ހއ. ދިއްދޫގައި އޮތް ފުޓްބޯޅަ މުބާރާތެއްގެ ފައިނަލް މެޗު ހޫނުވެ، ހިނގި ހަމަނުޖެހުމުގައި މެޗް ކުޅުނު ދަނޑުގެ ބައެއް ތަކެއްޗަށް ގެއްލުން ދީފި އެވެ.
ފުލުހުން ބުނީ ދިއްދޫގައި ކުރިއަށްދިޔަ އީދު ފުޓްބޯޅަ މުބާރާތުގައި ޖެހުނު މައްސަލައެއްގައި ހަމަނުޖެހުން ހިންގާފައިވާ މައުލޫމާތު ލިބުމާއި ގުޅިގެން މައްސަލަ އިތުރަށް ގޯސްވިޔަ ނުދީ ހައްލުކޮށްފައިވާ ކަމަށެވެ. ނަމަވެސް އެއްވެސް މީހަކު ހައްޔަރުކޮށްފައެއްނުވެ އެވެ.
ހަމަނުޖެހުން ހިނގާފައިވަނީ މިއަދު ބޭއްވި ފައިނަލް މެޗްގައި އެއް ކުޅުންތެރިއަކަށް ރެފްރީ ރަތް ކާޑެއް ދެއްކުމުން އެކަމާ ހިތްހަމަނުޖެހިގެނެވެ. ހަމަނުޖުހެން ހިނގައިދިޔަ ވީޑިއޯއެއް ސޯޝަލް މީޑިއާގައި ވަނީ އާންމުވެފަ އެވެ. އެވީޑީއޯގައި ފެންނަ ގޮތުން ރަތް ކާޑު ދެއްކުމުން އެކުޅުންތެރިޔާ ވަނީ ޖަޖުން ތިބި މޭޒުތަކާއި ގޮނޑިތައް އުކާލާފަ އެވެ. އަދި ޝަރަފުވެރި މެހެމާނުން ތިބި ގޮނޑިތަކުގެ އިތުރުން ބެންޗްގައި ހުރި ގޮނޑިތައްވެސް އުކާލާފަ އެވެ.
ވޯޑިއޯގައި ފެންނަ ގޮތުން ހަމަނުޖެހުން އިތުރަށް ގޯސްވެ ރެފްރީއަށްވެސް ހަމަލާދޭން ފެށުމުން ފުލުހުން ވަނީ ރެފްރީއަށް ވަގުތުން ހިމާޔަތްދީފަ އެވެ.
ދިއްދޫގައި މީގެ ކުރިން ކައުންސިލުން ބޭއްވި ފުޓްބޯޅަ މުބާރާތުގައި މެޗެއް ހޫނުވެ، ވަނީ މެޗް ކުޅުނު ދަނޑު ހަލާކޮށްލާފަ އެވެ. އެފަހަރު ކުޅުނު މެޗް ހޫނުވެ، ދެޓީމުގެ ކުޅުންތެރިންގެ ދެމެދު މާރާމާރީ ހިންގައި ދަނޑު ވަނީ ހަލާކޮށްލާފަ އެވެ. އަދި ބެންޗްތަކަށްވެސް ގެއްލުންދިނެވެ.