ރާއްޖޭގައި ލޭނު އަޅައިގެން މިޔަރު މަސް ހިފުމުގެ މަސްވެރިކަން ކުރުމުގެ ހުއްދަ އަލުން ދިނުމަށް ޑީއާރުޕީގެ ލީޑަރު އަދި ކާށިދޫ ދާއިރާގެ މެންބަރު އަބްދުﷲ ޖާބިރު ހުށަހެޅުއްވި ގަރާރު މަޖިލީހުގެ ތަޅުމުން ބޭރުކޮށްލައިފި އެވެ.
ޖާބިރުގެ ގަރާރު ތަޅުމަށް ބަލައިގަންނަން ފެންނަ ކަމަށް ވޯޓު ދެއްވީ އެންމެ ހަތަރު މެންބަރުންނެވެ. އެ ގަރާރު ތަޅުމަށް ބަލައިގަންނަން ނުފެންނަ ކަމަށް ވޯޓު ދެއްވީ 53 މެންބަރުންނެވެ. އެހެންކަމުން އެ ގަރާރު ތަޅުމަށް ބަލައިނުގަނެ ވަނީ ބޭރުކޮށްލައިފަ އެވެ.
ޖާބިރު ހުށަހެޅުއްވި ގަރާރުގައި ބުނެފައި ވަނީ ނޫ އިގްތިސާދުގެ ނަފާ ލިބިދިނުމުގެ ގޮތުން ވަކި ގަވާއިދެއް ހަދައި އެ ގަވާއިދުގެ ދަށުން މިޔަރު ހިފުމުގެ މަސްވެރިކަމުގެ ހުއްދަ ވެސް ދިވެހި މަސްވެރިންނަށް ދިނުމަށް ގޮވާލާ ކަމަށެވެ.
މީގެ އިތުރުން ބޭރުގެ ކަނޑުތަކުން ރާއްޖޭގެ ކަނޑުގެ ސަރަހައްދަށް ވަދެފައިވާ ބައެއް މިޔަރުތަކުގެ ފަރާތުން ދިވެހި މަސްވެރިންނަށް އެކި އަނިޔާ ލިބެމުންދާތީ އެ ކަން ދިރާސާ ކުރަން ވެސް ޖާބިރުގެ ގަރާރުގައި ގޮވާލާފައިވެ އެވެ.
ޖާބިރު ހުށަހެޅި މި ގަރާރު ތަޅުމުން ބޭރުކޮށްލިއިރު، މިހާރު ހިނގަމުންދާ ނަވާރަވަނަ ރައްޔިތުންގެ މަޖިލީހަށް އެންމެ ގިނަ ގަރާރު ވެއްދި މެންބަރަކަށް ޖާބިރު ވާނެ އެވެ. ނަމަވެސް މިހާތަނަށް ވެސް ޖާބިރު ހުށަހެޅި އެންމެ ގަރާރެއް ވެސް ބަލައިގަންނަން އެމްޑީޕީގެ ސުޕަ މެޖޯރިޓީ އޮތް މަޖިލީހުން ފާސްވެފައެއް ނުވެ އެވެ.
