ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ވާދަކުރާ ސިޔާސީ ޕާޓީތަކުގެ ކެންޑިޑޭޓުން ކަނޑައެޅުމަށް ބާއްވާ އެ ޕާޓީތަކުގެ އެތެރޭގެ ޕްރައިމަރީއަށް ބޭނުންވާ ވޯޓު ފޮށިތައް އެކަމަށް އެދުމުން ހަމަޖައްސައިދޭނެ ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އަހްމަދު އަކްރަމް ވިދާޅުވެއްޖެ އެވެ.
މިދިޔަ ހުކުރު ދުވަހު ބޭއްވި އެމްޑީޕީގެ ޕްރައިމަރީއާއި ގުޅޭ ގޮތުން އިދިކޮޅު ކޯލިޝަންގައި ހިމެނޭ ޕީއެންސީގެ ނައިބު ރައީސް އަހްމަދު ޝުޖާއު ކުރެއްވި ޓްވީޓެއްގައި ވިދާޅުވީ އެމްޑީޕީގެ ޕްރައިމަރީ ބާއްވާފައި ވަނީ އީސީގެ މުދާ ބޭނުން ކޮށްގެން ކަމަށާއި އެއީ ދައުލަތުގެ މުދާ ކަމުން އެކަން އެ ގޮތަށް ވެގެން ނުވާނެ ކަމަށެވެ.
ޝުޖާއު ވިދާޅުވީ އެމްޑީޕީއަށް އެ ފުރުސަތު ދޭނަމަ ޕީޕީއެމް އަށް ވެސް އެ ފުރުސަތު އޮންނަން ވާނެ ކަމަށެވެ. އަދި އީސީގެ ނައިބު ރައީސް އަކްރަމް އަކީ އެމްޑީޕީން ބޭނުންވާ ގޮތަކަށް ކަންކަން ހަމަޖައްސައިދިނުމަށް އެ ކޮމިޝަނުގައި ހުންނަ އެ ޕާޓީގެ އެޖެންޓެއް ކަމަށް ވެސް ޝުޖާއު ތުހުމަތު ކުރެއްވި އެވެ.
މި ކަމާ ގުޅޭ ގޮތުން "އަވަސް" އިން ސުވާލު ކުރުމުން އަކްރަމް ވިދާޅުވީ، އެމްޑީޕީން ބޭއްވި ޕްރައިމަރީއަށް އެ ކޮމިޝަނުން ވޯޓު ފޮށި ދޫކޮށްފައިވާ ކަމަށެވެ. އަދި އެހެން ސިޔާސީ ޕާޓީތަކުން ވެސް އެ ޕާޓީތަކުގެ ޕްރައިމަރީއަށް ވޯޓު ފޮށި ދޫކޮށްދޭން އެދުމުން ދޫކޮށްދޭނެ ކަމަށް އޭނާ ވިދާޅުވި އެވެ.
އަކްރަމް ވިދާޅުވީ، އަންނަ ހުކުރު ދުވަހު ބާއްވާ ޕީޕީއެމްގެ ޕްރައިމަރީއަށް ވެސް އީސީން ވޯޓު ފޮށި ދޫކޮށްދިނުމަށް އެދި މިއަދު ހުށަހަޅާފައިވާ ކަމަށެވެ. އެހެންކަމުން ޕީޕީއެމްގެ ޕްރައިމަރީއަށް ވެސް އީސީން ވޯޓު ފޮށި ދޫކޮށްދޭން ނިންމާފައިވާ ކަމަށް އޭނާ ވިދާޅުވި އެވެ. އަދި އެހެން ޕާޓީތަކުން ވެސް އެ ގޮތަށް އެދުމުން ވޯޓު ފޮށި ދޫކޮށްދޭނެ ކަމަށް އަކްރަމް ވިދާޅުވި އެވެ.
"މިއީ ހަމައެކަނި މި އިންތިހާބާ ގުޅިގެން އިލެކްޝަންސް ކޮމިޝަނުން ކުރި ކަމެއް ނޫން، ކޮންމެ އިންތިހާބަކާ ދިމާކޮށް ސިޔާސީ ޕާޓީތަކުން ބާއްވާ ޕްރައިމަރީއަށް ވޯޓު ފޮށި ދޫކޮށްދޭން އެ ޕާޓީއަކުން އިލެކްޝަންސް ކޮމިޝަނަށް ހުށަހެޅުމުން ކޮމިޝަނުން އެ ކަންކަން ހަމަޖައްސައިދޭނެ،" އަކްރަމް ވިދާޅުވި އެވެ.
އަކްރަމް ވިދާޅުވީ އީސީން އަދި އޭނާ ހިމެނިވަޑައިގަންނަވާ ގޮތަށް އެ ކޮމިޝަންގެ އެއްވެސް މެންބަރަކު ވަކި ސިޔާސީ ޕާޓީއަކަށް ވަކި ގޮތެއް ހޯދައި ނުދޭނެ ކަމަށެވެ. އެމްޑީޕީގެ ޕްރައިމަރީއަށް ވޯޓު ފޮށި ދޫކޮށްދިން ގޮތަށް ޕީޕީއެމްގެ ޕްރައިމަރީއަށް ވެސް ކޮމިޝަނުން ވޯޓު ފޮށި ދޫކޮށްދޭނެ ކަމަށް ވިދާޅުވި އެވެ.