އަންނަ އަހަރު ބާއްވާ ލޯކަލް ކައުންސިލް އިންތިހާބުގެ ކުރިން ލާމަރުކަޒީ ގާނޫނަށް ގެންނަން ބޭނުން އިސްލާހުތައް ގެނެސް ފާސް ކުރާނެ ކަމަށް އެމްޑީޕީގެ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެ އެވެ.
ރޭ ނިންމާލި އެމްޑީޕީގެ ކައުންސެލަރުންގެ ކޮންގްރެސްއަށް ފަހު ނޫސްވެރިންނަށް މައުލޫމާތު ދެއްވަމުން ހަސަން ލަތީފު ވިދާޅުވީ، ލާމަރުކަޒީ ގާނޫނަށް އިސްލާހު ގެންނަ ބިލް ދެ ހަފުތާއެއްހާ ދުވަހުގެ ތެރޭގައި ޑްރާފްޓްކޮށް ނިންމުމަކީ އަމާޒެއް ކަމަށެވެ.
ކައުންސިލަރުންގެ ކޮންފަރެންސް ޗެއާ ކޮށްދެއްވި ލަަތީފު ވިދާޅުވީ އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ ވިސްނުންފުޅުގައި އޮތީ ކުރިޔަށް އޮތް ދެހަފްތާއެއްހާ ދުވަހުގެ ތެރޭގައި އެ ބިލަށް ބޭނުންވާ އިސްލާހުތައް މަޖިލީހުގެ ކޮމިޓީއަށް ފޮނުވާ، އެކަންކަން ނިންމަވަން ކަމަށެވެ.
އޭނާ ވިދާޅުވީ ލަސްވިޔަސް މި އަހަރުގެ ތެރޭގައި އެ ބިލަށް ބޭނުންވާ އިސްލާހުތައް ގެނެސް ގާނޫނަކަށް އެބިލް ބަދަލު ކުރެވޭނެ ކަމަށާއި، އެ މަސައްކަތް ބާރު މިނުގައި ކުރަމުން ގެންދާނެ ކަމަށެވެ.
މީގެ އިތުރުން ލާމަރުކަޒީ ގާނޫނާއި، ތައާރުޒުވާ ގާނޫނުތަކާއި، މާއްދާތަށް ދެނެގަތުމަށް ސާވޭއެއް ކުރަންޖެހޭ ކަމަށާއި، އެ މާއްދާތައް އުވާލުމަކީ، އެ ގާނޫނަށް ގެނެވޭ އިސްލާހުގެ ތެރެއިން ކުރެވިދާކެނެ ކަމަށް ގަބޫލު ނުކުރައްވާ ކަމަށް ވެސް އޭނާ ވިދާޅުވި އެވެ.