"ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުން ކަށަވަރުކުރުމުގެ ހާއްސަ ބިލް 2020" އަކީ ގާނޫނު އަސާސީއާއި ކަނޑައެޅިގެން ހިލާފަށް މަޖިލީހުން ފާސްކުރުމަށް ހުށައަޅާފައިވާ ބިލެއް ކަމަށާ އެ ބިލަކީ ގާނޫނު އަސާސީއާއި ހިލާފު ބިލެއް ކަަމަށް ކަނޑައަޅައިދިނުމަށް އެ މައްސަލަ ސުޕްރީމް ކޯޓަށް ހުށައެޅުމުގެ މަސައްކަތް ކުރަމުންދާ ކަމަށް އިދިކޮޅު ކޯލިޝަނުން ބުނެފި އެވެ.
ޕީޕީއެމް އާއި ޕީއެންސީ ގުޅިގެން ނެރެފައިވާ ބަޔާނެއްގައި ބުނެފައިވަނީ ގާނޫނު އަސާސީގައި ކައުންސިލްތަކުގެ ދައުރު ކަނޑައެޅި ބަޔާންވެފައިވަނިކޮށް މަޖިލީހުން ފާސްކުރާ އެހެން ގާނޫނަކުން ގާނޫނު އަސާސީގެ މާއްދާއެއް ބާތިލް ނުކުރެވޭނެ ކަމަށެވެ. އަދި ގާނޫނު އަސާސީއާއި ހިލާފަށް ފާސްކުރާ ކޮންމެ ގާނޫނަކީ ބާތިލް ގާނޫނެއް ކަމަށް ބަޔާންކޮށްފައިވާ ކަމަށެވެ.
މިފަދަ ހާލަތެއް ދިމާވެއްޖެނަމަ އެކަމުގެ ފަރުވާ ހޯދަންޖެހޭ ތަނަކީ ސުޕްރީމް ކޯޓް ކަމަަށާ ނުވަތަ އެކަން ކުރަން ޖެހޭނީ ގާނޫނު އަސާސީގައި ބުނެފައިވާ އުސޫލުތަކާއި އެއްގޮތަށް ގާނޫނު އަސާސީ އިސްލާހު ކޮށްގެން ކަމަށެވެ.
އެ ކޯލިޝަނުން ބުނީ މަޖިލީހަށް ހުށައަޅާ އިއްޔެ އެ މަޖިލީހުން ބަލައިގެން ބިލަކީ ދުސްތޫރީ ނިޒާމުގައި ހަމަޖެހިފައިވާ އުސޫލުތަކާއި އަސާސްތައްް ގަޑުބަޑުކުރުމުގެ ބޭނުމުގައި ހުށައަޅާފައިވާ ބިލެއް ކަމަށެވެ.
"އަދި އެ ބިލަކީ ގާނޫނު އަސާސީއަށް ގޮންޖަހާ، މަޖިލީހުގައި އެމްޑީޕީއަށް އޮތް މެޖޯރިޓީގެ ނާޖައިޒު ފައިދާ ނަގައި، ތިމާމެން ބޭނުންވާ ގޮތަކަށް އިންތިހާބުތަކާއި ކުޅުމުގެ ދޮރު ހުޅުވުމުގެ ފުރުސަތު ހޯދުމަށް އެމްޑީޕީން ކުރަމުން ގެންދާ މަސައްކަތެއް ކަމަށް މި ކޯލިޝަނުން ގަބޫލުކުރަން. ގާނޫނު އަސާސީގައި ބަޔާންކޮށްފައިވާ ރާއްޖޭގެ އިންތިހާބުތަކުގެ އުސޫލުތަކާއި ތައާރުޒުވާ ފަދަ ގާނޫނުތައްް މަޖިލީހުން ފާސްކޮށް އިންތިހާބުތަކުގެ ދައުރަށް ބަދަލު ގެނައުމަކީ ބަލައިގަންނާނެ ކަމެއް ނޫން."
އިދިކޮޅު ކޯލިޝަނުން ވަނީ މި މަސައްކަތަކީ މަޖިލީހުގެ ރައީސް މުހައްމަދު ނަޝީދު އިސްވެ ހުންނަވާ ކުރައްވާ މަސައްކަތެއް ކަމަށް ތުހުމަތުކުރައްވާ އެކަން ހުއްޓާލުމަށްވެސް ގޮވާލާފައެވެ. އަދި އެ ބިލަކީ ގާނޫނު އަސާސީއާއި ހިލާފު ބިލެއް ކަަމަށް ކަނޑައަޅައިދިނުމަށް އެ މައްސަލަ ސުޕްރީމް ކޯޓަށް ހުށައެޅުމުގެ މަސައްކަތް ކުރަމުންދާ ކަމަށެވެ.
