ލ. ގަމުގެ ގެއެއްގެ ތެރޭގައި ހަދާފައި ހުރި މަސް ފެންގަނޑަކަށް، އުމުރުން ދެ އަހަރުގެ ކުޑަކުއްޖަކު ވެއްޓި، ހާލު ސީރިއަސް ވެގެން ފަރުވާދޭން ފަށައިފި އެވެ.
ފުލުހުން ބުނީ މި ހާދިސާގެ މައުލޫމާތު ލިބިފައިވަނީ މިއަދު ހަވީރު 3:30 ހާއިރު ކަމަށެވެ. ގެއެއްގެ ތެރޭގައި ހަދާފައިވާ މަސްފެންގަނޑަށް ވެއްޓިފައިވަނީ އެ ގޭގައި ދިރިއުޅެމުންދިޔަ ފިރިހެން ކުއްޖެކެވެ.
އެ ކުއްޖާގެ ހާލަތާއި ގުޅޭގޮތުން ފުލުހުން ބުނީ މި ހާދިސާއާ ގުޅިގެން އެ ކުޑަކުއްޖާ، ލ. ގަމު ހޮސްޕިޓަލަށް ގެންގޮސް ފަރުވާދޭން ފަށާފައިވާ ކަމަށާއިއެ ކުއްޖާގެ ހާލު ސީރިއަސް ކަމަށެވެ. އަދި އެ މައްސަލައާ ގުޅިގެން ބަލަންޖެހޭ ކަންކަން މިހާރު ބަލަމުންދާ ކަމަށް ފުލުހުން ބުންޏެވެ.
ގަން ރީޖަނަލް ހޮސްޕިޓަލްގެ މެނޭހާ އަލީ ނަޝީދު "އަވަސް"އާށް ވިދާޅުވީ އެކުއްޖާ މިވަގުތު އޮތީ އައިސީޔޫގައި ވެންޓިލޭޓަރެއްގެ އެހީގައި ކަމަށާއި އެހެންކަމުން މިރޭ 10:30 ހާއިރު މާލެ ފޮނުވާލަން ހަމަޖެހިފައިވާ ކަމަށެވެ.
"މޯލްޑިވިއަންގެ ފްލައިޓުގައި ފޮނުވާލަން ހަމަޖެހިފަ މިހާރު ވަނީ. 10:30 ގައި މިކޮޅުން ފުރާނެ،" ނަޝީދު ވިދާޅުވި އެވެ.
ފޮޓޯއިން ފެންނަގޮތުގައި ކުޑަކުއްޖާ ވެއްޓުނު ފެންގަނޑަކީ މަސް ގެންގުޅުމަށް ހަދާފައިވާ ފުދޭވަރަކަށް ބޮޑު ފެންގަނޑެކެވެ. އެޅިގަލުން ރާނައިގެން ހަދާފައިވާ މަސްފެންގަނޑު ކޮންމެވެސް ވަރަކަށް ފުންކަމަށްވެސް ބެލެވެއެވެ.