ވޭތުވެދިޔަ އަހަރަކީ ހުރިހާ ގޮތަކުންވެސް ރާނީ މުކަރްޖީ އަށް އުފާވެރި އަހަރެކެވެ.
ގިނަ ދުވަސްތަކެއް ވަންދެން ފިލްމު ނުކުޅެ ހުރުމަށްފަހު މިދިޔަ އަހަރުގައި ނިކުތް 'މަރްދާނީ" އާއިއެކު އެނބުރި އައިސް ރާނީ ވަނީ އޭނާ ފިލްމުތަކާއި ދުރުން އުޅުނު ކަމުގައި ވިޔަސް އޭނާގެ ފިލްމީ ކެރިއަރުގެ ބުރަކި އަދި ނުޖެހޭ ކަން އަންގަދީފަ އެވެ.
މީގެއިތުރުން ރާނީ ވަނީ ގިނަ ދުވަސްތަކެއް ވަންދެން ލޯބީގެ ގޮތުން ގުޅިގެން އުޅުނު ޕްރޮޑިއުސަރު އަދި ޑައިރެކްޓަރު އަދިތުޔާ ޗޯޕްރާ އާއި މިދިޔަ އަހަރުގެ އޭޕްރީލް މަހުގެ 21 ވަނަ ދުވަހު އިޓަލީގައި ބޭއްވި ވަރަށް ޕްރައިވެޓް ރަސްމިއްޔާތެއްގައި ކައިވެނިކޮށްފަ އެވެ.
އަނެއްކާވެސް ރާނީ މިވަނީ އޭނާގެ ފޭނުންނަށް އުފާވެރި ހަބަރަކާއިއެކު ބައްދަލުކޮށްފަ އެވެ.
ރާނީގެ ގާތްފަރާތަކާއި ހަވާލާދީ ނޫސްތަކުގައިވާ ގޮތުން ރާނީ އިނީ އޭނާ އާއި އަދިތުޔާގެ ފުރަތަމަ ދަރިފުޅަށް ބަލިވެ އެވެ. މިވަގުތު ލަނޑަންގައި އިން ރާނީ އާއި ފޯ ސީޒަންސްގެ ހޮޓަލަކުން މިއަދުގެ ހެނދުނުގެ ވަގުތެއްގައި ބައްދަލުވި ފަރާތުން ބުނެފައިވާކަމަށް ނޫސްތަކުގައި ރިޕޯޓްކޮށްފައިވާ ގޮތުން ރާނީ އަންނަނީ މާބަނޑު ދުވަސްވަރުގެ ކުރީކޮޅުގެ ފުރަތަމަ ހަފްތާތަށް ގުނަމުން ކަމަށެވެ.
އިތުރަށް ނުސްތަކުގައި ބުނެފައިވާ ގޮތުން، ރާނީ ބަނޑުބޮޑުކަމަށް ދެކެވޭ ވާހަކަތައް ޔަގީންކުރުމަށް އޭނާގެ ސްޕޯކްސްޕަސަނަށް ގުޅުމުން ވަނީ ރާނީ މިވަގުތު އުޅެނީ ގައުމުން ބޭރުގައި ކަމަށްވުމުން ބަނޑުބޮޑު ކަމަށް ދެކެވޭ ވާހަކަތަކާއި ގުޅޭގޮތުން ކޮމެންޓެއް ކުރެއްވެން ނެތް ކަމަށެވެ.
ދާދިފަހުން ވޯގް މަޖައްލާއަށް ދީފައިވާ އިންޓަވިއުއެއްގައި ރާނީ ވަނީ މިހާރު އޭނާ އެއްވެސް މަސައްކަތެއް ނުކޮށް ގޭގައި ކައިވެނީގެ ދިރިއުޅުމުގެ އުފާ ލިބިގަންނަނީ ކަމަށް ބުނެފަ އެވެ. ަދި ކުރިއަށް އޮތް ފަސްއަހަރު ބޭނުންވަނީ ތަންކޮޅެއް ހަރުކަށި ޒާތުގެ ތަޅާފޮޅާ މަންޒަރުތައް ގިނަ ފިލްމުތައް ކުޅެން ކަމަށާއި އަދި ފިލްމު ސެޓުތަކަށް ދާއިރު އެކުގައި ގެންދާނެ ލޯބިލޯބި ދަރިން ހޯދަން ކަމަށެވެ.
ރާނީގެ ފަރާތުން އަދި މިވާހަކަތައް ޔަގީންކޮށްދީފައިނުވާއިރު، ބަނޑުބޮޑު ކަމަށް ދެކެވޭ ވާހަތަކާއި ގުޅޭގޮތުން ރާނީ އެއްޗެއްބުނާނެ ކަމުގެ އިންތިޒާރުގައި ތިބި މީހުން މަދެއް ނޫނެވެ.