ސުޕަސްޓާ ސަލްމާން ޚާނަކީ މަދުން ނަމަވެސް އޭނާ ކުޅޭ ފިލްމުތަކަށް ލަވަ ކިޔައިދޭ ތަރިއެކެވެ. ނަމަވެސް މިފަހަރު ސަލްމާން ވަނީ އޭނާގެ ފިލްމު އުފައްދާ ކުންފުނިކަމަށްވާ "ސަލްމާން ޚާން ފިލްމްސް" އިން ޕްރޮޑިއުސްކުރާ "ހީރޯ"ގެ ތީމް ލަވަ ކިޔައިދީފަ އެވެ.
ބޮލީވުޑަށް މުޅިންް އަލަށް ތައާރަފުވާ އެކްޓަރު އަދިތްޔަ ޕަންޗޯލީ އާއި ޒަރީނާ ވައްހާބް ގެ ފިރިހެން ދަރިފުޅު ސޫރަޖް ޕަންޗޯލީ އާއި ކުރީގެ މަޝްހޫރު ތަރި ސުނިލް ޝެޓީގެ އަންހެން ދަރިފުޅު އާތިޔާ ޝެޓީ ލީޑްރޯލުން ފެނިގެންދާ މިފިލްމުގެ ތީމް ލަވަަ ރިލީޒްކުރުމަށް ހަމަޖެހިފައި އޮތް ދުވަހުގެ އެއް ދުވަސް ކުރިން ވަނީ މިލަވައަށް ލިބެމުން އައި ޑިމާންޑްގެ ސަބަބުން އާންމުކޮށްފަ އެވެ.
މީގެ ދެދުވަސްކުރިން ރިލީޒްކޮށްފައިވާ މިލަވައިގެ ޓީޒާއަށް ލިބެމުން އައި ތަރުހީބު ބޮޑުކަމުން ލަވަ އާންމުކޮށްފައިވާކަން ލަވަކިޔައިދީފައިވާ ސަލްމާން، އޭނާގެ ޓްވިޓާގަ އެވެ.
މިއަހަރު ނިކުތް އެންމެ އަސަރުގަދަ ލޯބީގެ ގޮތުގައި ސިފަކޮށްފައިވާ "މޭ ހޫން ހީރޯ ތެރާ" މިލަވަ ކޮމްޕޯޒްކޮށްފައިވަނީ އަމާލް މަލިކް އެވެ.
"ހީރޯ" އަކީ 1983ވަނަ އަހަރު ހަމަ މިނަމުގައި ނެރުނުވު ޑައިރެކްޓަރު ސުބާޝް ގާއީގެ ފިލްމުގެ އަސްލަކަށް ބަލައިގެން ޑައިރެކްޓަރު ނިކިލް އަދަވާނީ ޑައިރެކްޓްކޮށް، ސަލްމާން އާއި ސުބާޝް ގާއީ ޕްރޮޑިއުސްކުރާ ފިލްމެކެވެ.
އާތިޔާ އާއި ސޫރަޖްގެ އިތުރުން އަދިތްޔަ ޕަންޗޯލީ އާއި ތިގްމަންޝޫ ދުލިޔާ މުހިންމު ރޯލުން ފެނިގެންދާ މިފިލްމު ރިލީޒްކުރުމަށް ހަމަޖެހިފައިވަނީ ސެޕްޓެމްބަރު މަހުގެ 11 ވަނަ ދުވަހު އެވެ.
މިފިލްމުގެ ފުރަތަމަ ޕޯސްޓަރު އާންމުކުރުމާއިއެކު ވެސް ގިނަ ބަޔަކު ވަނީ ސޫރަޖް އާއި އާތިޔާގެ ފޮޓޯއަށް ތައުރީފުކޮށްފަ އެވެ.
ސަލްމާން ވަނީ މީގެކުރިން މިދިޔަ އަހަރު ނިކުތް ބްލޮކްބާސްޓާ ފިލްމު "ކިކް"ގެ "ހޭންގްއޯވާ" ލަވަ އާއި އޭގެކުރިން ރިލީޒްކުރި ދެފިލްމެއްކަމަށްވާާ "ވޯންޓެޑް" އާއި "ހެލޯ ބްރަދާ" އަށް ވެސް ލަވަކިޔައިދީފަ އެވެ.