އެޕްރީލް އަދި މެއި މަހު ކަރަންޓާ ފެން ބިލް ހިލޭ ކޮށްދިނުމަށް ހުށައެެޅި ހުށައެޅުމާ، ސަރުކާރު ހިންގާ މައި ޕާޓީ އެމްޑީޕީގެ މަޖިލީސް މެންބަރުން ދެކޮޅު ހައްދަވައިފި އެވެ.
ދުނިޔެއަށް ދިމާވެފައިވާ ކޮވިޑް-19 ގެ ވަބާއާ ގުޅިގެން ދިވެހި ރައްޔިތުނަށް ދިމާ ވެދާނެ ދަތިތަކަށް ހައްލު ހޯދައި ދިނުމަށް ކަރަންޓް އަދި ފެން ބިލުން ބައެއް ދައްކައިދިނުމަށް ސަރުކާރުން ވަނީ ނިންމާފަ އެވެ.
ސަރުކާރުން ތައާރަފް ކޮށްފައިވާ ރިލީފް ޕެކޭޖްގެ ތެރޭ ހިމެނިގެން އެޕްރީލް އަދި މެއި މަހު ކަރަންޓް ބިލުން 40 ޕަސެންޓް އަދި ފެން ބިލުން 30 ޕަސެންޓް ސަބްސިޑައިޒް ކޮށްދިނުމަށް ނިންމާފައިވާ ކަމަށް ސަރުކާރުން ވަނީ ބުނެފަ އެވެ.
ރާއްޖޭގެ އިގްތިސޯދަށާއި ވިޔަފާރިތަކަށް ކުރިމަތިވެފައިވާ ދަތިތަކުން އަރައިގަތުމަށްޓަކައި ސަރުކާރުން އިއުލާނު ކޮށްފައިވާ ރިލީފް ޕެކޭޖްގައި ހިމެނޭ ކަންކަމުގެ ތެރެއިން މަޖިލީހުގެ ކޮމެޓީތަކުގެ އިހްތިސޯސްގައި ހިމެނޭ ކަންކަން އެ ކޮމެޓީތަކުން ވެސް ދަނީ ބަލަމުންނެވެ.
ރޭ އޮތް އެސްއޯއީ ކޮމެޓީގެ ބައްދަލުވުމުގައި ޕީޕީއެމްގެ ނާއިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް ވަނީ ކޮވިޑްގެ ސަބަބުން ދިމާވެފައިވާ އިގްތިސޯދީ މައްސަލަތަކުގެ ސަބަބުން ރައްޔިތުންނަށް ލުޔެއް ދޭން އެޕްރީލް އަދި މެއި މަހު ކަރަންޓް ބިލާއި ފެންބިލް ހިލޭ ކޮށްދިނުމަށް ހުށައަޅުއްވާފަ އެވެ.
މެންބަރު ޝިޔާމް ވިދާޅުވީ ލޮކްޑައުންގެ ހާލަތުގައި ގިނަ ދުވަސްތަކެއް ވޭތިވެ ދިޔައިރު އަދި ކުރިއަށް އޮތް ދުވަސްތަކުގައި ވެސް ލޮކްޑައުންގެ މުއްދަތު އިތުރު ކުރާނެ ކަމަށް ބެލެވޭތީ ގޭގައި ތިބެން ޖެހިފައިވާ މި ދަނޑިވަޅުގައި ކަރަންޓާއި ފެން ބޭނުންކުރާ މިންވަރު އެތައް ގުނައެއް އިތުރުވެގެން ދާނެ ކަމަށެވެ. އެހެން ކަމުން ބިލްތަކުން ބައެއް ސަރުކާރުން ދައްކައިދިން ނަމަވެސް ރައްޔިތުން ދައްކަންޖެހޭ މިންވަރު ކުޑަ ނުވާނެ ކަމަށެވެ.
"ލޮކްޑައުންގައި މުޅި ދުވަހު ގޭގައި އެތައް ދުވަހެއް ހޭދަކުރަން ޖެހޭއިރު މީގެ ކުރީ މަސްތަކާއި އަޅާބަލާއިރު ކަރަންޓް އަދި ފެންވެސް އެތައް ގުނައެއް އިތުރަށް ބޭނުން ކުރެވޭނެ. ސަރުކާރުގެ ބޭނުމަކީ ވެސް ރައްޔިތުންނަށް ލުއި ގޮތްތައް ހޯދާދިނުން ކަމަށްވާއިރު ބިލުން ބައެއް ދައްކައިދިން ނަމަވެސް ގޭގައި ތިބެެން މަޖުބޫރު ވުމުން ބިލަށް ބޮޑު އެއްޗެއް އަރާނެ. އެހެންވީމަ މި ދެމަހުގެ ބިލް ފްރީކޮށް ދިނުމަށް އަޅުގަނޑު މި ހުށައަޅަނީ،"
ޝިޔާމް ވިދާޅުވީ 4.2 ބިލިއަން ރުފިޔާ ބޭނުން ކުރުމުގެ ފުުރުސަތު ވެސް މަޖިލީހުން ވަނީ ފަހިކޮށްދީފައި ކަމަށާ އެހެން ކަމުން އެ ފައިސާއިން ރައްޔިތުންނަށް މި ހާލަތުގައި ސީދާ ގޮތުން އެހީތެރިވެވޭނެ ގޮތްތަކެއް ހޯދަންޖެހޭ ކަމަށެވެ. ކަރަންޓާ ފެން ބިލް މި ދެ މަހު ދައްކަން ނުޖެހޭ ގޮތަށް ހައިދީފިނަމަ އެއީ ރައްޔިތުންނަށް ދެވޭ ވަރަށް ބޮޑު ލުޔަކަށް ވެގެންދާނެ ކަމަށް ވެސް ޝިޔާމް ވިދާޅުވި އެވެ.
"ކުރިން ވެއްޖިއްޔާ މަސައްކަތްކޮށްގެން ފައިސާ ހޯދައިގެން ވެސް ބިލް ދެއްކޭނެ. އެކަމު މިއަދު އެހެނެއް ނޫން. އެންމެންހެން މި ތިބެން ޖެހެނީ ގޭގައި، އަމިއްލަ ތަންތަނުގައި މަސައްކަތްކުރާ އެތައް ބަޔަކަށް މުސާރަ ދެވޭނެ ގޮތެއްނެތް. އެހެންވީމަ މިއީ ސީދާ ގޮތުން ރައްޔިތުންނަށް އެހީތެރިވާންވީ ވަގުތު." ޝިޔާމް ވިދާޅުވި އެވެ.
އެސްއޯއީ ކޮމެޓީގައި މި ހުށައެޅުމަށް ވޯޓް ދެއްވީ ޝިޔާމްގެ އިތުރުން މެންބަރު ފަޒުލް ރަޝީދާ، އެމްޑީީޕީގެ ދެ މެންބަރުން ކަމަށްވާ އިބްރާހިމް ރަޝީދު (ބޮންޑާ) އަދި ފުވައްމުލަކު މެންބަރު ހުސައިން މުހައްމަދު ދީދީ އެވެ. އެ ހުށައެޅުމަށް ޖުމްހޫރީ ޕާޓީގެ އިސްދޫ ދާއިރާގެ މެންބަރު އަލީ ހަމީދު ތާއީދު ކުރެއްވި ނަމަވެސް ވޯޓް ގަޑީގައި އޭނާ ނެތުމުން ވޯޓްގައި ބައިވެރިވެވޭ ގޮތް ވަނީ ނުވެފަ އެވެ.
މި ހުށައެޅުމާ ދެކޮޅަށް ވޯޓް ދެއްވީ ތޮއްޑޫ ދާއިރާގެ މެންބަރު ހަސަން ޝިޔާނެވެ. އަދި ވަކިކޮޅަށް ވޯޓް ނުދެއްވާ ތިއްބެވީ ކިނބިދޫ ދާއިރާ މެންބަރު މުޙައްމަދު ނާޝިޒުގެ އިތުރުން ފޭދޫ ދާއިރާ މެންބަރު މުހައްމަދު ނިހާދު އަދި ތުލުސްދޫ ދާއިރާގެ މެންބަރު އިބްރާހިމް ނަސީމެވެ. އެހެން ކަމުން މި ހުށައެޅުން ފާހެެއް ނުވި އެވެ.
