އައްޑޫ ސިޓީ ހިތަދޫގައި ރޭ ހިނގި ނުރައްކާތެރި އެކްސިޑެންޓުގައި އަތް ބިންދައިގެން ދިޔަ ޒުވާނާގެ ހާލު މިހާރު "ސްޓޭބްލް" ކަމަށް ހިތަދޫ ރީޖަނަލް ހޮސްޕިޓަލުން ބުނެފިއެވެ.
ހިތަދޫ ރީޖަނަލް ހޮސްޕިޓަލާ ހިންގުމާ ވަގުތީ ގޮތުނ ހަވާލުވެ ހުންނެވި، ޝާހު ސައީދު މިއަދު އަވަސް އަށް ވިދާޅުވީ އެކްސިޑެންޓުގައި އަނިޔާވި ސ. މަރަދޫ ހުދުފަސް އަހުމަދު ހާނިޝްގެ ހާލު ސްޓޭބްލް ކަމަށާއި އޭނާ މާލެ ފޮނުވުމުގެ މަސައްކަތް ފަށާފައިވާ ކަމަށެވެ. ނަމަވެސް މާލެ ފޮނުވޭނެ އިރެއް އަދި ޔަގީން ވެފައި ނުވި ނަމަވެސް 24 ގަޑި އިރުގެ ތެރޭގައި މާލެ ގެންނާނެ ކަމަށް އޭނާ ވިދާޅުވިއެވެ.
ހާނިޝްގެ އަތް ބިންދައިގެން ދިއުމުގެ އިތުރުން އެ އެކްސިޑެންޓުގައި އޭނާގެ ހަށިގަނޑުގެ އެކި ތަން ތަން ވަރަށް ބޮޑަށް މަށައިގެން ގޮސްފައިވާ ކަމަށްވެއެވެ.
ރޭ 10:00 ހާއިރު ހިނގި އެ އެކްސިޑެންޓުގައި އުމުރުން ދުވަސްވީ މީހަކުވެސް ވަނީ ނިޔާވެފައެވެ. މައުލޫމާތު ލިބޭ ގޮތުގައި ނިޔާވެފައިވަނީ ހިތަދޫ ވިޖިނިންގޭ އިބްރާހީމް ކަލޯއެވެ.