ބޮލީވުޑްގެ ގިނަ ބަތަލާއިންނެކޭ އެއްގޮތަށް މަޝްހޫރު ތަރި ސޯނަމް ކަޕޫރު ވެސް އަވަހަށް ކައިވެނިކުރުމުގެ ވިސްނުމެއް ނުގެންގުޅެ އެވެ.
އުމުރުން 30 އަހަރުގެ ސޯނަމް ދެކޭ ގޮތުގައި ކައިވެނިކޮށްގެން ޒަވާޖީ ހަޔާތެއް ފެށުމަށްވުރެން ހުސްހަށިބަޔަށް ހުރުމުން އޭނާގެ ދިރިއުޅުން މާ އުފާވެރި އެވެ.
އިންޑިއަން ބްރައިޑަލް ފެޝަން ވީކްގައި މަޝްހޫރު ދެ ޑިޒައިނަރުން ކަމަށްވާ އަބޫ ޖާނީ އާއި ސަންދީޕް ކޯސްލާ ޑިޒައިންކޮށްފައިވާ ކައިވެނީގެ ހެދުންތައް ދައްކާލުމަށް ރޭމްޕްގައި ހިނގާލުމަށްފަހު ބޮލީވުޑްގެ ފެޝަނިސްޓާގެ ގޮތުގައި މަޝްހޫރުވެފައިވާ ސޯނަމް ވަނީ ކައިވެނި ނުކޮށް ހުންނަން މާ އުފާވެރިކަމަށާއި، އޭނާ ކުރެން ކައިވެނިކުރަނީ ކޮން އިރަކުން ތޯ ކޮންމެ މީހަކު އަހާތީ އެކަމާ ހިތްހަމަނުޖެހޭ ކަމަށް ބުނެފަ އެވެ.
އިތުރަށް މިޝޯގައި ދައްކާލި ހެދުމާއި ބެހޭގޮތުން ސޯނަމްވަނީ މިދެޑިޒައިނަރުން ޑިޒައިންކޮށްފައިވާ ކުރީ ޒަމާނުގެ ކައިވެނީގެ ހެދުމެއް އަޅާލަން ލިބުމަކީ އުފަލެއް ކަމަށް ބުނެފަ އެވެ.
"ކުރީ ޒަމާނެއްގެ ކައިވެނީގެ ހެދުމެއް އެޅުމަކީ އަހަރެން ދެކެމުން އައި ހުވަފެނެއް" އަބޫ ޖާނީ އާއި ސަންދީޕް ކޯސްލާ ޑިޒައިންކޮށްފައިވާ ހެދުމެއްގައި ހިނގާލުމަކީ ލިބުނު ވަރަށް ބޮޑު ހިތްހަމަޖެހުމެއްކަމަށް ބުނަމުން ސޯނަމް ބުންޏެވެ.
މިދިޔަ އަހަރު ނިކުތް "ހޫބްސޫރަތް" އިން ޕާކިސްތާނުގެ އެކްޓަރު ފަވަދު ޚާން އާއިއެކު އެންމެފަހުން ފެނިގެންގޮސްފައިވާ ސޯނަމް ދެން އެންމެ އަވަހަށް ފެނިގެންދަނީ ސަލްމާން ޚާނާ އެކު "ޕްރޭމް ރަތަން ދަން ޕާޔޯ" އިންނެވެ.އެެއަށްފަހު ނީރްޖާ ބެނޮޓްގެ ހަޔާތުގެ މައްޗަށް ކުޅޭ "ނީރްޖާ" އިންނެވެ.
އިންޑިއަން ބްރައިޑަލް ފެޝަން ވީކްގައި ބޮލީވުޑްގެ މަޝްހޫރު ގިނަ ޑިޒައިނަރުންގެ ހެދުންތައް ވަނީ ދައްކާލާފަ އެވެ.