އާއިލީ އަދުލުގެ ނިޒާމް ހަރުދަނާކޮށް ނިޒާމަށް ގެންނަންޖެހޭ ބަދަލުތަކާ ގުޅޭގޮތުން މަޝްވަރާ ކުރަން މަހާސިންތާއެއް ފަށައިފި އެވެ.
ޖުޑީޝަލް އެކެޑަމީ އާއި ޔުނިސެފް މޯލްޑިވްސްއާއި ފެމިލީ ކޯޓާއި ފެމިލީ ލީގަލް ކްލިނިކް ގުޅިގެން "ޖުޑީޝަލް ސިމްޕޯޒިއަމް އޮން ފެމިލީ ޖަސްޓިސް" ގެ ނަމުގައި ބަނޑޮސް މޯލްޑިވްސްގައި މިއަދު ފެށި މަހާސިންތާ އިފްތިތާހު ކޮށްދެއްވީ އުއްތަމަ ފަނޑިޔާރު ޑރ. އަހމަދު އަބްދުﷲ ދީދީ އެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނީ އެ މަަހާސިންތާ އަންނަ ހޯމަ ދުވަހާ ހަމަޔަށް ކުރިޔަށް ދާނެ ކަމަށާއި މަހާސިންތާގައި ފެމިލީ ޖަސްޓިސްގެ ނިޒާމާގުޅޭ ގޮތުން ހަތަރު ކީ ނޯޓް ލެކްޗަރާއިން ދެއްވަނެ ކަމަށެވެ. ކީ ނޯޓް ލެކްޗާ ދެއްވާނީ ބަންގްލަދޭޝްގެ ސުޕްރީމް ކޯޓުގެ ފަނޑިޔާރު ޖަސްޓިސް މުހައްމަދު އީމާން އަލީ އާއި ޔުނިސެފުން ރާއްޖެއަށް ކަނޑައަޅުއްވައިފައިވާ ރެޒިޑެންޓް ކޯޑިނޭޓާ ޑރ. މުނީރު ސަފީލްދީން އާއި، ޕާކިސްތާނުގެ ކެރިއާ ޖަޖް އަދި ފެޑެރަލް ޖުޑީޝަލް އެކެޑަމީގެ ޑިރެކްޓާ ފާހާރު ޒަމާން އަދި ތުރުކީގެ ފަސްޓް ކްލާސް ޖަޖް ޒޭނެޕް ކުރްނާޒެވެ.
ކޯޓުތަކާއި އެޓާނީ ޖެނެރަލްގެ އޮފީހާއި، ގުޅުން ހުރި މިނިސްޓްރީތަކާއި، މަދަނީ ޖަމްއިއްޔާތައް ހިމެނޭ ގޮތުން 10 ކަރުދާސް ހުށަހަޅާނެ އެވެ. އަދި ސަރުކާރުން އާއިލީ އަދުލުގެ ނިޒާމް އިސްލާހު ކުރުމަށް ހުށަހަޅާ ކަންކަމާގުޅޭ ގޮތުން މަޝްވަރާކޮށް ހިޔާލު ބަދަލުކުރުމުގެ ސެޝަނެއް ވެސް ކުރިއަށް ގެންދާނެ އެވެ.