މިފަހުން ރިލީޒްކުރި ދެފިލްމު ކަމަށްވާ "ބާހޫބާލީ" އާއި "ބަޖްރަންގީ ބައިޖާން" އަށް ބޮޑު ތަރުހީބެއް ލިބި، ބޮކްސް އޮފީސް ފަތަހަކޮށްފައިވުމުން ރިލީޒްކުރުން ފަސްކުރި "ބަންގިސްތާން" ބެލުންތެރިންނަށް ކަމަކުނުދިޔަ އެވެ.
ރިތޭޝް ދޭޝްމުކް އާއި ޕުލްކިތް ސަމްރާތްގެ އިތުރުން ޖެކުއަލީން ފާނެންޑޭޒް ލީޑްރޯލުން ފެނިގެންދާ މިފިލްމު ހުކުރުދުވަހު ރިލީޒްކޮށްފައިވާއިރު، ފުރަތަމަ ދުވަހު މިފިލްމަށް ލިބިފައިވަނީ 1.05 ކްރޯޑް (10.5 މިލިއަން) ރުޕީޒް އެވެ.
މިފިލްމު ރިލީޒްކުރުމުގެ ކުރިން އާންމުކޮށްފައިވާ ޓްރެއިލާ އާއި ފިލްމު ޕްރޮމޯޓްކުރުމުގެ ގޮތުން ކުރިއަށް ގެންދިޔަ އާދަޔާ ހިލާފު އުކުޅުތަކުގެ ސަބަބުން ބެލުންތެރިންގެ ހިތް އަތުލި ނަމަވެސް މިފިލްމު ބަލަން ސިނަމާތަކަށް މީހުން ވެއްދުމަށް ވަނީ ނުކުޅެދިފަ އެވެ.
ފާޑުކިޔާފަރާތްތަކުން އިންތިހާއަށް މިފިލްމަށް ފާޑުކިޔާފައިވާއިރު، ފިލްމު ރިލީޒްކުރި ދުވަހު ސިނަމާތަކަށް ވަން މީހުންގެ އަދަދު މަދުކަމުން ކުރިއަށް އޮތް ހަފްތާ ބަންދުގައި މިފިލްމަށް މާބޮޑު ތަރުހީބެއް ލިބޭނެ ކަމަކަށް ލަފައެއް ނުކުރެވެ އެވެ.
ކަރަން އަންޝުމަން ޑައިރެކްޓްކޮށްފައިވާ މިފިލްމަކީ ކޮމެޑީ ފިލްމަކަށް ވާތީ ކުރިއަށް ހަފްތާ ބަންދުގައި ފިލްމޔ ބަލަން ސިނަމާއަށް ވަންނަ މީހުންގެ އަދަދު ނަމްބަރުން އިތުރުވި ނަމަވެސް އާންމުގޮތެއްގައި ފުރަތަމަ ހަފްތާ ބަންދުގައި ފިލްމުތަކަށް ލިބޭ އާމްދަނީ އާ ގާތްކުރާ އަދަދެއް މިފިލްމަށް ލިބޭނެ ކަމަކަށް ނުބެލެވެ އެވެ.
އިންޑިއާގެ 700 ސްކްރީންއެއްގައި މިފިލްމު ދައްކަމުން އަންނައިރު، ކިރިޔާވެސް ރަނގަޅު ތަރުހީބެއް ލިބިފައިވަނީ މުމްބައި އިންނާއި ދިއްލީ އިންނެވެ.
ޕޮލޭންޑް އާއި ލަޑާކްގައި މަންޒަރުތައް ނަގާފައިވާ މިފިލްމަކީ ހަފީޒް ބިން އަލީ އިޝްވަރުޗަަންދު ޝަރުމާ (ރިތޭޝް ދޭޝްމުކް) އާއި އައްލާރައްކާޚާން ޕަރްވީން ޗައުދަރީ (ޕުލްކިތު ސަމްރަތު) ކިޔާ ޖާނުން ފިދާވެގެން ބޮން ގޮއްވާ ދެ މީހަކު އެހެން މީހުން ދުނިޔެއާއި މެދު ދެކޭގޮތް ބަދަލުކުރުމަށް ކުރާ ކަންތައްތަކެއް ފެނިގެނދާ މިފިލްމުގައި ހެއްވާ މަޖާ ގިނަ ކަންތައްތަކެއް ހިމެނެ އެވެ.
ރިތޭޝް ސިދްވާނީ އާއި ފަރްހާން އަޙްތަރު ޕްރޮޑިއުސްކޮށްފައިވާ މިފިލްމު ވަނީ ޕާކިސްތާނުގައާއި ދުބާއީގައި ދެއްކުން މަނާކޮށްފަ އެވެ.
މޮޅެތި ތަރިން ހިމަނައިގެން މަޖާ ވާހަކައެއްގެ މައްޗަށް އުފައްދާފައިވާ ފިލްމު، "ބަންގިސްތާން" ގެ ޖާދޫގައި ބެލުންތެރިން ޖެއްސިފައިނުވާއިރު، އާމްދަނީގެ ގޮތުގައިވެސް މިފިލްމަށް ލިބެގެން ގޮސްފައިވަނީ ހީކުރިވަރަށް ވުރެން ދަށް އަދަދެކެވެ. މިފިލްމުގެ ކުރިން ރިލީޒްކުރި ހޮލީވުޑްގެ ފިލްމު "މިޝަން އިމްޕޮސިބަލް: ރޮގް ނޭޝަން" އަށް އިންޑިއާގައި ރަނގަޅު ތަރުހީބެއް ލިބެމުން އަންނަކަން ފާހަގަކޮށްލަން ޖެހެ އެވެ. އެގޮތުން ޓޮމް ކްރޫޒް ލީޑްރޯލުން ފެނިގެންދާ މިފިލްމު ރިލީޒްކުރި ދުވަހު އެކަނި 6 ކްރޯޑް (60 މިލިއަން) ރުޕީޒް ލިބިފައިވެ އެވެ.
"ބަންގިސްތާން" ގެ ވިޔަފާރިއަށް މި އެކްޝަން ފިލްމުގެ އަސަރު ކިތަންމެ ރަނގަޅަށްވެސް ވަނީ ކޮށްފަ އެވެ.
ކުރިއަށް އޮތް ހަފްތާ ބަންދުގައި މިފިލްމު ރަނގަޅައި ނުހިގައިފިނަމަ މިފިލްމުވެސް މިއަހަރު ނިކުތް ފިލްމުތަކުގެ ތެރެއިން ފްލޮޕްވެފައިވާ ފިލްމުތަކުގެ ލިސްޓަށް އިތުރުވެގެންދާނެ އެވެ.