ކޮރޯނާ ވައިރަހަށް ރާއްޖޭގައި ތޭރަ މީހަކު ޕޮޒިޓިވްވެފައިވާއިރު، އެ ބަލި ފެތުރެން ފެށީ، ބައެއްގެ އިހުމާލުންކަމަށް ކުރަމުންދާ ތުހުމަތުތަކަށް ޖިނާއީ ތަހުގީގެއް ހިންގުމަށް ޕްރޮސެކިޔުޓަރު ޖެނެރަލް (ޕީޖީ) ފުލުހުންގެ ކިބައިން އެދިވަޑައިގެންފައިވާއިރު އެކަމަށް ގޮންޖެހުންތަކެއް ހުރި ކަމަށް ގަބޫލުކުރައްވާ ކަމަށް ޕީޖީ ހުސައިން ޝަމީމް ވިދާޅުވެއްޖެ އެވެ.
ރާއްޖޭގައި ކޮވިޑް-19 އެންމެ ފުރަތަމަ ޖެހުނީ، ޅ. ކުރެއްދޫ ރިސޯޓުގައި މަސައްކަތް ކުރަމުންދާ ދެ ބިދޭސީ މުވައްޒަފަކަށެވެ. އެ ދެ މީހުނަށް އެ ވައިރަސް ޖެހިފައިވަނީ އެ ރިސޯޓުގައި ޗުއްޓީ ހޭދަކުރި އިޓަލީގެ ޓޫރިސްޓެއްގެ ފަރާތުންކަމަށް ސަރުކާރުން ވަނީ ބުނެފަ އެވެ. އެ ފަތުރުވެރިޔާ ވައިރަހަށް ޕޮޒިޓިވްވެފައިވަނީ އެނބުރި ގައުމަށް ދިޔަ ފަހުންކަމަށް ސަރުކާރުން މީގެ ކުރިން ބުނެފައިވެ އެވެ.
ނަމަވެސް، އެ މީހާ ރިސޯޓުގައި ހުރި އިރުވެސް، ބަލީގެ އަލާމާތްތައް ހުރި ކަމަށާއި، ނަމަވެސް އެކަން ރިޕޯޓުކޮށްފައިނުވާ ކަމުގެ ތުހުމަތުތައް ދަނީ ކުރެވެމުންނެވެ. އޭގެ ފަހުން، އޭނާ ފުރުމުގެ ކުރިން މާލޭގައިވެސް ދެ ދުވަހު ހުރިކަމަށް ސާރުކާރުން ވަނީ ހާމަކޮށްފަ އެވެ.
އޭނާ މަޑުކޮށްގެން ހުރި މާގިރި ހޮޓެލްގެ 15 މީހަކާ އެ ޓޫރިސްޓް ކޮންޓެކްޓްވި އެވެ. އެ އެންމެން ވެސް އެކަހެރިކޮށްފައިވާއިރު އެއިން މީހެއްގެ ފަރާތުން އަދި އަލާމާތެއް ނުފެނެ އެވެ. ނަމަވެސް އެ ޓޫރިސްޓް، ޓިކެޓް ގަތް ޔުނިވާސަލްގެ ޓިކެޓް އޮފީހުގެ މުވައްޒަފެއްގެ ފަރާތުން އަލާމާތްތައް ފެނިގެން އޭނާ ކަރަންޓީނު ކުރި އެވެ. ނަމަވެސް، އޭނާ އެ ވައިރަހަށް ނެގެޓިވްކަމަށް ސަރުކާރުން ވަނީ ބުނެފަ އެވެ.
އެ ހާދިސާއާ ގުޅިގެން އާންމުންގެ ކަންބޮޑުވުން އިތުރުވެ، ގިނަ ތުހުމަތުތަކެއް ކުރެވެން ފެށުމުން އެ މައްސަލަ ތަހުގީގު ކުރުމަށް ޕީޖީ ވަނީ ފުލުހުންނަށް އަންގާފައެވެ. އަދި ފުލުހުން ވަނީ އެ މައްސަަލަ ބަަލަމުންދާކަން ހާމަކޮށްފައެވެ.
ޕީޖީ ހުސައިން ޝަމީމް މިއަދު ވިދާޅުވީ އެ މައްްސަލަ ތަހުގީގު ކުރަމުންދާ އިންވެސްޓިގޭޓަރުންނާއި މިއަދު ބައްދަލް ކުރައްވާފައިވާ ކަމަށެވެ. އަދި މައްސަލައާއި ގުޅިގެން ސާފުކުރަން ޖެހޭ ކަންކަން އިންވެސްޓިގޭޓަރުން ސާފު ކުރަމުންދާ ކަމަށް ވިދާޅުވިއެވެ.
އަދި މައްސަލަ ބެލުމަށް ފުލުހުންނަށް ގޮންޖެންތަކެއް ހުރި ކަމަށް ގަބޫލުކުރައްވާ ކަމަށްވެސް ވިދާޅުވިއެވެ.
"މައްސަލައާ ގުޅޭ ލިޔުންތައް ލިބުމުން އަޅުގަނޑު ވަކި ގޮތެއް ނިންމާނަން." ޝަމީމް ވިދާޅުވިއެވެ.
ފުލުހުން ބުނީ އެ އިޓަލީ މީހާގެ ގައިން ބައްޔަށް ޝައްކު ކުރެވޭ އަލާމާތްތައް ފެނުނު ނަމަވެސް، ރައްކާތެރިކަމުގެ ފިޔަވަޅުތައް އެޅުމުގެ ފުރުސަތު ނުލިބި އޭނާ ފުރައިގެން ގޮސްފައި ވަނީ އަޅަންޖެހޭ ފިޔަވަޅުތައް ނާޅާ ފަރުވާކުޑަކޮށް، އިހުމާލުވެފައިވޭތޯ ބެލުމަށް އެ މައްސަލަގެ ތަހުގީގު ކުރަން ފަށާފައިވާ ކަމަށެވެ.
ރާއްޖޭން މިހާތަނަށް ކޮވިޑް-19 އަށް ޕޮޒިޓިވް 13 މީހަކު ވަނީ ފެނިފަ އެވެ. އެއީ ހަތަރު ރިސޯޓެއްގައި ތިބި ބިދޭސީންނާއި ޓޫރިސްޓުންތަކެއްގެ އިތުރުން ސަފާރީއެއްގައި ތިބި ބިދޭސީންތަކެކެވެ. އިތުރު ބަޔަކު ބަލީގެ އަލާމާތްތައް ފެނިގެން ވަނީ އެކަހެރިކޮށްފަ އެވެ. އޭގެ ތެރެއިން ބައެއް މީހުން ޓެސްޓް ކުރުމަށްޓަކައި ސާމްޕަލް ވެސް ވަނީ ނަގާފަ އެވެ،