މީގެ ކުރީގެ ސަރުކާރުތަކުން ކައުންސިލަރުންނަކީ އެއްވެސް ގާބިލް ކަމެއް ނެތް ތައުލީމެއް ނެތް ބަޔަކު ކަމަށް ދެކުނަސް އެމްޑީޕީއަަށް ކައުންސިލަރުންގެ ގާބިލްކަން ހުރި މިންވަރު ދެނެގަނެވޭތީ ކައުންސިލަރުން ބާކީކޮތް އެއްފަރާ ނުކުރާނެ ކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މިއަދު ފެށި އެމްޑީޕީ ކައުންސިލަރުންގެ ފޯރަމުގައި ވާހަކަ ދައްކަވަމުން ނަޝީދު ވިދާޅުވީ، ފާއިތުވި ސަރުކާރުތަކުންނާއި ސަރުކާރަށް ނިސްބަތްވާ ފަރާތްތަކުން ވިދާޅުވަމުން ގެންދިޔައީ، ރަށު ކައުންސިލަރުންނަށް ރަށައް އެކަށީގެންވާ ސިއްހީ ނިޒާމަކާއި ތައުލީމާ ނިޒާމެއް ގާއިމްކުރުމަށް ބޭނުންވާ ތައުލީމާއި ހުނަރުތަށް ނެތް ކަމަށެވެ.
"ރަށްރަށް ބަލަހައްޓަން ބޭނުންވާ ތައުލީމާއި ވިސްނުން ކައުންސިލަރުންގެ ނެތް ކަމަަށް ބުނާނެ، އެކަމަކު އެމްޑީޕީން ކައުންސިލަރުންގެ ގާބިލްކަން ބަލައިގަންނާނެ" ނަޝީދު ވިދާޅުވި އެވެ.
ކައުންސިލް ކޮންފަރެންސްގައި އިތުރަށް ވާހަކަފުޅު ދައްކަވަމުން ނަޝީދު ވިދާޅުވީ، އެމްޑީޕީގެ އަމާޒަކީ ތަނަވަސް އަދި ޒުވާނުން ވަޒީފާ އަދާކޮށް ހަލާލު މަސައްކަތެއް ކޮށް އާމުދަނީ ހޯދާ ރައްޔިތުންތަކެެއް ދިރިއުޅޭ ގައުމަކަށް ރާއްޖެ ހެދުން ކަމަށެވެ. ނަޝީދު ވިދާޅުވީ، ކައުންސިލްތަށް ބާކީ ކޮށްލައިފައިވުމުން، މިހާރު ރަށްރަށައް ލިބިދޭން ޖެހޭ ހަގީގީ އާމުދަނީ ނުލިބޭ ކަމަށެވެ. މިހާރު މިއޮތް ސިޔާސަތުގެ ދަށުން ރަށައް ލިބިދޭން ޖެހޭ ހުރިހާ ފައިސާއެއް ލިބެނީ މާލޭއަށް ނުވަތަށް މާލޭގައި ހުންނަ މީހަކަށް ކަމަށް ނަޝީދު ވިދާޅުވި އެވެ.
އަބަދުވެސް ލާ މަރުކަޒީ ނިޒާމު ކުރިއަރުވަން މަސައްކަތްކުރައްވާ ނަޝީދު ވިދާޅުވީ، އެމްޑީޕީން ލާމަރުކަޒީ ނިޒާމަކަށް ތާއިދު ކުރަނީ، ރަށައް ލިބިދޭން ޖެހޭ އާމުދަނީގެ ހައްގު ވެރިފަރާތަކީ ރަށު ރައްޔިތުން ކަމަށްވާތީ، އެ ފައިސާ މާލޭ ގެންދެވެން އޮތް މަގު ބަންދުކޮށް ރަށު ރައްޔިތުންނަށް ހައްގު މިންވަރު ހޯދައިދޭން ކަމަށެވެ.
"އަޅުގަނޑުމެންނަށް ތަންދޮރު ފިލައިގެން އައިއިރުވެސް ކިޔަނީ ދޮންބަޑާރަ މިގައުމު ސަލާމަތްކުރީތީ މިއީ ދޮންބަންޑާރައިގެ ގައުމެއް ކަމަށް، މާލޭގެ ހުރިހާ ރަށެއް ސަރުކާރުގެ ބޮޑުންނަށް ވަނީ ވަރުވާއަށް ދީފަ، ރަށްރަށުގެ މުއްސަދިކަން އޮންނަން ޖެހޭނީ އެރަށު މީހުނަށް، އެއީ އެމީހުންގެ މިލްކެއް" ނަޝީދު ވިދާޅުވި އެވެ.
ވާހަކަފުޅުގައި ނަޝީދު އިތުރަށް ވިދާޅުވީ، ކައުންސިލްތަށް ރާއްޖޭ ބަޖެޓުގެ ފަސް ޕަސަންޓް ދޭން ނިންމި ކަމުގައިވިޔަސް، ކައުންސިލްތަކުން އެއީ ފައިސާގެ ގޮތުގައި ދެކިގެން ނުވާނެ ކަމަށެވެ. ނަމަވެސް އެ ފަސް ޕަސަންޓަކީ އިތުރަށް ކުރަން ޖެހޭ މަސައްކަތް ކަން އިގެން ޖެހޭނެ ކަމަށެވެ. ސަރުކާރައި ސިޔާސަތަަށް ތަންފިޒު ކުރުމަށާއި، ރާއްޖޭގެ ރައްޔިތުންނަށް ހައްގު މިންވަރު ހޯދައި ދިނުމަށް ކައުންސިލަރުންނަކީ މުހިންމު ބައެއް ކަމަށް ވެސް ނަޝީދު ވަނީ ވިދާޅުވެފަ އެވެ.