ރައީސް އިބްރާހިމް މުހައްމަދު ސޯލިހުގެ ކާރުކޮޅުގެ މައްޗަށް ގެއަކުން ފެން އެއްޗެއް ބަންޑުން ކޮށްލީ ގަސްތުގައި ނޫން ކަމަށް ފުލުހުން މިއަދު ބުނެފި އެވެ.
މިދިޔަ ހޮނިހިރު ދުވަހުގެ ހެނދުނުގެ ވަގުތެއްގައި، ރައީސް ސޯލިހުގެ ކާރުކޮޅުގެ މައްޗަށް ހެންވޭރުގައި ހުރި އިމާރާތެއްގެ އެޕާޓްމަންޓަކުން ފެން އެއްޗެއް ބަންޑުން ކޮށްލި މައްސަލައެއް ފުލުހުން ބެލި އެވެ.
ނަމަވެސް، އެކަމާ ގުޅިގެން ބެލި ބެލުމުގައި، އެ ފެންއެތި ބަންޑުންވީ އެގޭގެ ޓެރަސްމަތީގައި ހުރި ގަސްތަކަކަށް ފެން ދިނުމުގެ ތެރޭގައިކަމަށް އެނގިފައިވާކަމަށް ފުލުހުން މިއަދު ބުންޏެވެ.
"... އެއީ ގަސްތުގައި މީހަކު ކުރި ކަމެއް ނޫންކަން ފުލުހުންގެ ތަހުގީގަށް ފާހަގަ ކުރެވިފައިވޭ،" ފުލުހުން މިއަދު ބުނެފައިވެ އެވެ.
އެ ހާދިސާގައި ހިނގި ވަގުތު ކާރުކޮޅުގައި ރައީސް ނެތް ކަމަށްވެސް ފުލުހުން މީގެ ކުރިން ބުނެފައި ވެއެވެ.