"ބަޖްރަންގީ ބައިޖާން" ރިލީޒްކުރުމުގެ ކުރިންވެސް މިފިލްމަކީ މިއަހަރުގެ ނިކުންނަން ހުރި ފިލްމުތަކުގެ ތެރެއިން އެންމެ ގިނަބަޔަކު އިންތިޒާރު ކުރަމުން އައި އެއް ފިލްމެވެ.
ސަލްމާން ޚާނާއި ކަރީނާ ކަޕޫރު ލީޑްރޯލުން ފެނިގެންދާ މިފިލްމު ރިލީޒްކުރެވުމާއިއެކު އަންނަނީ ރެކޯޑަކަށް ފަހު ރެކޯޑެއް މުގުރައި، ބޮކްސް އޮފީސް ފަތަހަކުރަމުންނެވެ. އެންމެފަހުން މިފިލްމުން މިވަނީ މިދިޔަ އަހަރު ނިކުތް އާމިރް ޚާންގެ "ޕީކޭ" އަށްފަހު 300 ކްރޯޑް ކުލަބަށް ދެވަނައަށް ވަން ހިންދީ ފިލްމުގެ ލަގަބު ހޯދާފަ އެވެ.
މިދިޔަ މަހުގެ 17ވަނަ ދުވަހު ފިތުރު އީދާއި ދިމާކޮށް ރިލީޒްކުރި މިފިލްމުގެ ދުވެލި އަދިވެސް މަޑުޖެހުމެއްނެތި ބޮކްސް އޮފީހުގައ ކުރިއަށް ދާއިރު، 300 ކްރޯޑް އިންޑިއާގެ މާކެޓުން އެކަނި ލިބިގެން މިކްލަބަށް ވަދެފައިވަނީ ފިލްމު ރިލީޒްކުރިތާ 20ވަނަ ދުވަހުގަ އެވެ.
މިދިޔަ ޑިސްމަބަރު މަހުގެ 19ވަނަ ދުވަހު ރިލީޒްކުރި އާމިރްގެ "ޕީކޭ" އެންމެ ފުރަތަމަ 300 ކްރޯޑް ހޯދި ފިލްމުގެ ރެކޯޑް މުގުރާލާފއިވަނީ ރިލީޒްކުރިތާ އެންމެ 17 ދުވަހުގެ ތެރޭގަ އެވެ.
ބޮލީޑްގެ ފިލްމުތަކަށް 100 ކްރޯޑް، 200 ކްރޯޑް އަދި 300 ކްރޯޑް އެންމެފުރަތަމަ ހޯދާފައި އާމިރް ޚާންގެ ފިލްމުތަކުންނެވެ. އެގޮތުން 100 ކްރޯޑް އާމިރްގެ "ގަޖްނީ" އަސް ލިބިގެން 100 ކްރޯޑްގެ ބާނީ އަށް އޭނާ ވަނީ ވެގެންގޮސްފަ އެވެ. އޭގެފަހުން ހިންދީ ފިލްމަކަށް 200 ކްރޯޑްވެސް އެންމެ ފުރަތަމަ ލިބިގެން ގޮސްފައިވަނީ އާމިރްގެ "ތްރީ އިޑިއަޓްސް' އަށެވެ. އެއަށްފަހު މިދިޔަ އަހަރު ރިލީޒްކުރި "ޕީކޭ" އާއިއެކު އާމިރް އާ ރެކޯޑެއް ގާއިމްކޮށްފައިވާއިރު، "ބަޖްރަންގީ ބައިޖާން" ރިލީޒްކުރުމުގެ ކުރިން ގިނަ ބަޔަކު ވަނީ މިފިލްމަށް "ޕީކޭ"ގެ ރެކޯޑް މުގުރާލެވޭނެ ކަމާއި މެދު ޝައްކު ކަމަށް ބުނަމުންނެވެ.
"ބަޖްރަންގީ ބައިޖާން' އަށް މި ތާރީހީ ކާމިޔާބީ އާއި ހަމައަށް އާދެވިއްޖެކަން ޓްވިޓާގައި ޓްރޭޑް އެނަލިސްޓް ޖޮޖެންދަރު ތުތޭޖާ ވަނީ ޔަގީންކޮށްދީފަ އެވެ.
ތުތޭޖާ ކުރި ޓްވީޓްގައި ވަނީ "ޕީކޭ"އަށްފަހު 300 ކްރޯޑް ހޯދި ދެވަނ ފިލްމުގެ ލަގަބު "ބަޖްރަންގީ ބައިޖާން' އިން ހޯދައިފިކަމަށާއި ގިނަަބަޔަކު އުންމީދުކޮށްގެން ތިބީ މިރެކޯޑް "ޕްރޭމް ރަތަން ދަން ޕާޔޯ"ގެ ކުރިން މުގުރައިނުލެވޭނެ ކަމަށެވެ.
ޑައިރެކްޓަރު ކަބީރް ޚާންގެ "އޭކް ތަ ޓައިގާ" އާއި "ބަޖްރަންގީ ބައިޖާން" އަށް ބްލޮކްބަސްޓާގެ ލަގަބު ލިބިފައިވާއިރު، މިހާރު ރިލީޒްކުރުމަށް ތައްޔާރު ވަމުންދާ ކަބީރްގެ "ފެންޓަމް" އަށް މިރެކޯޑް ސިލްސިލާ ގާއިމްކުރެވޭތޯ ގިނަބަޔަކު ތިބީ ބަލާށެވެ.
ސަލްމާން އާއި ކަރީނާގެ އިތުރުން ހަރްޝާލީ މަލްހޯތުރާ އާއި ނަވާޒުއްދީން ސިއްދީގީ މުހިންމު ރޯލުން ފެނިގެންދާ މިފލްމުން ވަނީ ރިލީޒްކުރި ދުވަހު އެންމެބޮޑު އާމްދަނީއެއް ހޯދުމުގެ އިތުރުން ފިލްމު ރިލީޒްކުރިތާ ތިން ދުވަސްތެރޭގައި 100 ކްރޯޑް (1000 މިލިއަން) ލިބިފަ އެވެ. އަދި 10 ދުވަސްތެރޭގައި 240 ކްރޯޑަށް ވުރެން ގިނައިން ހޯދައިގެން މިއަހަރުގެ މިހާތަނަށް އެންމެ ބޮޑު އާމްދަނީ އެއް ހޯދައި އަހަރުގެ އެންމެ ބޮޑު ބްލޮކްބާސްޓާގެ ޝަރަފު ވެސް ހޯދާފަ އެވެ.
އިންޑިއާ އާއި ޕާކިސްތަނާއެކު ޖުމްލަ 50 ގައުމެއްގައި މިފިލްމު ދައްކަމުން އަންނައިރު، ދުނިޔޭގެ މާކެޓުން މިފިލްމަށް ލިބުނު އާމްދަނީ އާއިއެކު މިހާރު ވަނީ 545 ކްރޯޑަށް ވުރެން ގިނައިން ލިބިގެން ގޮސްފަ އެވެ.
ކޮންމެގޮތެއް ވިޔަސް "ޕީކޭ"ގެ ރެކޯޑް "ބަޖްރަންގީ ބައިޖާން" އަށް މުގުރައި ނުލެވޭނެ ކަމަށް ބުނަމުން އައި ނަމަވެސް. މވަނީ "ޕީކޭ" ރިލީޒްކުރިތާ ހަމަސް ފަހުން 300 ކްރޯޑް ކްލްބަށް ދެވަނަ އަށް ވަން ފިލްމުގެ ލަގަބާއިއެކު ތާރީހުގެ ތެރެއަށް ވަދެގެން ގޮސްފަ އެވެ.
ލަފާކުރެވޭ ގޮތުގައި ސިނަމާތަކުން މިފިލްމު ނެގުމާއި ހަމައަށް މަދުވެގެން 600 ކްރޯޑް (100 މިލިއަން ޑޮލަރު) ލިބޭނެ ކަމަށް ލަފާކުރެވެ އެވެ. ނަމަވެސް "ޕީކޭ"އަށް ލިބުނު ޖުމްލަ އާމްދަނީ މިފިލްމަށް ލިބޭނެ ކަމާއި މެދު ޝައްކެވެ.