އދ. ގެ އާންމު މަޖިލީހުގައި ރާއްޖޭގެ ރައީސަކު ތަގުރީރު ނުކުރައްވާތާ އަހަރުތަކަކަށް ފަހު، ރައީސް ސޯލިހު ތަގުރީރު ކުރެއްވުމުން، ރައީސް ޔާމީން ސަރުކާރުގެ އެންވަޔަރަމަންޓް މިނިސްޓަރު ތޯރިގު އިބްރާހިމް، ރައީސް އިބްރާހިމް މުހައްމަދު ސާލިހަށް ތައުރީފު ކުރައްވާ ދެއްކެވި ވާހަކަތަކަށް، ޕީޕީއެމްގެ ޕީޖީ ލީޑަރު އަހުމަދު ޝިޔާމް ރައްދު ދެއްވައިިފި އެވެ.
އދ. ގެ 74 ވަނަ އާންމު މަޖިލީހުގައި ރައީސް ސޯލިހު ތަގުރީރު ކުރައްވާފައި ވަނީ އެ މަޖުލީހުގައި ރާއްޖޭގެ ރައީސަކު ތަގުރީރު ނުކުރައްވާތާ ހަ އަހަރަށް ފަހު އެވެ.
ކުރީގެ މިނިސްޓަރު ތޯރިގު ވިދާޅުވީ އަހަރުތަކަކަށްފަހު، އދ. ގެ އާންމު މަޖިލީހުގައި ރާއްޖޭގެ އެންމެ އިސްވެރިޔަކު ތަގުރީރު ކުރެއްވުމަކީ ލިބުނު ވަރަށް ބޮޑު އުފަލެއް ކަމަށެވެ. އަދި އެއީ ދިވެހިންނަށް ލިބުނު ޝަރަފެއްގެ ގޮތުގައި ތޯރިގު ސިފަ ކުރެއްވި އެވެ.
މީގެ އިތުުރުން ރައީސްގެ ތަގުރީރުގައި މޫސުމީ މައްސަލަތަކަށް ވަރަށް ބޮޑަށް އަލިއަޅުވާލައްވާފައިވާތީ އެކަންވެސް އޭނާ ވަނީ ފާހަގަ ކުރައްވާފައި ވެއެވެ.
އޭގެ ފަހުން ތޯރިގު ޓެގް ކުރައްވާ، ޝިޔާމު ކުރެއްވި ޓްވީޓެއްގައި ވިދާޅުވީ ރައީސް ޔާމީންގެ މައްޗަށް ކުރާ ދައުވާގެ ޝަރީއަތުގެ މަޖިލީހުގައި ރައީސް ޔާމީން ދައްކަވާ ސާބިތުކަމަށްޓަކައި ފަޚުރުވެރިވާ ކަމަށެވެ. އަދި ރައީސް ޔާމީނަކީ ވަރުގަދަ ލީޑަރެއްކަން ފާހަގަ ކުރައްވާ ތިމާވެށި ނުވަތަ މޫސުމީ މައްސަލަތަކުގައި ވެސް ރައީސް ޔާމީން ކޮށްދެއްވި ވަރާ ގާތަށްވެސް "ޑެލިވާ" ކުރެއްވި ލީޑަރަކު ނެތްކަން ރައްޔިތުން ހެކިވާނެ ކަމަށެވެ.
"ޓޮޕިކަކީ ތިމާވެށި ކަމުގައި ވިޔަސް، ރައީސް ޔާމީން ކޮށްދެއްވި ވަރާ ގާތަށް ޑެލިވާ ކުރެއްވި ވެރިއަކު ނެތްކަން ދިވެހި ރައްޔިތުން ހެކިވާނެ." ކުރީގެ މިނިސްޓަރު ތޯރިގަށް ޓެގް ކުރައްވާ ޝިޔާމް ކުރެއްވި ޓްވީޓްގައި ވިދާޅުވި އެވެ.
ރައީސް ސޯލިހު ރޭ ވިދާޅުވީ މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ނުރައްކާތަކުން ސަލާމަތްވުމަށް ބައިނަލްއަގުވާމީ ފެންވަރުގައި އެކަށީގެންވާ ފިޔަވަޅުތަކެއް މިހާތަނަށް ވެސް އެޅިފައި ނުވުމަކީ ކަންބޮޑުވާ ކަމެއް ކަމަށެވެ.
އަދި، މޫސުމަށް އަންނަ ބަދަލުތަކުގެ ނުރައްކާ ކުޑަ ކުރުމަށް ފާއިތުވި 30 އަހަރު ރާއްޖެއިން ވަކާލާތުކޮށްފައި ވަނީ މޫސުމަށް އަންނަ ބަދަލުތަކުގެ ސަބަބުން ރާއްޖެ ފަދަ ކުދި ގައުމުތައް ނެތިދިއުމުގެ ބިރު އޮތް މިންވަރު ބޮޑުކަމުން ކަމުގައި އެމަނިކުފާނު ވިދާޅުވިއެވެ.
"ދިވެހިރާއްޖޭގެ ސަރަހައްދުގެ 99 ޕަސެންޓަކީ ކަނޑު. ހިކިފަސްތަނަކީ ޕަސެންޓެއްގެ މިންވަރު. މި ސަބަބާއި ގުޅިގެން ދިވެހިން ވެފައި ވަނީ ކަނޑުގެ ބޮޑު ދައުލަތަކަށް." ރައީސް ވިދާޅުވިއެވެ.
ރައީސް ވިދާޅުވީ ރާއްޖެއަށް ޒިޔާރަތްކުރުމުން ދިވެހިންގެ ދިރިއުޅުމުގެ ނާޒުކުކަން ހާމަވެގެންދާނެ ކަމަށެވެ.