މިއީ އާ ދިރާސާއަކަށް ފަހު ސައިންސްވެރިންގެ ނަސޭހަތެވެ. އެހެންވީމަ ހިތް ކިޔައިގެން ތިޔަ އުޅޭ އަންހެން ކުއްޖާ ގޮވައިގެން ޝްވެކް ސިނަމާ އަށް ނުވަތަ އޮލިމްޕަސް ސިނަމާ ފިލްމެއް ބަލައިލަން ދިއުމަށް ވުރެ އަވަހަށް ލޯބީގެ ނަތީޖާ ނެރެވެން އޮތް ގޮތަކީ އޭނާ ގޮވައިގެން ކޮންމެވެސް ރެސްޓޯރެންޓަކަށް ކާން ދިއުމެއް ނޫން ހެއްޔެވެ؟
ސައިކަލުގެ ފަހަތަށް އަރުވައިގެން ހަވީރު ފިންޏަށް ބުރެއް ޖަހާލައިގެން އަދި އިރުއޮއްސޭ މަންޒަރު ބަލަން އަތު ގުޅާލައިގެން ދިޔަޔަސް ލޯތްބެއް ފައްކަލެއް ނުވެ އެވެ. އެމެރިކާގެ ފިލެޑެލްފިއާގެ ޑެރެކްސެލް ޔުނިވާސިޓީގެ ސައިންވެރިންގެ ޓީމަކުން ކުރިއަށް ގެންދިޔަ ދިރާސާއަކަށް ފަހު "އެޕަޓައިޓް" ޖާނަލްގައި ޝާއިއުކޮށްފައިވާ ރިޕޯޓް ބުނާ ގޮތުން ލޯބީގައި ނަސީބުވެރިޔަކަށް ވާން ފިރިހެން މީހާ އެދޭ ނަމަ ހަމަ އެންމެ ރަނގަޅު ގޮތަކީ އަންހެން ކުއްޖާ އަށް ކާން ދިނުމެވެ.
ސައިންސްވެރިންގެ މި ދިރާސާ އަކީ 20 އަންހެނަކު ބޭނުންކޮށްގެން އޭގެ ތެރެއިން ބައެއް މީހުންނަށް ކާން ދިނުމަށް ފަހު އަދި ބައެއް މީހުން ހުސްބަނޑާ ބައިތިއްބައިގެން ލޯބީގެ މަންޒަރުތައް ނުވަތަ މާނަ ދޭހަވާ ފޮޓޯތަކެއް ދައްކައިގެން ސިކުނޑިން އުފައްދާ ރިއެކްޝަން ބަލައިގެން ކޮށްފައިވާ ދިރާސާ އެކެވެ. ސައިންސްވެރިންގެ ޓީމުން ބުނެފައި ވަނީ އަތުގުޅާލައިގެން ބީޗެއްގެ ގޮނޑުދޮށުގައި ދެ ލޯބިވެރިޔަކު ހިނގާލާ މަންޒަރު ފެންނަ ފޮޓޯއަކަށް ހުސްބަނޑާ ހުންނަ އަންހެން މީހާ އާއި ކާލައިގެން ހުންނަ އަންހެން މީހާގެ ސިކުނޑި ރިއެކްޓްކުރާ ގޮތް ތަފާތުވާ ކަމަށެވެ.
އެގޮތުން އެމްއާރްއައި ޓެސްޓްތަކުން އެނގިފައި ވަނީ ކާން ދިނުމަށް ފަހު ރޮމޭންޓިކް ފޮޓޯގަނޑެއް ބަލާ އަންހެން މީހާގެ ސިކުނޑިން އެއަށް ޕޮޒިޓިވް ރިއެކްޝަންތަކެއް އުފައްދާ ކަމަށެވެ. އެގޮތުން މޫނު މައްޗަށް ގެންނަ ކުލަވަރާއި މަގުސަދެއް ހާސިލުކުރުމުގެ ނިޔަތުގައި ކަމެއް ކުރުމަށް ބާރުއަޅާ ސިކުނޑީގެ ބައިތަކުގެ މަސައްކަތް، ކާލައިގެން ހުންނަ އަންހެން މީހާގެ ޓެސްޓްތަކުގައި ވަރަށް ޕޮޒިޓިވް އެވެ.
ނަމަވެސް ނުކައި ހުންނަ އަންހެން މީހާގެ ސިކުނޑިން މިފަދަ ރިއެކްޝަންތަކެއް ނުއުފައްދަ އެވެ.
މިއީ ލޯތްބާއި ކެއުމާއި އަންހެނުންނާ ދެމެދު އޮތް ގުޅުން ބެލުމަށް ސައިންސްވެރިންގެ ޓީމަކުން ހިންގި މިފަދަ ފުރަތަމަ ދިރާސާ އެވެ.