ކުރީ ސަރުކާރުން ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ "ހިޔާ" ފްލެޓުތައް ދޫކުރި ގޮތާ ގުޅިގެން ކަމަށް ބުނެ މައްސަލަތައް ބަލަން މަސައްކަތް ކުރަނީ މާލޭގެ މޭޔަރު ކަމަށް ވާދަކުރައްވާފާނެތީ ބިރުން ކަމަށް ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ކައުންސިލް އިންތިހާބުގައި މާލޭގެ މޭޔަރު ކަމަށް ޕީޕީއެމްގެ ޓިކެޓްގައި ނިކުންނަވާނީ މުއިއްޒު ކަމަށް އިދިކޮޅު ކޯލިޝަނުން ވަނީ އިއުލާނުކޮށްފައެވެ. ނަމަވެސް އެފަދަ ނިންމެވުމެއް ނިންމެވި ކަމެއް މުއިއްޒު ވިދާޅެއް ނުވެއެވެ.
އިދިކޮޅު ޕްރޮގްރެސިވް ކޯލިޝަނުން ރޭ ބޭއްވި މިއަހަރުގެ ފުރަތަމަ ޖޮއިންޓް ކައުންސިލް ބައްދަލްވުމުގައި ވާހަކަ ދައްކަވަމުން މުއިއްޒު ވިދާޅުވީ މައްސަލަތައް ބަލަން ފަށަނީ މާލޭގެ މޭޔަރު ކަމަށް ނިކުމެދާނެ ކަމަށް ދެކިގެން ކަމަށެވެ. މުއިއްޒު ވިދާޅުވީ އިދިކޮޅުން ކުރި އިިއުލާނަކުން މިވަރުވާއިރު، މޭޔަރު ކަމަށް ވާދަކުރެއްވުމަށް ފޯމް ހުށައަޅައިފިނަމަ އަދި ކޮށްލާނެ ވަރުވެސް ނޭންގޭ ކަމަށެވެ.
"އަޅުގަނޑު ހިތަށް އަރާ، މިވެގެން އުޅޭގޮތަކީ ކުރިއަށް އޮތް ލޯކަލް ކައުންސިލް އިންތިހާބުގައި ޕީޕީއެމްގެ ފަރާތުން އަޅުގަނޑު މާލޭގެ މޭޔަރު ކަމަށް ނިކުމެދާނެ ކަމަށް ދެކި، ޕީޕީއެމްގެ ފަރާތުން މިހާތަނަށް ވަނީ.. ޕީޕީއެމާއި ޕީއެންސީގެ އިސްވެރިން ވަނީ މި ކަމަށް ވަރަށް ބޮޑަށް ވާހަކަ ދައްކަވާފައި. މިވަރަށް މިވާހަކަ ދެކެވިފައިވާތީ އަޅުގަނޑު ނިކުމެދާނެ ކަމުގެ ބިރަށް މި ބޭފުޅުން ހަމަ ކުރާ ކަންކަމޭ. އަޅުގަނޑު ހިތަށް އަރާ މި ފޯމް، ކައުންސިލް އިންތިހާބަށް މާލޭ މޭޔަރު ކަމަށް ކުރިމަތިލާ ފޯމް އިލެކްޝަންސް ކޮމިޝަނަށް ލައިފިނަމަ އަދި ކިހާވަރެއްވާނެބާއޭ..." މުއިއްޒު ވިދާޅުވިއެވެ.
މާލޭގެ މޭޔަރުގެ ރޭހަށް ނިކުންނަވާނެ ކަމެއް ރޭ ވެސް މުއިއްޒު ވިދާޅެއް ނުވިއެވެ. ނަމަވެސް ވިދާޅުވީ ބިރު ދައްކައިގެން، މައްސަލަތައް ބަލައިގެން ފަހަތަށް ނުޖެހޭނެ ކަމަށެވެ.
"ކިތަންމެ ބޮޑު ތުހުމަތެއް އަޅުގަނޑުގެ ބޮލުގައި އެޅުވިނަމަވެސް، ކިތަންމެ ނުރައްކަލެއް އަޅުގަނޑުމެންނާ ކުރިމަތި ކުރިކަމުގައިވިޔަސް އަދި ކިތަންމެ ބޮޑު އަދަބެއް ނުހައްގުން ދިން ނަމަވެސް، ދީނާ ގައުމުގެ ހައްގުގައި ކުރަންޖެހުނު ކޮންމެ މަސައްކަތެއް ކުރުމުގައި އަޅުގަނޑު ފަހަތަށް ނުޖެހި ސާބިތުކަމާއެކު ކުރިއަށްދާނެ ކަމުގެ ޔަގީންކަން އަރުވަން."
ފުރަތަމަ ފަހަރަށް އާންމުކޮށް ހުޅުވާލައިގެން ބޭއްވި މާލެ ސިޓީ ކައުންސިލްގެ ބައްދަލުވުމުގައި އެ ކައުންސިލުން ވަނީ ހިޔާ މަޝްރޫއާ ގުޅޭ ބައެއް ކަންކަމާ ގުޅޭ ގޮތުން މަޝްވަރާކޮށްފަ އެވެ. އެގޮތުން ހިޔާ މަޝްރޫއުގެ 7000 ފްލެޓު ދޫކޮށްފައި ވަނީ އޭގެ ހައްގުވެރިންނަށްތޯ ކަށަވަރު ކުރުމަށާއި އެ ފްލެޓުތަކުގެ ހައްގުވެރި ފަރާތްތަކަށް ލިބިދެވޭނޭ ގޮތެއް ހޯދުމަށް ސަރުކާރުން މިހާތަނަށްކޮށްފައި ހުރި މަސަައްކަތްތަކަކީ ކޮބައިކަން ބަލަން އެ ކައުންސިލުން ނިންމި އެވެ.
އޭގެ އިތުރުން ކުރީގެ ހައުސިން މިނިސްޓަރު މުހައްމަދު މުއިއްޒު އާއި ކުރީ ސަރުކާރުގައި އެ މަސައްކަތުގައި އިސްކޮޅު އުޅުއްވި ބޭފުޅުން ހިޔާ ފްލެޓުތައް ދޫކުރުމުގެ މަސައްކަތް ކޮށްފައި ހުރި ގޮތާމެދު ޖިނާއީ ތަހުގީގެއް ހިންގަން ފުލުހުންނަށް ހުށަހެޅުމަށް އެ ކައުންސިލުން ވަނީ ނިންމައިފަ އެވެ.
މީގެ އިތުރުން ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި) އަށް ދައުލަތުން ބަދަލު ދޭން ޖެހުނު މައްސަލައާ ގުޅިގެން ރައްޔިތުންގެ މަޖިލީހުގެ މާލިއްޔަތު ކޮމިޓީގައި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ދޮގު ހެއްދެވި ކަމަށް ބުނާ މައްސަލަ ފުލުހަށް ފޮނުވަން މަޖިލީހުން ވަނީ ނިންމާފައެވެ.
ނޫމަޑިން ސަރުކާރުގެ ފަރާތުން ބަދަލުގެ ގޮތުގައި ގާތްގަނޑަކަށް 155 މިލިއަން ޑޮލަރާއި އާބިޓްރޭޝަނާގުޅޭ އިތުރު ހަރަދުތައް ހޯދަން އެދި ނެދަލޭންޑްސްގެ ދަ ހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަނަށް ދެ މައްސަލައެއް ހުށަހެޅި އެވެ. އެ މައްސަލަތަކާ ގުޅިގެން އެ އެއްބަސްވުން އުވާލިއިރު ހައުސިން މިނިސްޓަރު ކަމުގައި ހުންނެވި މުއިއްޒު ވަނީ އެ އާބިޓްރޭޝަނަށް ވަނީ ބަޔާން ދެއްވައިފަ އެވެ.