ޖަލުތަކަށް މަނާ ތަކެތި ވައްދާ އޮފިސަރުން ކަރެކްޝަންގައި ތިބުމަކީ ބަލައިގަންނާނެ ކަމެއް ނޫން ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
އިމްރާން މިހެން ވިދާޅުވީ މިއަދު މާފުށި ޖަލުގައި ފެށި މަނާތަކެތި ޖަލަށް ވެއްދުން ހުއްޓުވުމުގެ މަސައްކަތު ބައްދަލުވުމެއް އިފްތިތާހުކޮށް ދެއްވާ ވާހަކަފުޅު ދައްކަވަމުންނެވެ.
އޭނ ވިދާޅުވީ ޖަލަށް ވެއްދުން މަނާ އެއްޗެއް ޖަލަށް ވެއްދުމުގައި ކަރެކްޝަންސްގެ އޮފިސަރަކު ބައިވެރިވުން ބަލައި ނުގަންނާނެ ކަމަށެވެ.
"ވަރަށް ސާފުކޮށް ދަންނަވަން ބޭނުންވާ ވާހަކައެއް އެބައޮތް. ޖަލުތަކަށް ގާނޫނީ ގޮތުން ވެއްދުން މަނާއެއްޗެއް ވެއްދުމުގައި އޮފިސަރަކު ބައިވެރިވެއްޖެނަމަ އެއީ ކަރެކްޝަން ސާވިސްގެ އޮފިސަރެއްގެ ކިބައިގަ ހުންނަންޖެހޭ ޝަރުތު ފުރިހަމަ ނުވަނީ. އެފަދަކަމެއް ސާބިތުވެއްޖެ އޮފިސަރަކު މި މުއައްސަސާގައި ހުރުމަކީ އަޅުގަނޑު ގަބޫލުކުރާނެ ކަމެއް ނޫން. އަޅުގަނޑުމެން ޓޮލަރޭޓް ކުރާނެ ކަމެއް ވެސަް ނޫން. "މިނިސްޓަރު ވިދާޅުވި އެވެ.
އިމްރާން ވިދާޅުވީ ޖަލުތަކުގެ ސަލާމަތާއި ރައްކާތެރިކަމާއި އަމާންކަމަށް އޮތް އެންމެ ބޮޑު ގޮންޖެހުމަކީ މަނާ ތަކެތި ކޮންމެސް ގޮތަކަށް ޖަލަށްވަނުން ކަމަށެވެ. އެހެންކަމުން ޖަލުތަކުގެ ހާލަތު ރަނގަޅު ކުރުމުގެ މަސައްކަތްތަކުގެ ތެރެއިން މުހިއްމު އެއް މަސައްކަތަކީ މަނާތަކެތި ޖަލަށް ވަނުން ހުއްޓުވުން ކަމަށެވެ.