ހުވަދު އަތޮޅު ކަނޑުއޮޅި ތަކަށް ޑައިވް ކުރުމުގެ ހަރަކާތެއް ދިވެހި މަސްވެރިންގެ ޖަމްއިއްޔާ އިން ފަށައިފި އެވެ.
އެ ޖަމިއްުޔާއިން ބުނީ "ޑިސްކަވާ ހުވަދޫ" ގެ ނަމުގައި މި ހަރަކާތް، މިއަދުން ފެށިގެން އަންނަ މަހުގެ ތިން ވަނަ ދުވަހުގެ ނިޔަލަށް ކުރިއަށްދާނެ ކަމަށެވެ.
މި ހަރަކާތަކީ "ދަ ސްމޯލް އައިލެންޑް ޑިވެލޮޕިން ސްޓޭޓްސް - ކޮމިއުނިޓީ ބޭސްޑް އެޑަޕްޓޭޝަން ޓު ކްލައިމަޓް ޗޭންޖް" (ސިޑްސް ސީބީއޭ) ޕްރޮގްރާމްގެ ދަށުން ބާއްވާ ހަރަކާތެއް ކަމަށެވެ.
އޮސްއެއިޑްގެ އެހީގައި ޔޫއެންޑީޕީގެ ސުމޯލް ގްރާންޓްސްގެ ސިޑްސްސީބީއޭ ޕްރޮގްރާމަކީ މޫސުމަށް އަންނަ ބަދަލުތަކާއި ގުޅިގެން ކުރާނެ އަސަރުތަކާއި އަދި ދިމާވެދާނެ ހާލަތްތަކަށް މުޖުތަމައު ހޭލުންތެރިކަން އިތުރު ކުރާ ޕްރޮގްރާމެކެވެ. އަދި ދިރުންތަކާއި، ގުދުރަތީ މާހައުލު ރައްކާތެރިކޮށް، އާމްދަނީ ހޯދޭނެ ގުދުރަތީ ވަސީލަތްތައް ދެމެހެއްޓެނިވި ގޮތުގައި ބޭނުން ކުރުމަށް މަގުފަހި ކުރާނެ އެވެ.
މަސްވެރިންގެ ޖަމިއްޔާ އިން ބުނީ "ޑިސްކަވާ ހުވަދޫ" ހަރަކާތުގައި ހުވަދު އަތޮޅުގެ ވަށައިގެންވާ ކަނޑުއޮޅިތަކަށް ފީނުމުގެ އިތުރުން، ޑައިވް ކުރުމުގައި ދިމާވާ އެކި ކަންކަމަށް މަސްވެރިންނާއި ޑައިވަރުން ހޭލުންތެރި ކުރުމަށް ހާއްސަ ހަރަކާތެއް ކުރިއަށް ގެންދާނެ ކަމަށެވެ. އަދި ޑައިވްސައިޓްތަކުގެ އިލްމީ ދިރާސާއަކާއިއެކު މި ހަރަކާތާގުޅޭ ހާއްސަ ޑޮކިއުމެންޓްރީ ތަކެއް ވެސް އުފައްދާނެ ކަމަށެވެ.
"ހޭލުންތެރި ކުރުވުމުގެ ހަރަކާތުގައި އެން ހިފުމަށްޓަކާ ޑައިވް ކުރާއިރު، ޑައިވަރުން ސަމާލުކަން ދޭންވީ ކަންތައްތަކާއި ސަލާމަތާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކާއި އަދި ޑައިވް ކުރުމަށްޓަކާ ޑައިވް ކޯސް ހެދުމުގެ މުހިންމުކަމުގެ މައްޗަށް އަލިއަޅުވާލާނެ. މި ހޭލުންތެރިކުރުވުމުގެ ކެމްޕެއިން ވަޗުއަލްކޮށް ކުރިއަށް ގެންދިއުމަށް ހަމަޖެހިފައި ވަނީ، ފަންނީ މާހިރުން މި ކެމްޕެއިންގައި ބައިވެރިވާނެ" އެ ޖަމިއްޔާ އިން ބުނެފައިވެ އެވެ.