މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މައުލޫމާތު ހާމަ ކުރަން ދެކޮޅު ހެދި މައްސަލައެއް އިންފޮމޭޝަން ކޮމިޝަން އޮފީހުން ރައްޔިތުންގެ މަޖިލީހަށް ހުށަހަޅައިފި އެވެ.
އިންފޮމޭޝަން ކޮމިޝަނަރުގެ މަގާމަށް އަލަށް އައްޔަން ކުރެއްވި ހުސައިން ފިޔާޒު މޫސާ އަވަސްއަށް ވިދާޅުވީ އެމްޓީސީސީގެ މުސާރައިގެ އޮނިގަނޑުގެ މައުލޫމާތު ހޯދަން އާންމު ރައްޔިތަކު އެދިފައިވާ ކަމަށާއި ނަމަވެސް އެ ކުންފުނިން އެ މައުލޫމާތުތައް ދިނުމަށް ދެކޮޅު ހަދާފައިވާ ކަމަށެވެ. އެގޮތުން އެމްޓީސީސީއަކީ މައުލޫމާތު ހޯދައި ލިބިގަތުމުގެ ގާނޫނުގެ ތެރެއިން މައުލޫމާތު ދޭން ޖެހޭ ކުންފުންޏެއް ނޫން ކަމަށް އެމްޓީސީސީން ބުނެފައިވާ ކަމަށާއި އެހެންކަމުން އެ މައްސަލަ ރައްޔިތުންގެ މަޖިލީހަށް ހުށަހަޅާފައިވާ ކަމަށް ފިޔާޒް ވިދާޅުވި އެވެ.
ފިޔާޒް ވިދާޅުވީ އެމްޓީސީސީގެ މައްސަލަ އިންފޮމޭޝަން ކޮމިޝަނަށް ހުށަހަޅާފައި ވަނީ އޭނާ އެ ކޮމިޝަނާ ހަވާލުވެވަޑައިގަތުމުގެ ކުރިންނެވެ. ނަމަވެސް އެ މައްސަލާގައި އެމްޓީސީސީގެ ވެރިންނާ ބައްދަލު ކުރައްވާފައިވާ ކަމަށް ފިޔާޒް ވިދާޅުވި އެވެ.
"މައުލޫމާތު ހޯދައި ލިބިގަތުމުގެ ގާނޫނުގެ ދަށުން ދައުލަތުގެ ހުރިހާ އިދާރާތަކުން ވެސް އާންމު ފަރުދުންނަށް މައުލޫމާތު ދިނުމުގައި އެ ގާނޫނަށް ފުރިހަމައަށް އަމަލު ކުރަންވާނެ، އެގޮތަށް ކަންކަން އިންތިޒާމު ކުރަން މަސައްކަތް ކުރައްވާނެ،" ފިޔާޒް ވިދާޅުވި އެވެ.
އެމްޓީސީސީގެ މައްސަލަ މަޖިލީހަށް ހުށަހެޅި އިރު އެފަދަ މައްސަލަތައް ބަލަނީ މަޖިލީހުގެ ސްޓޭޓް އޯންޑް އެންޓަޕްރައިޒް ކޮމިޓީންނެވެ. ފިޔާޒް ވިދާޅުވި ގޮތުގައި އެ މައްސަލަ ވަރަށް އަވަހަށް އެޖެންޑާ ކުރާނެ ކަމަށް ވަނީ މައުލޫމާތު ލިބިފަ އެވެ.