ލޯކަލް މާރުކޭޓްގެ މައްސަލަ ވަރަށް އަވަހަށް ހައްލު ވެގެންދާނެ ކަމަށާއި ގޮޅިތައް ލިބޭ މީހުންގެ ލިސްޓް ފައިނަލް ކުރުމުގެ މަސައްކަތް މިހާރު ސިޓީ ކައުންސިލުން ކުރަމުންދާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މާލޭގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއު ފެށުމުގެ ގޮތުން ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ދަތުރުވެރިންގެ މާރުކޭޓުގެ މައްސަލައަށް ހައްލެއް ހޯދި، 178 ގޮޅި އެތަނުގައި ހަމަޖެހިފައިވާ ކަމަށެވެ. ލިސްޓް ފައިނަލް ކުރުމުގެ މަސައްކަތް، ސިޓީ ކައުންސިލުން ކުރަމުންދާ ކަމަށެވެ.
"...އަދި އޭގެއިތުރުން، ކުރިއަށް އޮތް ރޯދަމަހަށް ވަގުތީގޮތުން މާރުކޭޓެއް ތައްޔާރުކޮށް، މާލޭގެ ރައްޔިތުންނަށާއި އަދި މާލެއަށް އަންނަ، އަތޮޅުތަކުން އަންނަ ދަތުރުވެރިންނަށް، ގެންނަ ތަކެތި ވިއްކޭނެ އިންތިޒާމު، އިރާދަކުރެއްވިއްޔާ އަޅުގަނޑުމެން ހަމަޖައްސާނަން،" ރައީސް ވިދާޅުވި އެވެ.
ދަތުރުވެރިންގެ މާރުކޭޓު ބަންދު ކުރީ މަރާމާތުކޮށް އާބާތުރަ ފިލުވައި ގޮޅިތަކަށް ބައެއް ބަދަލު ގެނައުމަށް ކަމަށް ބުނެ މިދިޔަ އަަހަރުގެ އޯގަސްޓް މަހުގެ 31 ވަނަ ދުވަހު އެވެ. ނަމަވެސް އޭގެ ފަހުން ގިނަ ދުވަސްތަކެއްވީއިރު ވެސް ހުސްކޮށް ބަންދު ކުރުން ފިޔަވައި މާރުކޭޓަށް އެއްވެސް ބަދަލެއް ގެނެސްފައެއް ނުވެ އެވެ.
މިހާރު އެއްޗެހި ވިއްކާ މީހުން ތަކެތި ބަހައްޓާފައި ހުންނަނީ މަގުމަތީ، ޕްލެޓްގަނޑެއް މަތީގަ އެވެ. އެތަނުގައި ގޮނޑިއެއް ބަހައްޓައިގެން އެމީހުން އަވީގައި އެކަން ކުރާތާ އެތައް ދުވަހެކެވެ. އެކަމުގެ ޝަކުވާ އެމީހުންގެ ވަރަށް ބޮޑެވެ.