ވެރިކަން ކުރާ އެމްޑީޕީއަށް ހުރިހާ ބާރެއް ލިބިފައި އޮތް އިރު ވެސް މާލޭގެ ހާލަތު ރަނގަޅު ކުރަން ކުރެވުނު އެއްވެސް މަސައްކަތެއް ނެތް ކަމަށާއި ޕީޕީއެމަށް މާލެ ސިޓީ ކައުންސިލްގެ މެޖޯރިޓީ ނުލިބެއްޖެނަމަ ކަންކަން އިތުރަށް ބޮއްސުން ލައިގެން ދާނެ ކަމަށް މާލެ ސިޓީގެ މޭޔަރު ކަމަށް ވާދަ ކުރައްވާ ޕީޕީއެމްގެ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.
ކުރިއަށް އޮތް ކައުންސިލް އިންތިހާބުގައި މާލޭގެ މާފަންނު ދެކުނު ދާއިރާގެ ގޮނޑިއަށް ވާދަކު ކުރައްވާ ޕީޕީއެމްގެ ކެންޑިޑޭޓް އަބްދުﷲ ނާސިރުގެ ކެމްޕޭން ޖަގަހަ ހުޅުވުމުގެ ރަސްމިއްޔާތުގައި މުއިއްޒު މިރޭ ވިދާޅުވީ، ކުރީގެ ރައީސް އަބްދުﷲ ޔާމީންގެ ސަރުކާރުގައި މާލޭގެ ތަންތަން ތަރައްގީކޮށް މާލެ ހިތްފަސޭހަ ތަނަކަށް ހަދައިދޭން ފެށިކަން ރައްޔިތުންނަށް ދައްކާފައިވާ ކަމަށެވެ.
އެ ސަރުކާރުގެ ހައުސިން މިނިސްޓަރު ކަމުގައި ވެސް ހުންނެވި މުއިއްޒު ވިދާޅުވީ އެ މަސައްކަތް އެ ސަރުކާރުން ކުރަމުން ދިޔައީ ވެސް ކުޑަ ހަރަދަކާ އެކުގައި ކަމަށެވެ. ހަމައެކަނި އެ ތަންތަން ތަރައްގީކޮށް ދޫކޮށްލުމުގެ ބަދަލުގައި އެ ސަރުކާރުގައި އެ ތަންތަން ރަނގަޅަށް ބަލަހައްޓަމުން ވެސް ގެންދިޔަ ކަމަށް އޭނާ ވިދާޅުވި އެވެ. އެކަމަކު މިހާރު އެ ތަންތަން ވެސް ރަނގަޅަށް ނުބެލެހެއްޓި ވީރާނާވާން ދޫކޮށްލާފައިވާ ކަމަށް ވެސް މުއިއްޒު ވިދާޅުވި އެވެ.
"މިހާރު މި ތިބި މީހުނަށް [އެމްޑީޕީއަށް] ކަންކަން ތަންފީޒު ކުރެވޭނެ ހުރިހާ ބާރެއް އެބަ އޮތް... ސަރުކާރު އެބަ އޮތް، މަޖިލިސް އެބަ އޮތް. ސިޓީ ކައުންސިލްގެ މެޖޯރިޓީ ވެސް އެބަ އޮތް. އެކަމަކު ކުރެވުނު ކަމެއް ނެތް. ދެން މި ބުނަނީ އަންނަ އިންތިހާބުގައި ސިޓީ ކައުންސިލް ދޭށޭ. ކައުންސިލް މެޖޯރިޓީ އޮވެގެންނޭ ކަންކަން ކުރެވެން އޮތީ. މިއީ މިއަދު ރައްޔިތުން ގަބޫލު ކުރާނެ ވާހަކަތަކެއް ނޫން." މުއިއްޒު ވިދާޅުވި އެވެ.
މުއިއްޒު ވިދާޅުވީ މާލޭގެ ތަރައްގީއަށްޓަކައި ކައުންސިލް އިންތިހާބުގައި ސިޓީ ކައުންސިލްގެ މެޖޯރިޓީ ޕީޕީއެމަށް ހޯދުމަށް ކުރާ މަސައްކަތުގައި ސިޔާސީ ޕާޓީތަކުގެ ފިކުރު އެއްފަރާތްކޮށް ހުރިހާ ޕާޓީއެއްގެ މެންބަރުން ވެސް ބައިވެރިވާން ޖެހޭ ކަމަށެވެ. ސިޓީ ކައުންސިލްގެ މެޖޯރިޓީ ޕީޕީއެމްއަށް ލިބިއްޖެނަމަ މާލެ ރައްޔިތުން ތިބޭނީ ހިނިތުންވުމަކާއެކުގައި ކަމަށް ވެސް ވިދާޅުވި އެވެ.
"މާލޭގެ ރައްޔިތުންގެ މޫނުމަތިން ހިނިތުންވުން އިރާދަ ކުރެއްވިއްޔާ ފެނިގެންދާނެ. އަޅުގަނޑުމެން މަސައްކަތް ކުރުމުގައި ފަހަތަކަށް ނުޖެހޭނަން. އަޅުގަނޑުމެން ވަރުބައްޔެއް ނުވާނެ. އަޅުގަނޑުމެން ތިބޭނީ ރެއާއި ދުވާލު 24 ގަޑިއިރު މަސައްކަތް ކުރުމުގައި. މިއީ ނޫންތޯ މާލޭގެ ރައްޔިތުން ބޭނުންވާނެ ކަމަކީ،" މުއިއްޒު ވިދާޅުވި އެވެ.
މުއިއްޒު ވިދާޅުވީ އެމްޑީޕީ އަތުގައި ނެތީ ކައުންސިލްތަކުގެ ފުރިހަމަ ބާރު އެކަނި ކަމަށާއި ކައުންސިލްތަކުގެ އެ ބާރު ވެސް އެމްޑީޕީއަށް ލިބިއްޖެނަމަ މިހާރު ކަންކަން ދާ ގޮތަށް ބަލާއިރު އިތުރަށް ކަންކަން ބޮއްސުން ލައިގެން ދާނެ ކަމަށެވެ. ދުވަހަކު ވެސް އިއާދަ ނުކުރެވޭ ހިސާބަށް އެ ކަން ދާނެ ކަމަށް ވެސް މުއިއްޒު ވިދާޅުވި އެވެ.
"މިއީ ސިޔާސީ ވިސްނުމަކުން ދައްކާ ވާހަކައެއް ނޫން. މިއީ ވަކި އަތަކަށް ހުރެގެން ދައްކާ ވާހަކައެއް ވެސް ނޫން. މިއީ ރާއްޖޭގެ ކޮންމެ ރައްޔިތުން ވެސް ގަބޫލު ކުރާނެ ކަމެއް. އަޅުގަނޑު އެދެނީ މި އިންތިހާބުގައި ރައްޔިތުން ޕީޕީއެމްއިން މި ކުރާ މަސައްކަތަށް އެއްބާރުލުންދީ ޕީޕީއެމްގެ ކެންޑިޑޭޓުން އިންތިހާބު ކުރަން،" މުއިއްޒު ވިދާޅުވި އެވެ.
މުއިއްޒު އިތުރަށް ވިދަޅުވީ ޕީޕީއެމްގެ ސަރުކާރުގައި ބޯހިޔާވަހިކަމަށް ހައްލު ގެންނަން މަސައްކަތް ކޮށްފައި ވަނީ އިހުލާސްތެރި ނިޔަތެއްގައި ކަމަށާއި މާލޭން ފްލެޓް ލިބޭނެ މީހުން ކަނޑައެޅީ ވެސް އިންސާފުވެރިކަމާ އެކުގައި ކަމަށެވެ. މާލޭ ސިޓީ ކައުންސިލްގެ މެޖޯރިޓީ ލިބިއްޖެ ނަމަ، އެ ފަރާތްތަކަށް ފްލެޓްތައް ހޯދައި ދިނުމަށް ސިޓީ ކައުންސިލްގެ ގާނޫނީ ބާރުގެ ތެރެއިން މަސައްކަތް ކުރައްވާނެ ކަމަށް ވެސް އޭނާ ވިދާޅުވި އެވެ.