މަގާމުން ވަކިކުރީ ޖަލު ހިލުވާލަން ސަރުކާރު ކޯލިޝަންގެ ތެރެއިން ބަޔަކު ކުޅުނު ކުޅިގަނޑެއް ކާމިޔާބު ނުވުމުން ކަމަށް މިއަދު ކޮމިޝަނަރު އޮފް ޕްރިޒަންސްގެ މަގާމުން ވަކިކުރެއްވި އަބްދުﷲ މުނާޒް ވިދާޅުވެއްޖެ އެވެ.
ރައީސް އޮފީހުގެ ޗީފް އޮފް ސްޓާފް އަލީ ޒާހިރު ސޮއި ކުރައްވާ މިއަދު މުނާޒަށް ފޮނުވި ސިޓީއެއް މެދުވެރިކޮށް ކޮމިޝަނަރު އޮފް ޕްރިޒަންސްގެ މަގާމުން މުނާޒް ވަކި ކުރިކަން ވަނީ އަންގާފަ އެވެ.
މަގާމުން ވަކި ކޮށްފައިވާ ޔަގީންކޮށް ދެއްވަމުން މުނާޒް ވިދާޅުވީ ސަރުކާރު ހިންގާ ކޯލިޝަންގެ ތެރެއިން އަދި ބޭރުން ގުޅިގެން ޖަލުތެރެ ހިލުވާލަން މަސައްކަތްތަކެއް ކޮށްފައިވާ ކަމަށެވެ. އަދި މިއަދު މަގާމުން ވަކިކުރީ އެކަން ކާމިޔާބު ނުވުމުން ކަމަށް ވިދާޅުވި އެވެ.
އެގޮތަށް ވަޒީފާއިން ވަކިކުރުމަކީ ލިބުނު ކާމިޔާބީއެއް ކަމަށްވެސް މުނާޒް ވިދާޅުވި އެވެ.
"އަޅުގަނޑު ކަރެކްޝަންގައި ހުއްޓާ ޖަލު ހިލުވާލަން ކޯލިޝަންގެ ތެރެއިން އަދި ބޭރުން ގުޅިގެން ކުޅުނު ކުޅިގަނޑު ކާމިޔާބު ނުވުމުން މިއަދު އަޅުގަނޑު ވަޒީފާއިން ވަކި ކުރުމަކީ އަޅުގަނޑަށް ލިބުނު ކާމިޔާބެއް. އަލްހަމްދުލިﷲ." މުނާޒްގެ ޓްވީޓްގައި ވިދާޅުވެފައި ވެއެވެ.
ކޮމިޝަނާ އޮފް ޕްރިޒަނާގެ މަގާމަށް މުނާޒް އައްޔަން ކުރެއްވީ ޑިސެންބަރު 25، 2018 ގައެވެ. އޭރު މުނާޒަކީ މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ބެލުމަށް ރައީސް އިބްރާހިމް މުހައްމަދު ސޯލިހު އެކުލަވާލާފައިވާ ރިޔާސީ ކޮމިޝަންގައި ހިމެނިވަޑައިގަންނަވާ މެންބަރެކެވެ.
މުނާޒަކީ އެމްއެންޑީއެފްގައި 24 އަހަރު ހިދުމަތް ކުރެއްވި ބޭފުޅެކެވެ. އަދި 2011 ވަނަ އަހަރު އޭނާ ވަނީ ޝަރަފުވެރިކަމާއެކު ސިފައިންގެ ހިދުމަތުން ރިޓަޔާ ކުރައްވާފަ އެވެ. އޭރު މުނާޒް ހުންނެވީ ފަސްޓް ލެފްޓެނަންޓްގެ މަގާމުގަ އެވެ.
އެމްއެންޑީއެފްގެ ވަޒީފާއިން ވަކިވެ ވަޑައިގަތް ފަހުން ޑިޕާޓްމަންޓް އޮފް ޕެނިޓެންޝަރީ އެންޑް ރިހެބިލިޓޭޝަން ސާވިސް އުފެއްދެވުމާ ގުޅިގެން އޭނާ ވަނީ އެތާނގެ ސްޕްރިންޓެންޑެންޓްގެ ގޮތުގައި ޖަލުގެ އެންމެ އިސްވެރިޔާގެ މަގާމު އަދާ ކުރައްވާފައެވެ.
ކޮމިޝަނަރު އޮފް ޕްރިޒަންސްގެ މަގާމުން މުނާޒް ވަކިކުރައްވާ އެ މަގާމަށް އެހެން ބޭފުޅަކު މިހާރު ވަނީ ހަމަޖައްސަވާފަ އެވެ. އެ މަގާމަށް ރައީސް ހަމަޖެއްސެވީ އިންސްޕެެކްޓަރު އޮފް ކަރެކްޝަންސްގެ މަގާމުގައި ހުންނެވި އަހުމަދު މުހައްމަދުފުޅެވެ.