ސަލްމާން ޚާނާއި އާލިއާ ބަޓް ލީޑް ރޯލަށް ލައިގެން ސަންޖޭ ލީލާ ބާންސާލީ "އިންޝާﷲ" ކިޔާ ފިލްމެއް ޑައިރެކްޓް ކުރާކަން އިއުލާން ކުރުމާއެކު ގިނަ ބަޔަކު ވަރަށް އުފަލުން އުޅުނެވެ. ނަމަވެސް ފިލްމު ނުފެށެނީސް ސަލްމާނާއި ބާންސާލީ އާ ދެމެދު މައްސަލަތަކެއް ޖެހި ފިލްމު ވަނީ ހުއްޓިފަ އެވެ.
އަންނަ އަހަރުގެ ކުޑަ އީދުގައި ރިލީޒް ކުރަން ހަމަޖެހިފައި އޮތް ފިލްމު އެ ތާރީޚުގައި ރިލީޒް ނުކުރާނެ ކަމަށް ސަލްމާން ކުރި ޓުވީޓާ ގުޅިގެން މި ފިލްމު ބެލުމުގެ ޝައުގުވެރިކަމުގެ ތިބި ފޭނުންނަށް ވަރަށް ބޮޑު ޝޮކެއް ލިބުނެވެ. ސަލްމާންގެ ޓުވީޓްގައި ބުނެފައިވަނީ ބާންސާލީ އާއެކު ކުޅޭ ފިލްމު ފަހަތަށް ޖައްސާލާފައި ވީ ނަމަވެސް އީދުގައި 2020 ގައި އަންނަ އީދު ދުވަހު އޭނާގެ ފިލްމެއް ރިލިޒް ކުރާނެ ކަމަށެވެ.
ސަލްމާންގެ ޓުވީޓަށް ފަހު ބާންސާލީގެ ޕްރޮޑަކްޝަން ޓީމުން ކުރި ޓުވީޓެއްގައި "އިންޝާﷲ" އުފެއްދުމުގެ މަސައްކަތް ހުއްޓާލާފައިވާ ކަމަށް ބުނެފައި ވެއެވެ. ނަމަވެސް ފިލްމު ހުއްޓާލަން ޖެހުނު ސަބަބެއް އެ ފަރާތުން ވެސް ބުނެފައެއް ނުވެ އެވެ.
ބައެއް މީހުން ބުނަނީ ފިލްމު ހުއްޓާލީ ޑެއިޒީ ޝާހް ފަދަ ބައެއް ބަތަލާއިން އެ ފިލްމުގައި ބައިވެރި ކުރަން ސަލްމާން އެދުމުން ބާންސާލީ އެކަމާ ދެކޮޅު ހަދައި ދެ މީހުންގެ މެދުގައި ވީ ދެބަސް ވުމެއްގެ ސަބަބުން ކަމަށެވެ.
މި ފިލްމާ ގުޅޭ އެންމެ ފަހުގެ ޚަބަރުތައް ބުނާ ގޮތުގައި ސަލްމާންގެ ބަދަލުގައި ރިތިކް ރޯޝަން ލީޑް ރޯލަށް ލައިގެން ފިލްމު އުފައްދަން ބާންސާލީ މިހާރު ވަނީ ނިންމާފަ އެވެ.
އިންޑިއާގެ ނޫހަކުން ބުނި ގޮތުގައި ބާންސާލީ ވަނީ ރިތިކް އާ ބައްދަލުކޮށް މި ފިލްމާ ގުޅޭ ގޮތުން މަޝްވަރާ ތަކެއް ކޮށްފަ އެވެ. އަދި ކުރިޔަށް އޮތް ދުވަސްތަކުގައި ފިލްމު އަލުން އިއުލާން ކުރާނެކަމަށް ބެލެވެ އެވެ. ރިތިކް އާއެކު ފިލްމު ފަށައިފިނަމަ މިއީ ރިތިކް އާއި އާލިއާގެ ޖޯޑު ސްކްރީނުން އެކުގައި ފެންނަ ފުރަތަމަ ފިލްމަށް ވާނެ އެވެ.
ފިލްމު އަލުން ފަށައިފިނަމަ ބަތަލާ އާލިއާ އަށް ވެސް ވަރަށް ބޮޑު ހިތްހަމަޖެހުމެއް ލިބޭނެ އެވެ. ބާންސާލީގެ ފިލްމުގައި މަސައްކަތް ކުރާހިތުން އާލިއާ ވަނީ އާމިރު ޚާނާއެކު ކުޅެން ލިބުނު ފިލްމެއް ވެސް ދޫކޮށްލާފަ އެވެ.