ލ. ގަމުގައި ކުއްޖަކު ރަހީނުކޮށްގެން ގެންގޮސް، އަނިޔާކޮށް ބަރަހަނާކޮށް ވީޑިއޯ ނަގައި މަރުގެ އިންޒާރުދިން މައްސަލައެއް ފުލުހުން ބަލަން ފަށައިފި އެވެ.
އެ ކުއްޖާގެ މަންމަ ސޯޝަލް މީޑިއާގައި ކުރި ޕޯސްޓެއްގައި ބުނި ގޮތުގައި އެ ކުއްޖާ ރަހީނުކޮށްގެން ގެންގޮސް އެ އަމަލު ހިންގީ އެ އުމުރު ފުރައިގެ ކުދިންތަކެކެވެ.
ދަރިފުޅަށް އަނިޔާދިނީ އެ ކުއްޖާ ގޭގައި ނިދާފައި އޮއްވައި، ކުޑަދޮރުން ކޮޓަރީގެ ތެރެއަށް ވަދެ، ބިރު ދައްކައިގެން ގެންދިއުމަށްފަހު ކަމަށްވެސް އެ ކުއްޖާގެ މަންމަ ބުނެފައިވެ އެވެ.
"ރުއްގަނޑެއްގެ ތެރެއަށް ވައްދައި އޮރިޔާންކޮށް ދަނޑިބުރިއަކުން ތަޅާ ވީޑިއޯކުރުމަށް ފަހު، ރުފިޔާ ނުދީފި ނަމަ ލީކުކޮށްލާނެ ކަމަށް ބުނެ ބްލެކްމެއިލް ކުރި،" ކުއްޖާގެ މަންމަ ބުންޏެވެ.
ކުއްޖާގެ މަންމަ ބުނި ގޮތުގައި މިއީ ކުއްޖޭ ނުވައެއްގައި އުޅޭ ކުއްޖަކު އިސްވެ ހުރެ ގްރޫޕަކުން ހިންގި އަމަލެކެވެ.
"މިއީ ގުރޭޑް 9 ގައި އުޅޭ "ކުއްޖެއް" އިސްވެ ހުރެ ގްރޫޕަކުން ހިންގި އަމަލެއްވީމާ މިފަހަރުވެސް އޮންނާނީ އޭނާގެ ހައްގެވެ. އަޅުގަނޑުގެ ދަރިފުޅަށް އިންސާފު ހޯދާނީ ކިހިނެތް ހެއްޔެވެ.؟" ކުއްޖާގެ މަންމަ ބުނެފައިވެ އެވެ.
މިކަމާ ގުޅިގެން ފުލުހުން ބުނީ ސޯޝަލް މީޑިއާއިން އެކަން ފުލުހުންގެ ސަމާލުކަމަށް އައިސްފައިވާ ކަމަށެވެ.
ކަމާ ގުޅުންހުރި އިދާރާތަކާ ގުޅިގެން މިކަމާގުޅޭ މައުލޫމާތު ހޯދުމުގެ މަސައްކަތް ކުރަމުންދާ ކަމަށްވެސް ފުލުހުން ވަނީ ބުނެފަ އެވެ.