ކޮވިޑް-19 އިން ރައްކާތެރިވާން ސަރުކާރުގެ އޮފީސްތައް ބަންދު ކޮށްފައިވާތީ ސަރުކާރުގެ ސިވިލް ސާވިސް މުވައްޒަފުންނަށް ގޭގައި ތިބެގެން އޮފީސް މަސައްކަތްތައް ކުރުމަށް އެ މުވައްޒަފުންނަށް ދިރާގުން ހިލޭ އިންޓަނެޓް އެކްސެސް ދީފި އެވެ.
ދިރާގުން މިއަދު ބުނީ ސަރުކާރުގެ ސިވިލް ސާވިސް މުވައްޒަފުން ގޭގައި ތިބިގެން މަސައްކަތް ކުރުމަށް ލުއި ފަސޭހަކަން ފޯރު ކޮށްދިނުމުގެ ގޮތުން ދިރާގުން ފޯރުކޮށްދޭ ފިކްސްޑް ބްރޯޑްބޭންޑް އިންޓަނެޓްގެ ޒަރިއްޔާއިން ސަރުކާރުގެ ވިއުގަތަކަށް އެ މުވައްޒަފުން ހިލޭ ވަދެވޭ ގޮތް ހަމަޖައްސައިދީފައިވާ ކަމަށެވެ.
ދިރާގުން ފޯރުކޮށްދޭ ޑިޖިޓަލް ވަސީލަތްތައް މެދުވެރިކޮށް ސަރުކާރުގެ ސިވިލް ސާވިސް މުވައްޒަފުންެގ މަސައްކަތް މެދުނުކެނޑި ކުރިއަށް ގެންދިއުމަށް ލުއި ފަސޭހަ ގޮތްތަކެއް ހޯދައި ދިނުމަކީ މި ދަނޑިވަޅުގައި ދިރާގުން އެންމެ އިސްކަމެއް ދޭ އެ ކަންތައް ކަމަށް އެ ކުންފުނިން ބުންޏެވެ.
އެ ގޮތުގެ މަތިން ސަރުކާރުގެ އެކި ޕޯޓަލްތަކަށް ސިވިލް ސާވިސް މުވައްޒަފުންނަށް ހިލޭ އެކްސެސް ކުރެވޭ ގޮތަށް ދިރާގުން ހަމަޖައްސާފައި ވަނީ ސަރުކާރުގެ ކޮމިއުނޭޝަން، ސައިންސް އެންޑް ޓެކްނޮލޮޖީ މިނިސްޓްރީއާ ވެސް ގުޅިގެންނެވެ.
މި ދަނޑިވަޅުގައި ކަސްޓަމަރުންނަށް އިންޓަނެޓް ބޭނުން ކުރުމަށް ލުއިތަކެއް ދިނުމުގެ ގޮތުން، ދިރާގުން ދަނީ މިދިޔަ މާޗު މަހުން ފެށިގެން ހިލޭ ޑޭޓާ އެލަވަންސް އަދި ޑިސްކައުންޓް ދެމުންނެވެ. އަދި ރައީސް އިބްރާހިމް މުހައްމަދު ސޯލިހްގެ އިސްނެންގެވުމުގެ މަތިން، ހިލޭ ޑޭޓާގެ މިންވަރު ވަނީ އޭޕްރީލް އަދި މެއި މަހަށް އިތުރު ކޮށްފަ އެވެ.