ސީޒަން ފެށުމުގެ ކުރިން ފަލަ މަސްގަނޑަށް ލިބުނު އަނިޔާއިން، އެޑެން ހަޒާޑް ރިކާވާވި ނަމަވެސް މެޗު ފިޓްނަސް ނެތުމުން ވިޔަ ރެއާލް އާ ދެކޮޅަށް ކުޅޭ މެޗުން، އޭނާއަށް ފުރުސަތު ނުދޭން ރެއާލް މެޑްރިޑްގެ ކޯޗް ޒައިނުއްދީން ޒިދާން ނިންމައިފި އެވެ.
ޗެލްސީއަށް ބޮޑު އަގެއް ދިނުމަށް ފަހު ރެއާލް މެޑްރިޑުން ގެންދިޔަ ހަޒާޑަށް ލިބުނު އަނިޔާ ގުޅިގެން، އަދި މިހާތަނަށް ރެއާލްގައި ޓީމުން ރަސްމީ އެއްވެސް ފުރުސަތެއް އަދި ނުލިބެ އެވެ.
މިދިޔަ އަންގާރަ ދުވަހާ ހަމައަށްވެސް، ހަޒާޑް ޓީމާއެކު ފަރިތަކުރުން ނުފަށަ އެވެ. އޭނާ ފަރިތަ ކުރަމުން ދިޔައީ ފިޓްނަސް ކޯޗާއެކު ޖިމްގަ އެވެ.
ސްޕެއިންގެ މާކާއިން ބުނެފައި ވަނީ، ހަޒާޑް 100 ޕަސަންޓް ފިޓް ކުރުމަށް ފަހު ނޫނީ އޭނާއަށް ފުރުސަތު ދޭން ޒިދާން ބޭނުން ނުވާ ކަމަށެވެ.
ސީޒަންގެ ކުރީ ކޮޅު ރެއާލް އަށް ވަނީ އަނިޔާގެ މައްސަލަތައް ކުރިމަތި ވެފަ އެވެ. ޕްރީ ސީޒަންގެ ތެރޭގައި ފޯވަޑް މާކޯ އެސެންސިއޯ އަށް ލިބުނު އަނިޔާއާ ގުޅިގެން މުޅި ސީޒަން އޭނާ ވަނީ ގެއްލިފަ އެވެ. މިދިޔަ ހަފުތާގައި އިސްކޯއަށް ވެސް ވަނީި އަނިޔާ ވެފަ އެވެ.
