ޕްރައިމަރީއަށް ފުރިހަމައަށް ތައްޔާރު: އެމްޑީޕީ

މިއަދު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބުގެ އެމްޑީޕީ ޕްރައިމަރީއަށް ފުރިހަމައަށް ތައްޔާރުވެފައިވާ ކަމަށް އެ ޕާޓީން ބުނެފި އެވެ.

އަވަސްއާ ވާހަކަދައްކަވަމުން އެމްޑީޕީގެ އިންތިހާބާބެހޭ ކޮމެޓީގެ މުގައްރިރު އަދި ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އިބްރާހީމް މުއިއްޒު ވިދާޅުވީ ޕްރައިމަރީގެ ވޯޓް ނެގުމަށް ވާންޖެހޭ ހުރިހާ ތައްޔާރީތަކެއް ނިމިފައިވާ ކަމަށެވެ. އަދި 14:30 ގައި ހުރިހާ ސަރަހައްދެއްގައިވެސް ވޯޓް ނެގުމަށް ތައްޔާރުވެފައިވާ ކަމަށެވެ. ވޯޓް ނެގުން މިރޭ 7:30 ހާ ހަމައަށް ކުރިއަށްދާނެއެވެ.

އެމްޑީޕީގެ ޕްރައިމަރީއަށް މާލޭގެ ހަ ތަނެއްގައި ވޯޓު ފޮށި ބަހައްޓާނެއެވެ. އަދި ވިލިމާލޭގެ އިތުރުން ހުޅުމާލޭގައި އެއް ވޯޓު ފޮށި ހުންނާނެއެވެ.

ވޯޓުފޮށި ބެހެއްޓުމަށް ހަމަޖެހިފައިވާ ތަންތަން

އެމްޑީޕީން ބުނެފައިވާ ގޮތުން 90،000 އަށްވުރެ ގިނަ މީހުނަށް އެ ޕާޓީގެ ޕްރައިމަރީގައި ވޯޓު ލެވެ އެވެ. ޕްރައިމަރީގައި 1246 ކެންޑިޑޭޓުން ވާދަކުރާނެ އެވެ.

ޕްރައިމަރީގައި އެންމެ ގިނަ ބައެއްގެ ނަޒަރު ހުއްޓިފައިވަނީ ސިޓީތަކުގެ މޭޔަރު ކަމަށް ވާދަކުރުމަށް އެމްޑީޕީގެ ޓިކެޓް ހޯދާނެ ކެންޑިޑޭޓުންނަށެވެ. ސިޓީ ކައުންސިލްތަކަށް ވާދަކުރުމަށް އެމްޑީޕީގެ ޓިކެޓް ހޯދުމަށް 108 މެންބަރަކު ފޯމް ހުށައަޅާފައިވާއިރު، އަތޮޅު ކައުންސިލްތަކަށް ވާދަކުރުމަށް އެޕާޓީގެ ޓިކެޓް ހޯދުމަށް 53 މެންބަރަކު ވަނީ ފޯމް ހުށައަޅާފައެވެ.

މާލޭގެ މޭޔަރު ކަމަށް ހަތް ބޭފުޅަކު ވާދަކުރައްވައެވެ. އައްޑޫ ސިޓީގެ މޭޔަރު ކަމަށް ތިން ބޭފުޅަކު ވާދަކުރައްވައެވެ. އަދި ފުވައްމުލައް ސިޓީގެ މޭޔަރު ކަމަށް ހަތަރު ބޭފުޅަކު ވާދަ ކުރައްވައެވެ.

މާލޭގެ މޭޔަރު ކަމަށް ވާދަކުރައްވާ ބޭފުޅުން

އައްޑޫގެ މޭޔަރު ކަމަށް ވާދަކުރައްވާ ބޭފުޅުން

ފުވައްމުލައް މޭޔަރު ކަމަށް ވާދަކުރައްވާ ބޭފުޅުން

އެމްޑީޕީގެ ކެންޑިޑޭޓުން ކަނޑައެޅުމަށް ބާއްވާ އެ ޕާޓީގެ އެތެރޭގެ ޕްރައިމަރީގެ 389 ގޮނޑިއަށް އެންމެ ކެންޑިޑޭޓަކު ކުރިމަތިލާފައިވާތީ ޕްރައިމަރީއަކާ ނުލައި އެ ކެންޑިޑޭޓުންގެ ޓިކެޓް ވަނީ ކަށަވަރުވެފައެވެ.

މުއިއްޒު ވިދާޅުވީ، ރަށު ކައުންސިލްތަކުގެ ޕްރައިމަރީގައި 381 ގޮނޑިއަކަށް ކުރިމަތިލީ އެންމެ ކެންޑިޑޭޓެއް ކަމަށެވެ.

އަތޮޅު ކައުންސިލްތަކުގެ ޕްރައިމަރީގެ ތެރެއިން ދެ އަތޮޅު ކައުންސިލްގެ ރައީސްގެ މަގާމަށް ކުރިމަތިލާފައި ވަނީ އެންމެ ކެންޑިޑޭޓެކެވެ. އެއީ ހއ. އަތޮޅު ކައުންސިލްގެ ރައީސްގެ ޓިކެޓާއި ފ. އަތޮޅު ކައުންސިލްގެ ރައީސްގެ ޓިކެޓެވެ. އެ ދެ ކެންޑިޑޭޓުންނަށް ވެސް ޓިކެޓު ވަނީ ކަށަވަރުވެފަ އެވެ.

ސިޓީތަކުގެ ތެރެއިން ޓިކެޓު ކަށަވަރު ކުރެވިފައި ވަނީ މާލެ ސިޓީގެ ފަސް ދާއިރާގެ ޓިކެޓާއި ފުވައްމުލައް ސިޓީގެ އެއް ދާއިރާގެ ޓިކެޓަށް ކުރިމަތިލި ކެންޑިޑޭޓަށެވެ. އެއީ ފުވައްމުލައް ހުޅަނގު ދާއިރާއާއި، މާލެ ސިޓީގެ ހެންވޭރު އުތުރު ދާއިރާ، ގަލޮޅު ހުޅަނގު ދާއިރާ، މާންފަންނު ހުޅަނގު އުތުރު ދާއިރާއާއި، މާފަންނު ހުޅުނގު ދާއިރާ އަދި މާފަންނު މެދު ދާއިރާގެ ޓިކެޓެވެ.

އެމްޑީޕީގެ ޓިކެޓު 389 ކެންޑިޑޭޓުން ކަށަވަރުކޮށްފައިވާއިރު، އަންނަ އޭޕްރީލް މަހުގެ ހަތަރުވަނަ ދުވަހު ބާއްވާ ކައުންސިލް އިންތިހާބުގައި 980 ކެންޑިޑޭޓުން އިންތިހާބު ކުރަން ޖެހެ އެވެ. އޭގެ ތެރެއިން ބައެއް ގޮނޑިތަކަށް ވާދަކުރާ ކެންޑިޑޭޓުން ޕްރައިމަރީއަކުން ކަނޑައަޅާއިރު ބައެއް ގޮނޑިތަކަށް އެއްވެސް މީހަކު ކުރިމަތިލާފައެއް ނުވެ އެވެ.

އެމްޑީޕީގެ ޕްރައިމަރީއަށް ކުރިމަތިލާން ހުޅުވާލި ފުރުސަތުގައި ރ. މީދޫ އާއި ޅ. އޮޅުވެލިފުށީގެ އެއްވެސް ގޮނޑިއަކަށް މީހަކު ކުރިމަތިލާފައެއް ނުވެ އެވެ. އަދިވެސް ބައެއް ރަށްރަށުގެ ގޮނޑިތަކަކަށް ކުރިމަތިނުލާ ގޮނޑިތައް އެބަހުއްޓެވެ.

އެމްޑީޕީގެ ޗެއާޕާސަންގެ ނައިބު އަދި މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒު ވިދާޅުވީ އެ ގޮނޑިތަކަށް ވެސް ކެންޑިޑޭޓުން ހަމަޖެއްސުމަށް އެ ދާއިރާތަކުގެ އެމްޑީޕީގެ މެންބަރުންނާ މަޝްވަރާކޮށްގެން ހަމަޖެއްސުމަށް މަސައްކަތް ކުރަމުންދާ ކަމަށެވެ. އަދި އެމްޑީޕީގެ އަމާޒަކީ ހުރިހާ ގޮނޑިއަކަށް ވެސް ވާދަކުރާނެ އެމްޑީޕީގެ ކެންޑިޑޭޓުން ނެރުން ކަމަށް ވިދާޅުވި އެވެ.