ފާއިތުވި ދުވަސްތަކުގައި ކުޑަ ދެ ކުއްޖެއް ރޭޕްކުރި މައްސަލަތަކާ ގުޅިގެން، ކުޑަކުދިން ރައްކާތެރިކުރުމަށް ފަތުރުވެރިކަމާއި ދަތުރުފަތުރުގެ ދާއިރާއިން ހަރުކަށި ފިޔަޅުތައް އެޅުމަށް އެޑްވޮކޭޓިން ދަ ރައިޓްސް އޮފް ޗިލްޑްރެން (އާކް)އިން ގޮވާލައިފި އެވެ.
އާކް އިން މިކަމަށް ގޮވާލާފައިވަނީ މިމަހުގެ 10 ވަނަ ދުވަހާއި މިދިޔަ މަހު ފަހުކޮޅު މާލޭގެ ގެސްޓްހައުސްއެއްގައި އުމުރުން 11 އަހަރުގެ ކުއްޖަކާއި 16 އަހަރުގެ ކުއްޖަކު، ރޭޕްކުރި މައްސަލައާއި ގުޅިގެން އެކަން ކުށްވެރިކޮށް ނެރުނު ބަޔާނެއްގަ އެވެ.
ކުޑަ މިދެ ކުދިން ރޭޕްކުރި މައްސަލަ ހަރުކަށި އިބާރާތުން އެކަން ކުށްވެރިކޮށް އާކް އިން ނެރުނު ބަޔާނުގައި ބުނެފައިވަނީ ޓޫރިޒަމް މިނިސްޓްރީގައި ގެސްޓްހައުސްތަކުގެ ގޮތުގައި ރަޖިސްޓްރީ ކޮށްފައިވާ ތަންތަން ގަވާއިދުން މޮނިޓާ ނުކުރެވޭ ކަމަށާއި، އަދި މިފަދަ ތަންތަނަށް ކަނޑައަޅާފައިވާ އުސޫލްތަކާ ހިލާފަށް އެއްވެސް ހުއްދައެއް ނެތި ދުވަހު ކުއްޔަށް ކޮޓަރިތައް ދޫކުރަމުންދާތީ އެކަމާ ކަންބޮޑުވާ ކަމަށެވެ.
ގެސްޓްހައުސްތަކުގައި ކުޑަކުދިންނަށް ކުރާ ޖިންސީ އަނިޔާއާއި ނާޖާއިޒް ފައިދާ ނެގުމުގެ މައްސަލަތައް ނުވަތަ އެކްސްޕްލޮއިޓޭޝަން ހުއްޓުވުމަށްޓަކައި ހަރުކަށި ފިޔަވަޅުތަކެއް އެޅުމަށް އާކް އިން ވަނީ ގޮވާލާފަ އެވެ. އަދި އެކްސްޕްލޮއިޓް ކުރުމުގެ މަގްސަދުގައި ކުޑަކުދިން އެއް ރަށުން އަނެއް ރަށަށް ގެންދާކަމަށް ރިޕޯޓްކުރެވޭ މައްސަލަތައް އިތުރުވަމުންދާތީ، އިންސާނީ ވަގުފާރިން ކުޑަކުދިން ރައްކާތެރިކުރުމަށްޓަކައި ދަތުރުފަތުރުކުރުމާ ގުޅުންހުރި ގާނޫނުތަކާއި ގަވާއިދުތައް އިތުރަށް ހަރުދަނާކުރުމަށްވެސް އެ ޖަމިއްޔާއިން ވަނީ ގޮވާލާފަ އެވެ.
މިދިޔަ އަހަރު ފާސްކޮށް މިއަހަރު ފެބްރުއަރީ މަހުގައި އަމަލުކުރަން ފަށާފައިވާ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ ދަށުން މި ދެ މައްސަލަ ތަހްގީގުކުރުމަށްވެސް ވަނީ ގޮވާލާފަ އެވެ.އެ ގާނޫނުގެ ދަށުން ކުޑަކުދިން އެކްސްޕްލޮއިޓް ކުރުމުގެ ކުށާއި، ގްރޫމްކުރުމުގެ ކުށާއި، ކުޑަކުއްޖަކާމެދު އިހްމާލުވުމުގެ ކުށާއި ކުޑަކުއްޖަކު އަނިޔާގެ އަމަލަކުން ސަލާމަތްކުރުމުގައި އިހްމާލުވުން އަދި ކުޑަކުއްޖަކަށް އަނިޔާކުރުމުގެ ކުށެއް ރިޕޯޓުނުކުރުމުން އަޅާނެ ފިޔަވަޅުތައް ކަނޑައަޅާފައިވެ އެވެ.
"....ކުޑަކުދިން ރައްކާތެރިކުރުމުގެ ނިޒާމުގައި ހުރި ބޮޑެތި މައްސަލަތަކާމެދު ކަންބޮޑުވުން ފާޅުކޮށް، ހާއްސަގޮތެއްގައި ގާނޫނު ތަންފީޒުކުރާ ފަރާތްތްކާއި، ޝަރުއީ އަދި އިޖްތިމާއީ ދާއިރާގައި ރަނގަޅުކުރަން ހުރި ގިނަ ކަންތައްތަކެއްގެ ސަބަބުން ކުޑަކުދިން އަނިޔާއިން ރައްކާތެރިކުރުމަށް ބޮޑެތި ހުރަސްތަކެއް ހުރިކަންވެސް މި ޖަމިއްޔާއިން ފާހަގަކުރަމެވެ..." އެބަޔާނުގައި ބުނެފައިވެ އެވެ.
ކުޑަކުދިން އަނިޔާއިން ރައްކާތެރިކުރުމުގައި ބެލެނިވެރިންނާއި މުޖުތަމައުއިން އިތުރު ސަމާލުކަން ދިނުން ވަރަށް މުހިއްމުކަމަށާއި ކުޑަކުއްޖަކަށް އަނިޔާއެއް ލިބެމުންދާކަމަށް ޝައްކު ކުރެވޭނަމަ ލަސްނުކޮށް ކަމާބެހޭ އިދާރާތަކަށް ރިޕޯޓުކުރުމަށް އެ ޖަމިއްޔާޢިން ވަނީ އިލްތިމާސްކޮށްފަ އެވެ. އަދި ރާއްޖޭގައި ކުޑަކުދިންގެ ހައްގުތައް ރައްކާތެރިކުރުމަށްޓަކައި ކަމާބެހޭ ފަރާތްތަކާއެކު މަސައްކަތްކުރުމުގައި ދެމިތިބޭނެކަމުގެ ޔަގީންކަން އެ ޖަމިއްޔާއިން ވަނީ ދީފަ އެވެ.
ކޮވިޑް-19 އާއި ގުޅިގެން މުޅި ރާއްޖެ ލޮކްޑައުން ކޮށްފައިވަނިކޮށް އަތޮޅުތެރޭގެ ރަށަކުން 16 އަހަރުގެ އަންހެން ކުއްޖަކު މާލެ ގެނައުމަށްފަހު ގެސްޓްހައުސްއެއްގެ ތެރޭގައި ރޭޕްކޮށްފައިވާ މައްސަލަ މިދިޔަ މަހު ފަހުކޮޅު ފުލުހުންނަށް ހުށަހެޅި އެ މައްސަލަ ބަލަމުންދަނިކޮށް މިމަހުގެ 10 ވަނަ ދުވަހު އުމުރުން 11 އަހަރުގެ ކުޑަ އަންހެން ކުއްޖަކު ގެސްޓްހައުސް އަކަށް ގެންގޮސްގެން ރޭޕްކޮށްފައިވާ މައްސަލައެއް ވަނީ ފެންމަތިވެފަ އެވެ.
މި ދެމައްސަލައިގެ ތެރެއިން އުމުރުން 11 އަހަރުގެ ކުޑަކުއްޖާ ރޭޕްކުރި މައްސަލާގައި ހައްޔަރު ކުރި ފިރިހެންމީހާ ޝަރީއަތް ނިމެންދެން ބަންދުގައި ބެހެއްޓުމަށް ކޮމިޝަނާ އޮފް ޕޮލިސް ވަނީ ޕްރޮސިކިއުޓާ ޖެނެރަލްގެ އަރިހުން އެދިވަޑައިގެންފަ އެވެ. ނަމަވެސް ކުރިމިނަލް ކޯޓުން އޭނާގެ ބަންދަށް ޖަހާފައިވަނީ ހަތް ދުވަހެވެ.