މުސްލިމް މުޖްތަމައުއެއްގައި ދީނާ ދުރު ކަންކަން އާންމުވާނަމަ، ހަރުކަށި ފިކުރުގެ މީހުން މުޖްތަމައުއަށް އަތްގަދަ ކުރުމަކީ ގާތް ކަމެއް ކަމަށް ކުރީގެ ޑިފެންސް މިނިސްޓަރު އަދި މަޖިލީހުގެ ދަނގެތީ ދާއިރާގެ މެންބަރު މުހައްމަދު ނާޒިމް ނާޒިމް ވިދާޅުވެއްޖެ އެވެ.
ނާޒިމް މިހެން ވިދާޅުވީ އަންގާރަ ދުވަހުގެ ރޭ ހުޅުމާލޭގައި ފަތުރުވެރިންތަކަކަށް ތޫނު އެއްޗަކުން ހަމަލާދިން މައްސަލައާއި ގުޅިގެން ކަންބޮޑުވުން ފާޅު ކުރައްވަ އެވެ.
ނާޒިމް ވިދާޅުވީ ފަތުުރުވެރިންތަކަކަށް ހަމަލާ ދިނުމަކީ ވަރަށް ބޮޑަށް ކަންބޮޑުވެވަޑައިގަންނަވާ ކަމެއް ކަމަށާ އެފަދަ ކަންކަން ތަކުރާރު ނުވާނެ ގޮތެއްގެ މަތިން ފިޔަވަޅުތައް އަޅަންޖެހޭ ކަމަށެވެ. އަދި މުސްލިމް މުޖްތަމައުއެއްގައި ދީނާ ދުރު ކަންކަން އާންމުވާނަމަ، ހަރުކަށި ފިކުރުގެ މީހުން މުޖްތަމައުއަށް އަތްގަދަ ކުރުމަކީ ގާތްކަމެއް ވިދާޅުވި އެވެ.
"މިކަންކަން ހުއްޓުވުމަށްޓަކައި ދީނީ ސައްހަ މައުލޫމާތު އުނގަންނައިދިނުން އާންމު ކުރުން ވަރަށް މުހިންމު."
ފަތުރުވެރިންތަކަކަށް ތޫނު އެއްޗަކުން ހަމަލާދިން މައްސަލައާއި ގުޅިގެން ކަންބޮޑުވުން ފާޅުކުރައްވާ ކުރެއްވި ޓްވީޓެއްގައި ތިމަރަފުށީ ދާއިރާގެ މެންބަރުކަން ވެސް ކުރައްވަމުން ގެންދަވާ ކުރީގެ ސީޕީ ވިދާޅުވީ ރައްޔިތުންނާއި ފަތުރުވެރިންގެ ރައްކާތެރިކަމަށް ވަގުތުން އަޅަންޖެހޭ ފިޔަވަޅުތައް އެޅުމަށް ސްވޮޓް ފުލުހުން ފިސްތޯލް ހިފައިންގެ ރަށުތެރޭގައި ހަރަކާތްތެރިވާންޖެހޭ ހާލަތަށް އަތުވެއްޖެ ކަމަށް ދެކޭ ކަމަށެވެ. އަދި ގައުމު އަމާން ކުރެވޭނީ ފުލުހުން ބާރުވެރި ކޮށްގެން ކަަމަށް ވިދާޅުވިއެވެ.
ނަމަވެސް ފުލުހުންނަށް ހަތިޔާރު ހަވާލުކުރުމަކީ ސަރުކާރުން ހަދާނެ އެންމެ ބޮޑު ގޯސް ކަމަށް ވިދާޅުވެ އެކަން ނުކުރެއްވުމަށް މާލޭ އޭރިޔާގެ ކުރީގެ ކޮމާންޑަރު އަދި ކުރީގެ މެންބަރު އިބްރާހިމް މުހައްމަދު ދީދީ ވަނީ ގޮވާލައްވާފަ އެވެ.
ދީދީ ވިދާޅުވީ ފިސްތޯލަ ހިފައިންގެ ނިކުންނަންވީ ސިފައިން ކަމަށެވެ. ސަލާމަތީ ހިދުމަތްތައް ރޭވިފައިވާ ގޮތުން ލީތަލް ހަތިޔާރާއެކު ނިކުންނަންވާނީ ދިފާއީ ބާރުން ކަމަށް ދީދީ ވިދާޅުވިއެވެ.
"މިއީ އެހެން ގައުމަކާއި ހަނގުރާމަ ކުރަން ދުވަހަކުވެސް ޖެހޭނެ ގައުމެއް ނޫން."
އިބްރާހިމް ދީދީ ވިދާޅުވީ މިހާރުން މިހާރަށްވެސް ކުރަންޖެހޭ ކަމަކީ ފުލުހުންނަށް ލީތަލް ހަތިޔާރު ހޯދަން ގޮވަންނުޖެހޭ މިންވަރަށް ސިފައިން ނިކުމެ ގައުމު އަމާން ކުރުން ކަމަށެވެ.
"ދިވެހިރާއްޖޭގައި ފުލުހުންނަށް ލީތަލް ހަތިޔާރު ހަވާލުކުރުމަކީ ސަރުކާރުން ހަދާނެ އެންމެ ބޮޑު ގޯސް." އިބްރާހިމް ދީދީ ވިދާޅުވިއެވެ.
ހުޅުމާލޭގައި ދިން ވަޅީގެ ހަމަލާ އާ ގުޅިގެން ފުލުހުން ބޭއްވި ނިއުސް ބްރީފިންގައި ބުނީ، އެ މައްސަލައާއި ގުޅިގެން މިހާތަނަށް ހަ މީހަކު ހައްޔަރު ކޮށްފައި ކަމަށެވެ. ހައްޔަރުކޮށްފައިވަނީ މުޅިންވެސް ދިވެހިންނެވެ.
ފުލުހުން ބުނީ މި ހަމަލާދީފައިވަނީ ހަރުކަށި ފިކުރުގެ ބައެއް ކަމަށް ވަރަށް ބޮޑަށް ތުހުމަތު ކުރެވޭ ކަމަށެވެ.