ޗައިނާގައި ފެތުރެމުންދާ "ނޮވެލް ކޮރޯނާ ވައިރަސް" އާއި ގުޅިގެން އެ ގައުމަށް ދަތުރުކުރާ މީހުން ސަމާލުވުމަށް ދުނިޔޭގެ ސިއްހަތު ޖަމިއްޔާއިން ގޮވާލައިފި އެވެ.
މިދިޔަ ޑިސެންބަރު މަހުން ފެށިގެން ޗައިނާގެ ހޫބޭ ޕްރޮވިންސްގައި ފެތުރެމުންދާ ނޭވާލާ ނިޒާމަށް އަސަރުކުރުވާ ގޮތްނޭންގޭ މި ބައްޔަކީ ކޮރޯނާ ވައިރަސް އާއިލާގެ އަލަށް ފެނުނު "ނޮވެލް ކޮރޯނާ ވައިރަސް" އިން ޖެހޭ ބައްޔެއްކަން މިހާރު ވަނީ ހޯދިފައެވެ. މި ބަލި ޖެހިފައިވާ 142 މީހަކު މިހާތަނަށް ފެނިފައިވާއިރު ދެ މީހަކު ވަނީ މަރުވެފައެވެ.
ޗައިނާގެ އިތުރުން ތައިލެންޑް މި ބަލި ޖެހިފައިވާ ދެ މީހުން އަދި ޖަޕާނުން މީހަކު ވަނީ ފެނިފައެވެ.
އެޗްޕީއޭއިން ބުނީ ރާއްޖެއަށްވެސް މި ބަލި އައުމުގެ ފުރުސަތު އެބައޮތް ކަމަށް ދުނިޔޭގެ ސިއްހަތު ޖަމިއްޔާއިން ލަފާދީފައިވާތީ އެކަމާއި ގުޅިގެން އަޅަންޖެހޭ ފިޔަވަޅުތައް އަޅަމުން ގެންދާ ކަމަށެވެ.
ޗައިނާ އަށް ދަތުރުކުރާ މީހުން ސަމާލުކަންދޭންވީ ކަންކަން
- ދޫނިސޫފާސޫފި، ޖަނަވާރު ގެންގުޅެ، ވިއްކާ އަދި ކަތިލާ ތަންތަނަށް ނުދިއުން
- ބަލިމީހުންނާ ކައިރީގައި ނޫޅުން
- ގިނަ ގިނައިން ސައިބޯނި ލައިގެން އަތް ދޮވުން
- ކެއްސާ ކިނބިހި އަޅާއިރު ޓިޝޫއަކުން ރަނގަޅަށް އަނގައާއި ނޭފަތް ނިވާކުރުން
އަލާމާތެއް ފެނިއްޖެނަމަ އަމަލު ކުރަންވީ ގޮތް
- މާސްކު އަޅައިގެން އުޅުން
- ސިއްހީ ހިދުމަތެއް ހޯދުމަށް މެނުއީ ބޭރަށް ނުނިކުތުން
- އަވަސް ސިއްހީ ފަރުވާ ހޯދުން
- ސިއްހީ ހިދުމަތްދޭ ފަރާތްތަކުގެ އިރުޝާދާއެކު ދަތުރުކުރި ތަންތަނުގެ މައުލޫމާތު ދިނުން
- ކެއްސާ ކިނބިހި އަޅާއިރު ޓިޝޫއަކުން ރަނގަޅަށް އަނގައާއި ނޭފަތް ނިވާކުރުން
- ގިނަ ގިނައިން ސައިބޯނި ލައިގެން އަތް ދޮވުން
"ނޮވެލް ކޮރޯނާ ވައިރަސް" އާއި ގުޅިގެން ޗައިނާއިން ބަލިވި ގިނަ މީހުންނަކީ ސީފުޑް އަދި ޖަނަވާރު ވިއްކާ މާރުކޭޓްތަކުގައި މަަސައްކަތްކުރި ނުވަތަ އެތަންތަނަށް ދިޔަ މީހުން ކަމަށް އެ ގައުމުން ވަނީ ބުނެފައެވެ. އަދި މި ބަލި އެކަކުގައިން އަނެއްކަކު ގަޔަށް ފެތުރެމުން ނުދާ ކަމަށްވެސް ޗައިނާގެ ސިއްހީ މާހިރުން ވަނީ ވިދާޅުވެފައެވެ.