ދުނިޔޭގެ އެކި ގައުމުތަކުން ގިނަ އަދަދަކަށް ޝެފުން ބައިވެރި ކޮށްގެން ބޭއްވި "ކަލިނަރީ އޮލިމްޕިކްސް 2020" ގައި ރާއްޖޭގެ ހެރިޓެންސް އާރަށް ރިސޯޓަށް ގިނަ ވަނަ ތަކެއް ލިބިއްޖެ އެވެ.
ހެރިޓެންސް އާ ރަށް ރިސޯޓުން ކަލިނަރީ އޮލިމްޕިކްސްގައި ބައިވެރިވި ޝެފުން ހަތަރު ގޯލްޑް އާއި ހަތް ސިލްވާ އަދި ދެ ބްރޯންސް މެޑަލް ހޯދާފައި ވެ އެވެ.
ޖަރުމަނުގައި މިދިޔަ މަހުގެ 14 އިން 19 އަށް ކުރިއަށް ދިޔަ ކަލިނަރީ އޮލިމްޕިކްސްގައި 59 ގައުމަކުން 2000 ޝެފުން ބައިވެރިވެފައި ވެއެވެ. މި ޝެފުން 2،000 މެނޫ ތައްޔާރު ކޮށް ހުށަހަޅާފައިވެ އެވެ.
ރ. އަތޮޅުގެ އާރަށުގައި ސްރީލަންކާގެ އެއިޓްކެން ސްޕެންސް އިން ގާތްގަނޑަކަށް 50 މިލިއަން ޑޮލަރު (771 މިލިއަން ރުފިޔާ) އިންވެސްޓްކޮށްގެން ހަދާފައިވާ ހެރިޓެންސް އާ ރަށް ރިސޯޓުގައި 157 ވިލާ ހުރެ އެވެ. އޭގެ ތެރޭގައި 51 ބީޗް ވިލާ އާއި 10 ފެމެލީ ބީޗް ވިލާ އަދި 10 ޕޫލް ބީޗް ވިލާ އާއި ހަތަރު ފެމެލީ ޕޫލް ބީޗް ވިލާ އަދި 56 ވޯޓާ ވިލާގެ އިތުރުން 25 ލަގްޒަރީ ވޯޓާ އަދި ޕްރެޒިޑެންޝަލް ވޯޓާ ސުއިޓެއް ވެސް ހުރެ އެވެ.