ކައުންސިލް އިންތިހާބުގައި މާލެއިން އެމްޑީޕީއަށް އަޣުލަބިއްޔަތު ނުލިބިއްޖެނަމަ ބޮޑެތި ގެއްލުންތަކެއް ވެގެންދާނެ ކަމަށް ރައްޔިތުންގެ އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު ރޭ އެހެން ވިދާޅުވީ މާލޭގެ ބައެއް ދާއިރާތަކަށް ނިސްބަތްވާ ރައްޔިތުންނާއި ބައްދަލުކުރައްވަ އެވެ. އަހުމަދިއްޔާގައި ބޭއްވި އެ ބައްދަލުވުމުގައި މަޖިލީހުގެ ރައީސްކަން ވެސް ކުރައްވާ ކުރީގެ ރައީސް ވިދާޅުވީ އެމްޑީޕީއަށް މާލެއިން ސާފު އަޣުލަބިއްޔަތެއް ކައުންސިލް އިންތިހާބުގައި ނުލިބިއްޖެނަމަ އޮތް ގެއްލުން ދާއިރާތަކަށް ސާފުވާނެ ކަމަށެވެ.
ރައީސް ނަޝީދު ވިދާޅުވީ އެމްޑީޕީން ވައުދުތައް ފުއްދާނެ ކަމަށާއި ބޯހިޔާވަހިކަމުގެ ވައުދުތަކުގައި ހުރި ވާހަކަތައް އެޖެންޑާ 19 ގައި އޮންނާނެ ކަމަށާއި، އެއަށް ބަދަލެއް ނާންނަ ކަމަށެވެ. އަދި އެކަން ރަނުން ރަނަށް ކުރުން އެއީ ސަރުކާރުގެ ވެސް އަމާޒު ކަމަށެވެ.
ރޭގެ އެ ބައްދަލުވުމުގައި މާލޭގެ މޭޔަރު ކަމަށް ކުރިމަތިލައްވާފައިވާ ކުރީގެ ވަޒީރު ޑރ. މުހައްމަދު މުއިއްޒަށް ވަރަށް ބޮޑަށް ފާޑުކިޔުން އަމާޒުކޮށްފައި ވެއެވެ.