އުފެދުންތެރި އަދި އީޖާދީ ވިޔަފާރިތަކަށް އެހީވާން 20 މިލިއަން ރުފިޔާގެ ފަންޑެއް، މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އިން ތައާރަފުކޮށްފި އެވެ.
އެމްއެފްއެމްސީއަކީ އީޖާދީ މަސައްކަތް ކުރާ ފަރާތްތަކުގެ ވިޔަފާރި ކުރިއެރުވަން އިންވެސްޓް ކުރާ ކުންފުންޏެކެވެ.
މި ކުންފުނިން އިންވެސްޓް ކުރާ ދާއިރާތަކުގެ ތެރޭގައި ޓެކްނޮލޮޖީ އާއި ޓޫރިޒަމްގެ ސިނާއަތަށް ބޭނުންވާ އެހެނިހެން ހިދުމަތްތައް ފޯރުކޮށް ދިނުން ހިމެނެ އެވެ. މީގެ އިތުރުން ސިއްހީ ދާއިރާގެ ހިދުމަތްތަކާއި ދަނޑުވެރި ކަމާއި ކާބޯ ތަކެތީގެ ޔަގީންކަން ހޯދުމުގެ ދާއިރާ ހިމެނެ އެވެ. އަދި އާޓާއި ސަގާފަތާއި ޓެކްނޮލޮޖީ މެދުވެރިކޮށް ކުރާ މާލީ މުއާމަލާތްތައް ހަރުދަނާ ކުރުމުގެ ދާއިރާ ހިމެނެ އެވެ.
ހޮޓެލް ޖެންގައި ރޭ ބޭއްވި ރަސްމިއްޔާތެއްގައި ފަންޑު މެނޭޖު ކުރަން އުފައްދާފައިވާ ކުންފުނިން މި ހާއްސަ ފައިނޭޝަލް ޕްރޮޑަކްޓް ތައާރަފު ކޮށްދެއްވީ އިކޮނޮމިކް މިނިސްޓަރު ފަޔާޒު އިސްމާއީލެވެ.
މިނިސްޓަރު ފައްޔާޒު ވިދާޅުވީ މި ފަންޑުން އެހީ ވާނީ ޓެކްނޮލޮޖީގެ އެކި ދާއިރާ ތަކަށް އެހީވެރިކަން ފޯރުކޮށް ދިނުމަށް ކަމަށެވެ.
ސަރުކާރުން ވަނީ ކުދި އަދި މެދުފަންތީގެ ވިޔަފާރިތަކަށް ލޯނު ދިނުމަށް އެސްއެމްއީ ފައިނޭންސް ޑިވްލޮޕްމަންޓް ކޯޕަރޭޝަން (އެސްޑީއެފްސީ) ގެ ނަމުގައި ބޭންކް އެއް ގާއިމްކޮށްފަ އެވެ. މި ބޭންކުގެ ފުރަތަމަ އަހަރު 450 މިލިއަން ރުފިޔާގެ ލޯނު ދޫކޮށްފައިވެ އެވެ.