މި އަހަރުގެ ޔޫއެފާ ޗެމްޕިއަންސް ލީގް ކާމިޔާބު ކުރި ލިވަޕޫލްގެ ހަތް ކުޅުންތެރިޔަކު ބެލަންޑޯ އެވޯޑްގެ ނޮމިނޭޝަންގައި ހިމެނިއްޖެ އެވެ.
މި އަހަރު ޔޫރަޕްގެ މޮޅު ކުޅުންތެރިޔާގެ އެވޯޑް ހޯދި ލިވަޕޫލްގެ ވާޖިލް ވެންޑައިކް އާއެކު ލިވަޕޫލުން ބެލަންޑޯ އެވޯޑަށް ނޮމިނޭޓް ވެފައި ވަނީ އެފްރިކަން ކަޕް އޮފް ނޭޝަންގެ ފައިނަލުގައި ވެސް ކުޅުނު ސެނެގާލްގެ ސެޑިއޯ މާނޭ އާއިި ޓްރެންޓް އެލެގްޒެންޑާ އާނާލްޑާއި ކުރިން ބެލަންޑޯގެ ތިން ވަނަ ހޯދި މުހައްމަދު ސަލާހާއި ބްރެޒިލް އާއެކު ކޮޕާ އެމެރިކާ ކާމިޔާބު ކުރި އަލިސަން ބެކާ އާއި ރޮބާޓޯ ފިރުމީނޯ އާއި ޖޯޖީނިއޯ ވައިނަލްޑަމް އެވެ.
ބެލަންޑޯ އެވޯޑަށް އެންމެ ބޮޑަށް ވާދަ ކުރަނީ ވެންޑައިކްގެ އިތުރުން ފީފާގެ ދުނިޔޭގެ މޮޅު ކުޅުންތެރިޔާގެ އެވޯޑް ހޯދި ބާސެލޯނާގެ ލިއޮނަލް މެސީ އެވެ. ފީފާގެ ދަ ބެސްޓް އެވޯޑް މެސީ ކާމިޔާބު ކުރީ ވެންޑައިކް ފަހަތަށް ޖައްސާލުމަށް ފަހު އެވެ. ޔޫރަޕްގެ މޮޅު ކުޅުންތެރިޔާގެ އެވޯޑް ވެންޑައިކް ހޯދީ މެސީ ފަހަތަށް ޖައްސާލުމަށް ފަހު އެވެ.
އެވޯޑަށް ޔުވެންޓަސްގެ ފޯވަޑް ކްރިސްޓިއާނޯ ރޮނާލްޑޯވެސް އެވޯޑަށް ނޮމިނޭޓް ވެފައި ވެއެވެ. ގިނަ އަދަދެއްގެ ޒުވާން ކުޅުންތެރިންނާއެކު ޗެމްޕިއަންސް ލީގްގެ ސެމީ ފައިނަލަށް ދަތުރު ކުރި އަޔެކްސްގެ ބައެއް ކުޅުންތެރިން ވެސް ނޮމިނޭޓް ވެފައި ވެއެވެ. އަޔެކްސްގައި މިދިޔަ ސީޒަންގައި ހިމެނު ކުޅުންތެރިންގެ ތެރެއިން އެވޯޑަށް ނޮމިނޭޓް ވެފައި ވަނީ، މިހާރު ބާސާގެ މިޑްފީލްޑާ ފްރޭންކީ ޑި ޔޯންގް، ޔުވެންޓަސްގެ މިހާރުގެ ޑިފެންޑަރު މަޓީސް ޑިލްޓް، ޑޫސަން ޓަޑިކް އަދި ޑޮނި ވެންޑެބީކް އެވެ.
ފައިނަލުގައި ކުޅުނު ޓޮޓެންހަމް ހޮޓްސްޕާސްގެ ހެރީ ކޭން، ސަން ހިއުންގް މިން، ހޫގޯ ލޮރިސް އަދި ކްރިސްޓިއަން އެރިކްސަންވެސް ވަނީ ނޮމިނޭޓް ވެފަ އެވެ. އިނގިރޭސި ޑޮމެސްޓިކް ސީޒަންގެ ތިން ތަށިވެސް ކާމިޔާބު ކުރި މެންޗެސްޓާ ސިޓީން އެވޯޑަށް ނޮމިނޭޓް ވެފައި ވަނީ، ބެނާޑޯ ސިލްވާ، ކެވިން ޑިބްރޭނޭ، ސާޖިއޯ ކުން އަގުއޭރޯ، ރަހީމް ސްޓާލިން އަދި ރިޔާދު މަހްރޭޒް އެވެ،
މިދިޔަ އަހަރު އެވޯޑް ހޯދި ލުކަ މޮޑްރިޗް މިއަހަރު ނޮމިނެޓް ވެފައެއް ނުވެ އެވެ. އޭނާގެ ކުލަބު ރެއާލް މެޑްރިޑަށް މި އަހަރަކީ ނާކާމިޔާބު އަހަރެކެވެ. މިއަހަރުގެ ބެލަންޑޯ އޮންނާނީ ޑިސެމްބަރު ދެ ވަނަ ދުވަހު އެވެ.