އަހަރަކަށް އަލްވަދާއު ކިޔައި އާ އަހަރަކަށް މަރުހަބާ ކިޔާ މުނާސަބަތަކީ މާޒީން ލިބުނު އިބްރަތްތަކުގެ އަލީގައި ކުރިމަގު އަލުން ބައްޓަން ކުރަން ލިބޭ އަގުހުރި ފުރުސަތެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ހޯލިހު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ހިޖްރީ އާ އަހަރު ފެށުމުގެ މުނާސަބަތުގައި ރާއްޖޭގެ ރައްޔިތުންނަށް ފޮނުއްވި ތަހުނިޔާގެ ހިތޯބުގަ އެވެ. ހިތޯބު މެދުވެރިކޮށް ރައީސް ވިދާޅުވީ، މިއީ ފަރުދީ ފެންވަރުގައި އާއިލީ ގުޅުންތައް ބަދަހިކޮށް، އިޖްތިމާއީ އެކުވެރިކަމުގެ ތެރެއިން، ގައުމުގެ ހެވާއި ލާބަޔަށް އެންމެން ގުޅިގެން މަސައްކަތް ކުރުމުގެ ޢަޒުމް އާކުރުމަށް ލިބޭ ފުރުސަތެއް ކަމަށެވެ.
"... ގައުމަށްޓަކައި އަޅުގަނޑުމެން މިއަދު ތެދުވާންވީ، ނަބަވީ ހިޖްރައިން އުފައްދައިދިން ފަދަ، އެއް އިހުސާސްތަކެއް ހިއްސާކުރާ، އެއް ހަމަތަކެއް ގަބޫލުކުރާ، އެއް ހައްގުތަކަކަށް ވަކާލާތުކުރާ، އެއް އުންމަތެއްގެ ގޮތުގައި،" ރައީސް ވިދާޅުވި އެވެ.
ހިޖުރައިގެ ހާދިސާ އަށް އަލިއަޅުއްވާލައި ވިދާޅުވީ، ހިޖުރައިގެ ހާދިސާއިން ލިބިދޭ އެންމެ މުހިންމު އެއް ފިލާވަޅަކީ އަނިޔާ އާއި ބޭއިންސާފު ނައްތައިލުމުގައި ސާބިތުވެ ތިބުމުގެ ބޭނުންތެރިކަމާއި އިންސާނީ ކަރާމާތް ދަމަހައްޓާ އިންސާނީ ހައްގުތައް ހިމާޔަތްކުރުމަށް ވަކާލާތު ކުރުމުގެ މުހިންމުކަން ކަމަށެވެ.
އަދި، އިންސާނުންގެ މެދުގައި ތަފާތުކުރުން ނައްތާލައި، ހަމަހަމަކަން ގާއިމްކުރުމަށް ގަދައަޅައި މަސައްކަތްކުރުމާއި ކޮންމެ ކަމެއްގައިވެސް އަދުލުވެރިކަން އިސްކުރުމުގެ މުހިންމު ކަމަކީވެސް ހިޖްރައިގެ ހާދިސާއިން ލިބިދޭ ފިލާވަޅެއްކަމުގައި އެމަނިކުފާނު ވިދާޅުވެފައިވެ އެވެ.