އެންމެފަހުން ރިލީޒްކުރި ސަލްމާން ޚާންގެ "ބަޖްރަންގީ ބައިޖާން" ވަނީ އިންޑިއާގެ އިތުރުން ދުނިޔޭގެ އެކިގައުމުތަކުގެ ބޮކްސް އޮފީސް ވެސް ހިސޯރުކޮށްފަ އެވެ.
މިފިލްމު ރިލީޒްކުރިތާ މިހާރު ދެހަފްތާ ވެފައިވާއިރު، މިއަހަރުގެ މިހާތަނަށް ނިކުތް ހިންދީ ފިލްމުތަކުގެ ތެރެއިން ފުރަތަމަ ދުވަހު އެންމެ ބޮޑު އާމްދަނީއެއް ލިބުނު ފިލްމަށްވެފަ އެވެ. މީގެއިތުރުންވެސް ފިލްމު ރިލީޒްކުރި ހަފްތާ ބަންދުގައި 100 ކްރޯޑް ހޯދައިގެން، މިއަހަރުގެ މިހާތަނަށް ރިލީޒްކުރި ފިލްމުތަކުގެ ތެރެއިން އެންމެ އަވަހަށް 100 ކްރޯޑް ކްލަބަށް ވަން ފިލްމުގެ ރެކޯޑް ވަނީ ހޯދާފަ އެވެ. މީގެއިތުރުންވެސް މިފލްމު ވަނީ 10 ދުވަސްތެރޭގައި 240 ކްރޯޑަށް ވުރެން ގިނަ އާމްދަނީ އިންޑިއާއިން އެކަނި ހޯދައިގެން އަހަރުގެ އެންމެ ބޮޑު އާމްދަނީ އެއްލިބުނު ފިލްމުގެ އިތުރުން އަހަރުގެ އެންމެ ބޮޑު ބްލޮކްބާސްޓާ އަށް ވެފަ އެވެ.
އިންޑިއާ އާއި ޕާކިސްތަނާއެކު ޖުމްލަ 50 ގައުމެއްގައި މިމަހުގެ 17ވަނަ ދުވަހު ފިތުރު އީދާއި ދިމާކޮށް މިފިލްމު ދައްކަން ފަށާފައިވާއިރު، މިފިލްމަށް އަދިވެސް އަންނަނީ ބޮޑު ތަރުހީބެއް ލިބެމުންނެވެ.
މިހާތަނަށް އަދި މިފިލްމަށް ދުނިޔޭގެ މާކެޓުން ލިބުނު އާމްދަނީ އާންމުކޮށްފައިނުވާއިރު، ޓްރޭޑް އެނަލިސްޓް ކަރަން އަދާޝް ކުރި ޓްވީޓެއްގައި ވަނީ މިހާތަނަށް އެކި ގައުމުތަކުން މިފިލްމަށް އަންގާރަ ދުވަހާއި ހަމައަށް 128 ކްރޯޑް ލިބިފައިވާ ކަމަށެވެ. މި އަދަދާއިއެކު މިފިލްމަށް 13 ދުވަސް ތެރޭގައި ވަނީ ޖުމްލަ 496 ކްރޯޑް ލިބިފައި ކަމަށްވެސް ތަރަން ކުރި ޓްވީޓްގަ އެވެ.
އިންޑިއާގެ ބޯޑަރު ތެރެއަށް ގެއްލޭ ޕާކިސްތާން ކުޑަ އަންހެންކުއްޖެއް އަނބުރާ ގައުމަށް ގެންގޮސްދިނުމަށް ސަލްމާން ކުރާ ބުރަ މަސައްކަތް ފެނިގެންދާ މިފިލްމު ރިލީޒްކުރި ފަހުން ރެކޯޑަކަށްފަހު ރެކޯޑެއް މުގުރައި ބޮކްސް އޮފީސް ފަތަހަ ކުރަމުން އަންނައިރު، ސުޕަސްޓާ އާމިރް ޚާންގެ "ޕީކޭ" އާއި "ދޫމް 3" ލިބުނު ޖުމްލަ އާމްދަނީގެ ރެކޯޑް އަދިިވެސް ވަނީ މުގުރާނުލެވިފަ އެވެ.
ނަމަވެސް ދެހަފްތާގެ ޖުމްލަ އާމްދަނީ އާއިއެކު "ދޫމް 3" ވައްޓާލުމަށްފަހު މިފިލްމު ކުރިއަށް ޖެހިލާނެކަމަށް ގިނަ ފަރާތްތަކަކުން ބުނެ އެވެ.
ކަބީރް ޚާން ޑައިރެކްޓްކޮށް، ސަލްމާން ގެ އިތުރުން ކަރީނާ ކަޕޫރު އާއި ނަވާޒުއްދީން ސިއްދީގީ އަދި ހަރްޝާލީ މަލްހޯތުރާ މުހިންމު ރޯލުން ފެނިގެންދާ މިފިލްމަށް "ޕީކޭ" ރެކޯޑް މުގުރާލެވޭނެ ކަމާއިމެދު އޮތީ ވަރަށް ކުޑަ އުންމީދެކެވެ.
ކޮންމެއަކަސް މިފިލްމަށް "ޕީކޭ" ގެ ރެކޯޑް މުގުރާނުލެނު ކަމުގައި ވިޔަސް، މިއަހަރުގެ ކުރިއަށް ހުރި ފިލްމުތަކަށް މިފިލްމަށް ލިބުނު އާމްދަނީ އަކީ ބޮޑު ނުރައްކަލެކެވެ.
އިންޑިއާ އާއި ޕާކިސްތާނުގެ ޒަމާންވީ ބޯޑަރުގެ މައްސަލަ ފެނިގެންދާ މިފިލްމު އިންޑިއާއެކޭ އެއްގޮތަށް ޕާކިސްތާނުގައި ވެސް ބޮކްސް އޮފީސް ހިސޯރުކޮށްފައިވާއިރު، ފިލްމު ބަލާފައި ރޮމުން ސިނަމާއިން ނިކުތް އެތައް ބަޔަކު އެބަތިއްބެވެ.