މި އަހަރު ހިނގާ ހުރިހާ ޝަރީއަތްތަކެއް އާންމުންނަށް ހުޅުވާލައިގެން ބޭއްވުމަކީ ވަރަށް އެެދި ވަޑައިގަންނަވާ ކަމެއް ކަމަށް ޕްރޮސެކިއުޓަރު ޖެނެރަލް ހުސައިން ޝަމީމް ވިދާޅުވެއްޖެ އެވެ.
ޕީޖީ މިހެން ވިދާޅުވީ މިއަދު ކުރެއްވި ޓްވީޓެއް މެދުވެރިކޮށެވެ.
އޭނާ ވިދާޅުވީ 2020 ވަނަ އަހަރަކީ ރާއްޖޭގައި ހިނގާ ހުރިހާ ޝަރީއަތެއް، އާންމުންނަށް ހުޅުވާލައިގެން ބޭއްވޭ އަހަރު ކަމަށް ހެދުމަކީ ވަރަށް އެދޭކަމެއް ކަމަށެވެ. އަދި އެ މަސައްކަތް އެ މަގަށް ހިންގުމަށްޓަކައި ޕްރޮސެކިއުޓަރު ޖެނެރަލްގެ އޮފީހުން ދޭންޖެހޭ ހުރިހާ އެއްބާރުލުމެއް ދޭނެ ކަމަށެވެ.
"އިތުބާރު އިތުރު ކުރެވޭނީ ހާމަކަން ބޮޑު ކޮށްގެން." ޝަމީމްގެ އެ ޓްވީޓްގައި ވިދާޅުވެފައި ވެއެވެ.
ރާއްޖޭގައި މިހާރު ހިންގާ ހުރިހާ ޝަރީއަތްތައް ވެސް، ވަކި ސަބަބަކާއި ގުޅިގެން ސިއްރު މަޖިލީހެއްގެ ގޮތުގައި ކުރިއަށް ނުގެންދާނަމަ ކޯޓްތަކުގައި ޖާގަ އޮތް މިންވަރަކުން އާންމުންނަށް އޮންނަނީ ހުޅުވާލާފަ އެވެ.
ނަމަވެސް މިފަހުން ކުރިއަށް ގެންދިޔަ ކުރީގެ ރައީސް އަބްދުﷲ ޔާމީންގެ ޝަރީއަތްތައް ޓީވީން ވަނީ ވަގުތުން ދުރަށް ދައްކާފަ އެވެ. މިއީ ރާއްޖޭގެ ތާރީހުގައި ވެސް ޝަރީއަތުގެ މަޖިލީހެއް ރާއްޖޭގެ ގިނަ ޓީވީ ސްޓޭޝަންތަކުން ލައިވް ކުރި ފުރަތަމަ ފަހަރެވެ. އޭގެ ކުރިން ނޮވެންބަރު 3، 88 ގެ ހަމަލާއާއި ގުޅިގެން ކުރިއަށް ގެންދިޔަ އަޑުއެހުންތައް ދިވެހިރާއްޖޭގެ އަޑުން ވަގުތުން ދުރަށް ފޮނުވާފައި ވެއެވެ.
ރައީސް ޔާމީންގެ މައްޗަށް ހިންގުނު މަނީ ލޯންޑަރިންގެ މައްސަލަގެ ޝަރީއަތްތައް ލައިވްކޮށް ޓީވީތަކުން ދުރައް ދައްކާފައިވަނީ ދެ ފަރާތުންވެސް އެއްބަސްވެެގެން މައްސަލަ ބައްލަވާ ފަނޑިޔާރު އެގޮތަށް ނިންމެވުމުންނެވެ.
އޭގެ ފަހުން ކުރީގެ ނާއިބު ރައީސް އަހުމަދު އަދީބުވެސް ވަނީ އެމަނިކުފާނުގެ މައްޗަށް އުފުލާފައިވާ ދައުވާގެ ޝަރީއަތްތައް އާންމުކޮށް ހުޅުވާލައިގެން ޓީވީތަކުން ވަގުތުން ދުރަށް ފެންނާނެހެން ކުރިއަށް ގެންދިއުމަށް އެދިވަޑައިގެންފަ އެވެ. ނަމަވެސް އެފަހަރު މައްސަލަ ބައްލަވާ ފަނޑިޔާރު ވަނީ އެކަމަށް އިއުތިރާޒު ކުރައްވާފަ އެވެ.