ކޮރަޕްޝަނާއި ފަސާދަ ހުއްޓުވަން އޮޑިޓަރުންގެ ދައުރު ވަރަށް މުހިންމު ކަމަށް ރައްޔިތުންގެ މަޖިލީހުގެ މާލިއްޔަތު ކޮމެޓީގެ މުޤައްރިރު މުހައްމަދު ނާޝިޒް ވިދާޅުވެއްޖެ އެވެ.
ދަރުބާރުގޭގައި މިއަދު ފަށައި ކުރިއަށްދާ، މޯލްޑިވްސް އެކައުންޓެންސީ ފޯރަމް އިފްތިތާހުކޮށް ދެއްވާ ވާހަކަފުޅު ދައްކަވަމުން ނާޝިޒް ވިދާޅުވީ ކޮރަޕްޝަން ނައްތާލަން ކުރާ މަސައްކަތުގައި އެކައުންޓެންޓުންނާއި އޮޑިޓަރުންގެ ދައުރު ވަރަށް މުހިންމު ކަަމަށާ، މި މަަސައްކަތުގައި އެކައުންޓެންޓުންގެ އެހީތެރިކަން ވަރަށް ބޮޑަށް ބޭނުންވާ ކަމަށެވެ.
އޭނާ ވިދާޅުވީ ދައުލަތުގެ މުދަލާއި ފައިސާ ބޭނުން ކޮށްފައި ވަނީ އިންސާފުުވެރިކަމާއި އަމާނާތްތެރިކަމާއެކުގައިކަން ޔަގީން ކުރުމަށް އޮޑިޓަރުންނާއި އެކައުންޓެންޓުން އެމީހުންގެ ފަންނީ ޒިންމާ، ވަގުތުން ވަގުތަށް އަދާ ކުރުމަށް އެދިވަޑައިގަންނަވާ ކަމެވެ.
"ރައްޔިތުންގެ މަޖިލީހުން ބެލި އޮޑިޓްތަކުގެ މައްޗަށް ބިނާކޮށް ކުންފުނިތަކުން ކޮލިފައިޑް އެކައުންޓެންޓުންނާއި މާލީ ފަންނުވެރިން ހޯދައި ކުންފުނިތަކުގެ ގަވަނަންސް އާއި އިންޓާނަލް ކޮންޓްރޯލް ސިސްޓަމް ވަރުގަދަ ކުރަން ޖެހޭ،" ނާޝިޒް ވިދާޅުވި އެވެ.
އޭނާ އިތުރަށް ވިދާޅުވީ ޕްރޮފެޝަނަލް އެކައުންޓެންސީ އޮގަނައިޒޭޝަންގެ ބިލަށް އިސްކަން ދެއްވައި އެ ބިލް ވީހާވެސް އަވަހަށް ފާސް ކުރުމަށް މަސައްކަތް ކޮށްދެއްވާނެ ކަމަށެވެ. އަދި ރާއްޖޭގެ އޮޑިޓިން އަދި އެކައުންޓިން ޕްރޮފެޝަން ތަރައްގީކޮށް ކުރިއެރުވުމުގައި އޮޑިޓަ ޖެނެރަލްގެ އޮފީހުން އިސްނަގައިގެން ކުރަމުން ގެންދާ މަސައްކަތަށް ތައުރީފު ކުރެއްވި އެވެ.
އޮޑިޓާ ޖެނަރަލްގެ އޮފީހުން އިސްނައިގެން 2017 ވަނަ އަހަރުން ފެށިގެން ބާއްވަމުން އަންނަ އެމްއޭއެފް ފޯރަމްއަކީ އިންޑަސްޓްރީގެ ތަޖުރިބާކާރު ބޭފުޅުން މައުލޫމާތުތައް ހިއްސާކޮށް، އެ ދާއިރާގައި މަސައްކަތް ކުރާ މީހުންގެގުޅުން ބަދަހި ކުރަން ބާއްވާ ފޯރަމް އެކެވެ. މި އަހަރުގެ ފޯރަމްގައި ވެސް ދިވެހިންގެ އިތުރުން، ބޭރުގެ ތަޖުރިބާކާރުން ޓެކްނިކަލް ބޭފުޅުން ބައިވެރިވެފައިވެ އެވެ.