ކުޑަކުދިންގެ ހިޔާގައި ދިރިއުޅޭ ކުޑަކުއްޖަކު ބަލިވެއިން ކަމަށް ބުނެ ފަތުރަމުން ދަނީ ހަގީގަތާއި ހިލާފު ވާހަކަތަކެއް ކަމަށް ޖެންޑާ މިނިސްޓްރީން ބުނެފި އެވެ.
ކުޑަކުދިންގެ ހިޔާގައި ދިރިއުޅޭ ނުކުޅެދުންތެރިކަން ހުންނަ 13 އަހަރުގެ ކުޑަކުއްޖަކު ބަލިވެއިން ކަމަށް ބުނެ ސޯޝަލް މީޑިއާގައި ދަނީ ވާހަކަ ދެކެވެމުންނެވެ.
އެކަމާއި ގުޅިގެން ޖެންޑާ މިނިސްޓްރީން ބުނީ ކުޑަކުއްޖާ ބަލިވެ އިންކަމަށް ބުނެ ފެތުރެމުންދާ ވާހަކަތަކަކީ ދޮގު ވާހަކަތަކެއް ކަމަށެވެ.
"ދައުލަތުގެ ބެލުމުގެ ދަށުގައި ދިރިއުޅޭ ކުދިން ބަދުނާމުކޮށް، އެ ފަދަ ހަބަރުތައް ފަތުރާ ފަރާތްތައް ހަރުކަށި އިބާރާތުން ކުށްވެރިކޮށް، އެ ބާވަތުގެ ކަންކަން ނުކުރުމަށް އިލްތިމާސްކުރަން." ޖެންޑާ މިނިސްޓްރީން ބުނެފައިވެއެވެ.
ކުޑަކުދިން ހިޔާގައި އުޅޭ ކުދިންނާއި ގުޅޭ ތަފާތު މައްސަލަތައް ދޭތެރެ ދޭތެރެއިން ފެންމަތިވެއެވެ. ބައެއް ކުދިންގެ އަހުލާގީ ތަފާތު މައްސަލަތަކުގެ ވާހަކަތައް ފެތުރިގެންދާއިރު ހިޔާގައި ދިރިއުޅޭ ބައެއް ކުދިން ފިލައިގެން ދިއުމަކީވެސް ބައެއް ފަހަރު ދިމާވާ ކަމެކެވެ.