ޝާހްރުކް ޚާން އާއި ކާޖޮލްގެ މަޝްހޫރު ރޮމޭންޓިކް ފިލްމު "ދިލްވާލޭ ދުލްހަންޔާ ލޭޖާއެނގޭ" ރިލީޒްކުރިތާ 20 އަހަރު ފުރުމާއި ގުޅިގެން ޖަޕާނުގެ އޮސާކާގައި އޮންނަ ފިލްމު ފެސްޓިވަލްއެއްގައި ދައްކާލާގޮތަށް ހަމަޖެހިއްޖެ އެވެ.
އޮސާކާގައި ހުންނަ ނޭޝަނަލް މިއުޒިއަމް އޮފް އެތްނޮލޮޖީގެ ސައުތް އޭޝިއަން ގެލެރީގައި މިފިލްމު ރިލީޒްކުރިތާ 20އަހަރު ފުރުމާއި ދިމާކޮށް އެޅުވުމަށް ހަމަޖެހިފައިވާ ކަމަށް މިފިލްމު އުފެއްދާފައިވާ ޔާޝް ރާޖް ފިލްމްސް އިން ނެރުނު ބަޔާނެއްގައިވެ އެވެ.
އެބަޔާނުގައި އިތުރަށް ބުނެފައިވަނީ މެދުކެނޑުމެއްނެތި ގާތްގަނޑަކަށް ވިއްސަކަށް އަހަރު ދައްކަމުން އަންނަ މިފިލްމު ރިލީޒްކުރިތާ 20 އަހަރު ފުރުމާއި ދިމާކޮށް ޖަޕާނުގައި ދެއްކުމަށް ނިންމުމާއ ގުޅިގެން މިފުލްމުން އަނެއްކާވެސް މުޅިން އާ ލަޑުދަނޑި އެއް ހާސިލްކޮށްފި ކަމަށެވެ.
މިފިލްމު ރިލީޒްކޮށްފައިވަނީ އޮކްޓޯބަރު 19، 1995ގަ އެވެ.
މި މިއުޒަިއަމްގެ ސައުތް އޭޝިއަން ގެލެރީ އަލުން ހުޅުވުމާއި ދިމާކޮށް އިންޑިއާގެ ފިލްމުތައް ދައްކާލުމަށް ހާއްސަކޮށް އޮންނަ މިއިވެންޓްގައި "ދިލްވާލޭ ދުލްހަންޔާ ލޭޖާއެނގޭ" ދެއްކުމަށް ހަމަޖެހިފައިވަނީ ޖަޕަނީޒް ސަބްޓައިޓްލް އާއިއެކު އެވެ. އަދި މިއީ މިފެސްޓިވަލްގައި ދައްކާލުމަށް ހަމަޖެހިފައިވަނީ އެންމެ ހިންދީ ފިލްމަކށް ވެފައި، މިފިލްމު ހޮވިފައިވަނީ މިއީ މިހާތަނަސް ހިންދީ ފިލްމަކަށް އުފެއްދި އެންމެ މަގުބޫލު ފިލްމަށް ވާތީ އެވެ.
އިނގިރޭސި ވިލާތުގައި ދިރިއުޅޭ ދެޒުވާނަކު ޔޫރަޕަށް ކުރާ ދަތުރެއްގައި ބައްދަލުވެ، އެކަކު އަނެކަކު ދެކެ ލޯބިވެގެން ހިނގާ ހާދިސާތަކެއް ދައްކުވައިދީފައިވާ މިފިލްމު ޑައިރެކްޓްކޮށްފައިވަނީ އަދިތްޔަ ޗޯޕްޅާ އެވެ.
ޝާހްރުކް އާއި ކާޖޮލްގެ އިތުރުން ކުރީގެ މަޝްހޫރު ތަރި އަމްރިޝް ޕޫރީ އާއި ފަރީދާ ޖަލާލް އަދި އަނޫޕަމް ކޭރް ވެސް މުހިންމު ރޯލުތަކުން ފެނިގެންދެ އެވެ.