފި އެވެ.

މިއަދު އެންވަޔަރަމަންޓް މިނިސްޓްރީގައި ބޭއްވި ރަސްމިއްޔާތެއްގައި މަސައްކަތުގެ އެއްބަސްވުމުގައި ދެ ފަރާތުން ވަނީ ސޮއި ކޮށްފަ އެވެ. މިނިސްޓްރީގެ ފަރާތުން ސޮއި ކުރެއްވީ މިނިސްޓަރު ޑރ. ހުސެއިން ރަޝީދު ހަސަނެވެ. އަދި ކޮންޓްރެކްޓް ހަވާލު ކުރި އިންޑިއާ ކުންފުނީގެ ފަރާތުން ސޮއި ކުރެއްވީ އެ ކުންފުނީގެ ލީގަލް ރެޕްރެސެންޓޭޓިވް ހަމްދޫން އަނީސެވެ.

ހޮޅުދޫގެ ފެންބޮޑުވުމުގެ މައްސަލަ ހައްލު ކުރުމަށް 6،56 މިލިއަން ރުފިޔާ ހަރަދުވާނެ ކަމަށް އެންވާރަމަންޓް މިނިސްޓްރީން ވަނީ ލަފާކޮށްފަ އެވެ. މި މަޝްރޫއު ނިންމުމަށް ދީފައިވަނީ 10 މަސް ދުވަހެވެ.

އަދި މި މަޝްރޫއުއަކީ ސަރުކާރުގެ ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ކުރިއަށް ގެންދާ މަޝްރޫއެކެވެ.