ޕީޕީއެމް

ކައުންސިލް އިންތިހާބު: ޕީޕީއެމްގެ ކެންޕެއިން ފެށުން ހުކުރު ދުވަހުގެ ރޭ

Feb 22, 2020

ލޯކަލް ކައުންސިލް އިންތިހާބުގައި ވާދަ ކުރާ ޕީޕީއެމްގެ ކެންޑިޑޭޓުންގެ ކެންޕޭން ހުކުރު ދުވަހުގެ ރޭ ފެށުމަށް ނިންމައިފި އެވެ.

ޕީޕީއެމުން މިއަދު ބޭއްވި ނޫސްވެރިންގެ ބައްދަލްވުމުގައި އެ ޕާޓީގެ ނާއިބް ރައީސް އިބްރާހިމް ޝުޖާއު ވިދާޅުވީ އަންނަ ހުކުރު ދުވަހުގެ ރޭ ބާއްވާ ހާއްސަ ޖަލްސާއަކާއެކު ކައުންސިލް އިންތިހާބުގެ ކެންޕެއިން އެ ޕާޓީން ފަށާނެ ކަމަށެވެ. މިހާތަނަށް އެއްވެސް ކެންޕެއިނަކަށް ތައްޔާރުނުވާ މިންވަރަށް އެޕާޓީން ކައުންސިލް އިންތިހާބުގެ ކެންޕެއިނަށް ތައްޔާރުވަމުންދާ ކަމަށް ޝުޖާއު ވިދާޅުވިއެވެ.

"މި ކެންޕެއިން، ޕީޕީއެމްގެ ތާރީހުގައިވެސް ތައްޔާރުނުވާ މިންވަރަށް އަޅުގަނޑުމެން މިދަނީ ތައްޔާރުވަމުން. އެގޮތުން ކެންޕެއިން ލޯންޗިންއަކީވެސް ތަފާތު ޖަލްސާއަކަށް ވެގެންދާނެ. ތަފާތު ގިނަ ކަންތައްތައް އެ ޖަލްސާއިން ދިވެހި ރައްޔިތުންނާ ބައްދަލްކުރާނެ." ޝުޖާއު ވިދާޅުވިއެވެ.

ޕީޕީއެމުން ބުނީ ހުކުރު ދުވަހު ކެންޕެއިން ރަސްމީކޮށް ފެށުމުގެ ޖަލްސާ ބޭއްވި ނަމަވެސް އަންގާރަ ދުވަހުން ފެށިގެން ރާއްޖޭގެ އެކި ކަންކޮޅުތަކަށް ޕީޕީއެމް/ޕީއެންސީގެ ޓީމުތައް ދަތުރުކުރާނެ ކަމަށެވެ. އެގޮތުން މިމަހުގެ 24 ފެށިގެން 27 އަށް އައްޑޫ ސިޓީއަށް ހާއްސަ ދަތުރުތަކެއް ކުރުމަށް ވަނީ ހަމަޖެހިފައެވެ.

އަދި ބޮޑެތި ހުރިހާ އަތޮޅުތަކަށް ޕީޕީއެމް/ޕީއެންސީގެ އިސް ސަފުގައި ތިބި ފަރާތްތަކުން ދަތުރުކޮށް ކެންޑިޑޭޓުންނަށް ކެންޕެއިން ކޮށްދޭނެ ކަމަށެވެ.

ކުރިއަށް އޮތް ލޯކަލް ކައުންސިލް އިންތިހާބުގައި އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން 675 ކެންޑިޑޭޓުން ވާދަކުރާނެ ވަނީ ބުނެފައެވެ.

ޕީއެންސީގެ ރައީސް އަދި ފޮނަދޫ ދާއިރާގެ ކުރީގެ މެންބަރު އަބްދުއްރަހީމް އަބްދުﷲ ވިދާޅުވީ ކައުންސިލް އިންތިހާބަށް ފުރުސަތު ހުޅުވާލުމުން ޕާޓީގެ މެންބަރުންގެ ފަރާތުން ބޮޑު ތަރުހީބެއް ލިބިފައިވާ ކަމަށެވެ. އެ ގޮތުން ކައުންސިލް އިންތިހާބުގައި 675 ކެންޑިޑޭޓުން ޕީޕީއެމްގެ ފަރާތުން ވާދަކުރާނެ ކަމަށް އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ ރައީސް ޔާމީން ޖަލުގައި ހުންނަވަނިކޮށް އެޕާޓީގެ ޓިކެޓަށް އެދި ގިނަ އަދަދެއްގެ މެންބަރުން އެދުމަކީ ރައީސް ޔާމީނަށް ރާއްޖޭގައި އޮތް ތާއީދު ހާމަކޮށްދޭ ކަމެއް ކަމަށެވެ. އަދި މިއީ ރައީސް ޔާމީން މިނިވަން ކުރުމަށް މެންބަރުން ބޭނުންވާ މިންވަރު ހާމަވާ ކަމެއް ކަމަށެވެ.

އަބްދުއްރަހީމް ވަނީ ކައުންސިލް އިންތިހާބުގައި ހުރިހާ ރައްޔިތުންވެސް އެ ޕާޓީގެ ކެންޑިޑޭޓުންނަށް ވޯޓް ދިނުމަށް ގޮވާލާފައެވެ. އަދި މިއީ ގައުމު މިހާރު އޮތް ހާލަތުން ބަދަލު ކުރުމަށް ލިބޭނެ ރަނގަޅު ފުރުސަތެއް ކަމަށް އަބްދުއްރަހީމް ވިދާޅުވިއެވެ.