ޓޫރިޒަމް މިނިސްޓްރީން ބޭއްވި "ބުރަބި" ޖަލްސާގައި ބްރޯޑްކާސްޓިން ކޮމިޝަންގެ ރައީސާ މަރިޔަމް ވަހީދާ (މަރީ) ހުށަހަޅައިދެއްވުމުން ފާޑުކިޔުންތައް އަމާޒުވި މައްސަލާގައި ޓޫރިޒަމް މިނިސްޓަރު އަލީ ވަހީދު މަރީ ދިފާއު ކުރައްވައި ވާހަކަ ދައްކަވައިފި އެވެ.
ޓޫރިޒަމް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މިނިސްޓަރު އަލީ ވިދާޅުވީ މަރީ އަކީ ބްރޯޑްކާސްޓިންގެ ދާއިރާގައި ވަރަށް ގާބިލް ބޭފުޅެއް ކަމަށާއި ބްރޯޑްކޮމްގެ މެންބަރެއްގެ ގޮތުގައި ކުރިއަށް އޮތް ފަސް އަހަރު މަރީގެ ހިދުމަތް ގައުމަށް ނުލިބިއްޖެނަމަ އެއީ ވަރަށް ހިތާމަވެރި ކަމެއް ކަމަށެވެ.
ފަތުރުވެރިކަމުގެ ދާއިރާއިން އެއް އަހަރު ތެރޭގައި މި ސަރުކާރަށް ހާސިލް ކުރެވުނު ކަންކަން ފާހަގަ ކުރުމުގެ ގޮތުން ޓޫރިޒަމް މިނިސްޓްރީން ބޭއްވި ހަފުލާއެއް މަރީ ހުށަހަޅުއްވައި ދެއްވައި ސަރުކާރަށް ތައުރީފުކޮށް ވާހަކަ ދެއްކެވިއިރު ކުރީ ސަރުކާރުގައި ބްރޯޑްކޮމްގެ މެންބަރުގެ ގޮތުގައި އޭރު ހުންނެވި ފާތިމަތު ޒައިނާ ސަރުކާރުން އޭރު ބޭއްވި ޖަލްސާއެއްގައި ގޮނޑި ޖަަހަން ހުއްޓާ ފެންނަ ވީޑިއޯތަކެއް އާންމުވުމުން އޭރުގެ އިދިކޮޅު ފަރާާތްތަކުގެ ފާޑުކިޔުން ވަރަށް ބޮޑަށް އަމާޒުވި އެވެ. އޭރު އަލީ ވަހީދު ވެސް ހުންނެވީ އިދިކޮޅުގަ އެވެ.
އަލީ ވަހީދު މިއަދު ވިދާޅުވީ އެ ދެ މައްސަލައަކީ މުޅިން ތަފާތު ދެ މައްސަލަ އެއް ކަމަށެވެ. އެ ގޮތުން ކުރީ ސަރުކާރުގައި ޒައިނާ ބައިވެރީ ސިޔާސީ ޕާޓީއެއްގެ ޖަލްސާއެއްގައި ކަމަށާއި އެ ޖަލްސާގައި ގޮނޑި ޖަހަން ވެސް އުޅުނު ކަމަށެވެ. ނަމަވެސް މަރީ ބައިވެރި ޓޫރިޒަމް މިނިސްޓްރީގެ ޖަލްސާއަކީ ސިޔާސީ ހަރަކާތެއް ނޫން ކަމަށެވެ. ޒައިނާގެ މައްސަލައާއި މަރީ އަމަލު ކުރެއްވި ގޮތާ އެއްވަރުކޮށް ބައެއް ފަރާތްތަކުން ވާހަކަ ދައްކަވާތީ ވެސް އޭނާ ވަނީ ކަންބޮޑުވުން ވެސް ފާޅު ކުރައްވައިފަ އެވެ. -އަލީ ވަހީދު އެހެން ވިދާޅުވިނަމަވެސް ޒައިނާ ބައިވެރިވެފައިވަނީ ރައީސް ޔާމީން އިސްރަށްވެހިންނާ ބައްދަލްކުރުމަށް ސަރުކާރުން އިންތިޒާމުކުރި ޖަލްސާއެއްގައެވެ.-
"އެއީ އެއްގޮތަކަށް ވެސް އަޅުގަނޑުމެން ކުރީބައިގައި އޭ ސަރުކާރަށް ތައުރީފު ކުރައްޗޭ މިހެން ހަދައްޗޭ ބުނެ ރާވައިގެން ސިޔާސީ ނިޔަތެއްގައި ކުރި ކަމެއް ނޫން. ގޮނޑި ޖަހާކަށް ވެސް ނާދޭ އިނގޭތޯ. ޓޫރިޒަމް މިނިސްޓްރީން ބޭއްވީ ވެސް ސިޔާސީ ހަރަކާތެއް ނޫން،" މިނިސްޓަރު އަލީ ވަހީދު ވިދާޅުވި އެވެ.
މިނިސްޓްރީން ބޭއްވީ ސިޔާސީ ހަރަކާތަކަށް ނުވާއިރު ދައުލަތުން ގައުމުުގެ ބޮޑު އިގްތިސާދީ ސިނާއަތަށް ހާސިލު ކުރެވުނު ކަންކަން ފާހަގަ ކުރަން ބާއްވާ ހަފުލާއެއްގައި ބައިވެރިވުމަކީ އޭގެ އޮންނަ އުސޫލީ މިންގަނޑުތަކާ ވެސް ހިލާފު ކަމެއް ނޫން ކަމަށް މިނިސްޓަރު ވިދާޅުވި އެވެ. އެހެންކަމުން މަރީ އުސޫލާ ހިލާފަށް އެއްވެސް ކަމެއް ނުކުރައްވާ ކަމަށް ވެސް ވިދާޅުވި އެވެ.
އެހެން ނަމަވެސް ގައުމުގެ ރައްޔިތުންގެ ތެރެއިން ގިނަ ބަޔަކު އެއީ އެންމެ ރަނގަޅު ގޮތް ނޫން ކަމުގައި ދެކޭނަމަ އެ ގޮތަށް އުސޫލުތައް ބަދަލުކޮށް މަޖިލީހުން ކަނޑައެޅުމަކީ އެންމެ ރަނގަޅު ގޮތް ކަމަށް އަލީ ވިދާޅުވި އެވެ. އެހެން ވިދާޅުވެފައި ވެސް އަލީ ވަނީ އެ އުސޫލު އެއްގޮތަށް ބައްޓަން ކުރާނަމަ ވަރަށް ގިނަ ކަންކަން ކުރުމުން މަނާ ކުރަން ޖެހޭނެ ކަމަށް ވިދާޅުވެފަ އެވެ.
"އެހެން ކަމަށް ވަނީނަމަ އަޅުގަނޑުމެން އެބަ ކަނޑައަޅަން ޖެހޭ، ބަލާލުން ހަމަ ރަނގަޅު، މުއައްސަސާތަކުގެ މެންބަރުން، ފަނޑިޔާރުން، ވަކި ޖިމަކަށް ދިއުން ނޫނީ ވަކި ކްލަބަކަށް ތާއީދު ކުރުމަކީ ވެސް ކޮން ކަހަލަ ކަމެއް ކަން، ރާއްޖެއަކީ ތަފާތު ތަނެއް، މި ކަންކަން ބަލާލުން އެންމެ ރަނގަޅު،" އަލީ ވަހީދު ވިދާޅުވި އެވެ.