"މަރްދާނީ" އާއި "ހިޗްކީ" އަށްފަހު ރާނީ މުކަރުޖީގެ "މަރްދާނީ 2" ވެސް ރިލީޒްވުމަށް މިހާރު ވަނީ ތައްޔާރުވެފަ އެވެ. ފިލްމުގެ ޓްރެއިލާ ރިލީޒްކުރުމާއެކު ބެލުންތެރިންގެ ޝައުގުވެރިކަން މި ފިލްމަށް ވަރަށް ބޮޑަށް ވަނީ ލިބިފަ އެވެ. ޝިވާނީ ޝިވްޖީ ރާއޯގެ ރޯލު ރާނީ ކުޅެފައިވާލެއް މޮޅުކަމަށް ޓްރެއިލާ ބެލި އެންމެން ވެސް ދަނީ ބުނަމުންނެވެ.
"މަރްދާނީ 2" ގައި ރަނީ އަކީ ހިތްވަރުގަދަ އަދި ބިރުކުޑަ ފުލުހެކެވެ. ވަރަށް ވަރުގަދަ އެކްޝަން މަންޒަރުތައް ވަރަށް ފުރިހަމައަށް ފިލްމުގައި ރާނީ ވަނީ ކުޅެފަ އެވެ.
އިންޑިއާގެ ނޫހަކަށް ދިން އިންޓަވިއު އެއްގައި ރާނީ ބުނީ އެކްޝަން މަންޒަރުތައް މޮޅަށް ކުޅެވޭނީ ވަރަށް ފިޓްކޮށް ހުރެގެންނެވެ. އެކްޝަން އަކީ ހަމައެކަނި މީހާގެ ވަރުގަދަކަން ދެއްކުން ނޫންކަމަށާއި އެކްޝަން އާއެކު ވެސް އެ މީހެއްގެ އެކްސްޕްރެޝަން ވަރަށް މުހިއްމު ކަމަށް ރާނީ ބުންޏެވެ. "މަރްދާނީ 2" އަކީ ވެސް ހަށިގަނޑުގެ އެކްޝަން ފިޔަވައި އެކި ޖަޒުބާތުތައް ވެސް ވަރަށް ފުރިހަމައަށް ދައްކުވައިދޭން ޖެހޭ ކަހަލަ ފިލްމެއް ކަމަށް ރާނީ ބުންޏެވެ.
ރާނީ ފިޔަވައި އެކްޝަން ފިލްމުތައް ކުޅެން އެންމެ އެކަށީގެންވާ ބަތަލާއިންނަކީ ކޮބައިތޯ އެހުމުން ރާނީ ބުނީ ދީޕިކާ ޕަދުކޯން އާއި ކެޓުރީނާ ކައިފް ކަމަށެވެ. "ޓައިގާ ޒިންދާ ހޭ"ގައި ކެޓުރީނާގެ އެކްޝަން މަންޒަރުތައް ވަރަށް މޮޅުކަމަށް ރާނީ ބުންޏެވެ. އަދި ދީޕިކާ ވެސް އެކްޝަން ރޯލުތަކަށް ވަރަށް ކުޅަދާނަ ކަމަށް ރާނީ ގަބޫލު ކުރެ އެވެ.
އޭނާ އާއި ކެޓުރީނާ އަދި ދީޕިކާ އަށް ހޮލީވުޑްގެ މަޝްހޫރު ފިލްމު "ޗާލީސް އެންޖަލްސް"ގެ ހިންދީ ފިލްމް ކުޅެވިދާނެ ކަމަށް ސަމާސާއަކަށް ހަދާފައި ރާނީ ބުންޏެވެ.
"އަހަރެމެންނަށް ޗާލީސް އެންޖަލްސް ކުޅެވިދާނެ. އޭގަ އުޅޭނެ ތަންކޮޅެއް ކުރު ބަތަލާއެއް. އޭނާގެ ރޯލު އަހަންނަށް ރަނގަޅުވާނެ،" ރާނީ ބުންޏެވެ.
